بديهية

ما لي بيك؟

2012-01-27T05:40:00.000+02:00

ما قلتش ليه تحبني بكره لما كان ممكن تحبني إمبارح؟ أنا حبيتك في النور وفي الضلمة. أيام ما كانت أسامينا غير النهاردا. دلوقتي إسمي عندك الشجر ناشف وإسمك عندي الجو بارد. دلوقتي فات زمان المودة زي ما فات علينا يوم ألف يتمنوه .. ما لناش منه نفس نفس الحظ.

خلّي التراب أولى بالأيام.. كله بينقضى وكلنا رايحين للتراب اللي بيضمني ويحضني أدفى من صدرك. لما تفوت علينا سنة، حَ أتذكر وأقول "كان كوبري وكنّا زعلانين من بعض، وكانت دكة وكنّا بنعيط سوا، وكان حلم وكنّا بنحكّي لبعضنا"..

حتى قلب الحديد بيحنّ، لكن هان عليَّ الأذى وما هانش عليَّ الزعل والغيرة، يمكن لو ما كانش دمي حامي شوية كانت خفت عني مرارة فوران الكبت والتعقيد.

خلّي عندك يقين في الفشل، حتى في الفشل كرامة. خلي عندك شك في الأسف، الندم مؤلم زيّه زيّ ذٌل السؤال.

بس أنا ما لي بيك؟ وحياتك لتعود علينا التجارب ما ندرى جديدها من قديمها.. وفي قلوبنا الغرام والكبر متساويين. وأنانية الحضور والغياب متساويين.

ولوحدي أنا كلّي غلط، أتقل من عربية ملوها زلط، بأدوق حلاوة فرصي الضايعة فيك، ومصروف الزمن خيط بيتسحب من كفي المفتوحة إليك والدقايق فرط الرمان.

2012

2012-01-02T21:21:00.001+02:00

كان زمان وعشت زيّ الكلاب، أشمم التراب ورا السايرين وراسي بين رجلي، بأحجل برجل عرجا وفي كل حتة من جسمي علامه قديمه توجعني.

السنه دي، حَ أعلى فوق القاهره زيّ النبات. أقلع جذوري الميته، أثبت جذوري الباقيه، أقطع أوراقي الصفرا، وأسقي أرضي كل فجريّه. حَ أعلى فوق سطوح المدينه وأدلل من السما الرجلين. أشد الوحده على قلبي، وأفتح من صدري بلد تاني، وأروح أسكن جنب الصوت اللي بيسكنّي.

كسرت مراياتي، وبعت جواباتي، آخر كلامي، "آسف، وشكرًا".

ما أعرفش حد، ولا حد يعرفني..

ولا حتى أنا !

لما تقابلني

2011-12-25T15:53:00.007+02:00

وإن رحت مره تجيب لفّة عشا ونحيب*. سلّم على قلبي. وأنت معدّي على الترعه وطالع القمّه، سلّم عليّ. بروح رياضيه حَ أمد لك إيدي، حتى وأنا قلبي بيغلي كدا زي البرّاد، حتى وأنا روحي بترقص من الفرحه. بس أنا لو عليَّ كنت أبوسك من خدك وأعزمك على الشاي، دا أنا كنت قاعد لوحدي حزين وشايل على ضهري همّ سنين، وبأسأل نفسي من إمتى الإيدين مشتاقين للسلام؟ سلّم عليّ عشان عيوني المخنوقة بالدموع تنفك وأقول اتعدلت، لاجل ما نتصافى في الأحلام وأشوف ضحكتك معايَّ أحلى من الهوا في يوم الشمس، وأغني لما تسيبني "سلّم عليّ سلّم عليّ لما قابلني سلّم عليّ عجبي يا ولدي سلّم عليّ".

* بيت من قصيدة لبهاء جاهين

ونسان

2011-12-05T18:12:00.003+02:00

...

" فيه لحظات جميلة في أيام الإكئتاب، مثلاً إنك تصحى من النوم الصبح، وتقرر إنك ما تنزلش من بيتك حتى لو القيامة قامت، ولا حتى تكلم حد أو ترد على التليفون، وتقول إن النهار دا يوم خالي من البشر. بس أول ما بتحس بالجوع بتقرر إنك تنزل تاكل مكرونة في مطعم الكشري اللي ورا بيتكم بكام شارع، مع إنك معاك نمرة تليفون المحل وممكن تكلمهم يجيبوا لك اللي أنتَ عايزه من غير ما تحتاج تنزل.
لما بتقعد مع الناس هناك، وتتأمل في وشوشهم، تتكلم معاهم عن مهزلة الإنتخابات المعروضة في تلفزيون المطعم، بتعرف قد إيه هما واحشينك، وقد إيه الكلام نفسه واحشك، بعد شوية بتسكت وتحس بالونس ماليك جواك، وتفكر إني دي أجمل لحظات اليوم كله، وبتبقى آسيان إنك ما تقدرش تمسك فيها لأنها حَ تروح لحالها.
ترجع البيت، وتطفي التلفزيون اللي نسيته مفتوح على قناة الأفلام، تدخل السرير، وتفتكر اللحظة دي تاني، وتروح في النوم بشويش. "

...

حسرة

2011-12-02T02:17:00.004+02:00

كل ليلة قبل النوم بأنادي إسمك زي العطشان ما ينادي على الميّه، لما جيتك في أحلامي طبطبتي على صدري، بكيت لحد ما عيوني ضاعت مني، شبابيك قلبي اتفتحت بدقة إيديكي، أسراري خرجت تطير، عمري انفتح على المجهول، وعذاب الروح نبّت على جسمي وعرّش، دموعي وقفت في الهوا حواليَّ وما وقعتش على الأرض، لكن سبتيني واقف حيران، من غير طريق، من غير بيت أروح له، كسيح القلب وأعمى، بأنزف حزن وحسرة، وبأشحت النظر من عيون بتحنّ على حالي.

من غيرك، أنا مضطر أعيش، ولازم أموت ولو بعد حين.

أرق ليلي

2011-10-28T02:18:00.003+02:00

وسط الندى وصلاة الفجر، آخر ساعات الليل، لوحدي كنت على الشط مستنيكي من غير مواعيد، والسهر والنوم قاعدين يتودودوا في عيوني.

ودلوقتي راجع زي كل طلعة نهار قلبي متلصم وماسك دموعه، بس بكره الصبح حَ تيجي بيتنا وصوتك يصحيني من النوم بابتسامه حنيّنه:
- يا حسين، يا حسين، قوم يا عيني قوم.. صباح الخير.

غيّرت الإستاتوس، والإستاتوس غيّرني*

2011-10-14T20:23:00.000+02:00

الحزن أخطبوط سكران.

...

جبر الخواطر على الله، طب وكسر القلوب؟

...

ماشي على حدّ سيفي، بالراحة وبالهداوة ، خفيف على مهلي، على أقل من مهلي. بأحاول أرّكز وما التفتش.. أنا ماشي على حدّ سلاح قادر ويشقني نصّين.

...

ملاك النوم كان بيذيع برنامج أنا والكوابيس وهواك في أحلامي: "معاكم من وقت ما تناموا لحد ما تتفزعوا!"

...

خُد نفسك قلمين في المراية، وشد السيفون على الأيام اللي فاتت، تعالى للسيدة زينب، واركب للزلزال.

...

يا أستاذ، يا أستاذ، العمر مش سرقة!

...

هاجت عليَّ ذكريات ودموع، بعد ما شاب شعري من قلّة العياط.

...

يا رب سلفني بتلاتة جنيه وقت، أو إديني سلطانية وإملاها لتمة عينها وقت.

...

حياتي زي إفيه مُركب، بالظبط زي حلم قديم لراجل عجوز بيحلم إنه بيحلم حلم قديم جَي من حلم قديم من بطن حلم قديم.. إلخ.

...

أنا يا دوب ولد شفاف زي ورق الكلك، متقلقل وشعره مفلفل، بيتمرن على الأحلام بالشعر ومش قادر ينسى رغبته في إنقاذ العالم.

* العنوان لأمل كعوّش

آه يا حلو يا مسليني

2011-09-29T00:35:00.005+02:00

التاكسي اللي عدي علينا وسمع غنانا .. لحق يسجّل كوبليه من الغنوه على الكاسيت، ولف بيها البلد، ويعيد ويزيد ويعيد ويزيد فيها لحد ما انتشى، ولما الشريط سفّ منه من كتر الإعاده، رجع لنا خجلان وقال لنا "تاني".

ودي حكايه مش جديده، دي حكايه قديمه جديده، بيحكيها الولاد للبنات، والتجار للزباين، والرصيف للشحاتين، والنهاردا لبكره، وبكره لإمبارح.

أما الحكايه التانيه فهي عن الترام اللي رماني في أحضانك ونوّلني من خدك بوسه ورماني بعدها بعيد عنك، لما ركبته لوحدي سأل عليكي، وكان مهتم، وكان زعلان، طيبت خاطره وفضل سؤاله سر بيني وبينه. لكن وقت ما دندن غنوتنا وهو بيتمخطر في السكه الدمع غلبني وغرق عيوني.

والحكايه التالته تخصك وحدك، عن عينيكي بالذات، المتكحلين بسواد المكر والدلال والهجر الطويل، اللي يشوفهم يحس دايمًا بعطش أيامه للحُسن والجمال، إلا أنا، من ساعة ما ريقك في حلقي سال من غنوه غنيناها سوا ولحق التاكسي يسجل منها كوبليه وحيد.

جرافيتي

2011-09-24T07:56:00.002+02:00

اقرا المستقبل المرشوش على الحيطان، أمل بكره طوفان من رايات مرفرفة في الريح رايحة المظاهرة بكل خفقة قوية، مليون خفقة قوية، خفقة قلب مسموعة، وخفقة راية مرفوعة. طوفان من الرايات والروس سابح ينادي بأعلى ما في حسّه على شمس إسمها "حريّة" تبان، ومسيرة تخلّف مسيرة رايحة في طريقها لمصر الجديدة.

مكرر: فى زيارة السيد أبو الكوابيس !

2011-08-25T04:16:00.002+02:00

فى العيون الواسعة اللى مالهاش جفون تقفلها شايف غربان في مصانع وغيطان بتنتج وتحصد شكوك وعلامات استفهام !

إبعد يا شيطان

أنا كنت جنب أمى لما الجو كان أحمر بلون الدم، واقفين على قمة الجبل ما لوش منزل بنبص في حيرة على سفحه والغولة العجوزة بتشاور لنا حل النزول هو النط من فوق !

إبعد يا شيطان

تلات عميان صغيرين قاعدين على الرصيف نايمين على كتاف بعض وبينهنهوا فى الضلمة ولما قربت منهم شمعتى انفجروا فى العياط أكتر !

إبعد يا شيطان

وسبع بنات لابسين طرح وجلاليب سودا داخلين البحر أبو الدوامات ومدورين الضحك الهستيرى !

إبعد يا شيطان

الفجر قناية راح أعديها لكن الشيطان الواقف على أول الجسر فاتح دراعته عايز يحضنى !

إبعد يا شيطان

إبعد يا شيطان...إلخ

مُكرر: ليل ريفي

2011-08-12T12:56:00.003+02:00

-ما تقتلهوش

..هو حيموت لوحده-

(1)

لأنه حيكون رئيس مستشفى حميات إمبابة، بيشيل صراصير الليل فى جيب البالطو الأبيض بتاعه طول ما هو رايح وجاى، فى أوضة الكشف وأوضة العمليات، عشان دايما يفكره باللى مش عايز ينساه..
طبيب وشاعر، شاعر ثم طبيب، بيعدى على النيل من بر للتانى رايح القصر العيني قلبه مهزوز زى ما يكون راكب تلفريك طاير فوق كل شئ، الناس والعربيات.. لكنه غطسان فى كرسيه وغرقان لشوشته فى الأحلام..

(2)

شاف نفسه ماشى فى السوق عنده، البياعين والناس متلمة حواليه كأنه الشمس.. كأنه المسيح مستنية يعالجها بكلمة أو اتنين..
"اعملى تحليل دم وبول ولما تاخدى النتيجة وريهانى"
"خليك ماشى على الحبوب زى ما وصف لك الدكتور، علاجك مفعوله بطئ شوية"
"أيوه هو الدوا ده، معلقة أول ما تصحى ومعلقة قبل النوم"

(3)

ترده صراصير الليل لليالى شتوية وحيدة واسعة وسع ملك الله، الزمن فيها واقع ومفقود، مفيهاش إلا كباين بعيانينها العتاقى، إلا صراصير بيندهوا بعضهم جنب المصارف والمجارى والحشيش والحلفا.
الشعر مستعصى، والشفا مستعصى، واقفين قدام عينيه فى الضلام مش قادر عليهم، جسمه مقشعر لأنه حاسس بالبرد والدفا فى الوقت نفسه، عينيه فى الخلا الضبابى الأسود متعلقين بأنوار كبارى عالية وممدودة بلا نهاية، من غير سؤال، من غير جواب فهم... الحقيقة بتقول إن كمان المستقبل مستعصى.

(4)

..حتى إذا كان سهران على القهوة فى وسط البلد ولا فى النقابة، أصوات صراصير الليل بتزّن فى ودنه، رغم إنه بطل من زمان يشيلهم معاه وبطل يعرفهم فى طريقه، بترده.. بترده لليل ريفى غامق، ليل من خرسه بيصرخ ويصوّت وبعدها بشوية بيهنهن للموت أو للنوم.. لكنه مش بيموت ومش بينام أبداً لأنه مصاب بأرق قديم، بس دايماً بيحلم بالنوم، نومة سلطانى كلها مزيكة من الجنة، عليها يتغير ألف نهار وليل وهى سارحة زى نهر النيل.

(5)

واقف وقاعد، وقاعد وواقف، واقف وبيدور، ويبص من طاقة يطل منها النور، عايش ما بين نهار رصاصى وليل قطرانى.. يمد إيده ويكشف بالسماعة على صدر السموات المأزوم.
ورا العيون المفنجلين، بيحاول يفتكر إمتى كان يتمنى البراح.. على امتداد الشوف ما يشوف إلا الشمس والقمر ؟.. وإمتى صبح البراح بيقبض قلبه ؟.. مش ده كان الحلم والأمنية.. ليه الزعل والقمص دلوقتى ؟ وليه بقى بيكش فى جلده لو سمع صراصير الليل من بعيد صريرها المُلل بيتصاعد ؟

(6)

وفى مرة جاله تليفون فزعه عشان ما سمعش حاجة منه إلا صرير صراصير الليل...

مكرر: 4.24.2006 !!

2011-08-08T00:36:00.003+02:00

باتمشى على شط بين جبال النثر على شمالى وبحور الشعر على يمينى، وأدوس على الرمال بالراحة وأسيب آثار أقدامى.. بس لما فقت لاقيتنى واقف على سور شباكى !

عربيات البلدية جت النهاردة تقص الأغصان الطويلة من على الأشجار، لكن المقص لا بيفرق بين غصن طويل وغصن قصير، شايف دلوقتي بعينيَّ غصن شبهى بيحاول الإختفاء ورا أطول الأغصان.

طريق صحراوي

2011-08-04T22:56:00.003+02:00

-1-

صحرا الظنون واسعه*

لكن فيه صدى بيزلزل السموات

"الشعر إيمان".

-2-

ورده مالت في حضن الجبل

الصخر ارتجف بجلاله من الخجل.

-3-

... ولاجل ما يمدوا قضبان حديديه

كسرّوا نخل الصحاري وقطّعوا الصبّار

الميّه فارت من الجذوع

...

وراحت الشركه

والحلفا طلعت على القضبان

وغابت السكه.

-4-

ريحة التين النابت لما بتفوح من الشجر
وتركب ضهر الريح

بتهزم كوابيس العطش والحَر
في الحلوق اللي ملاها الطريق عفره.

-5-

ما ترضاش النجوم تنطفي في ليل السفر

ما يهونش على الرمل يدفنه في العواصف

ما يقبلش بطن السحاب يحبس عنه المطر

الرحله ذكرى للصحرا زيّ ما للمسافر.

-6-

صحرا الظنون واسعه

والسراب أسراب من الأوهام

نشرتها الشمس اللاسعه

وما فيش وصول للمسافر

إلا بالتمتمه بالدعوه والأشعار.

* عن مطلع قصيدة "زهر اللمون" للشاعر عمرو حسني: "ماشي في صحرا واسعه زيّ الظنون"

صفحة من كتاب المواقف

2011-08-03T00:13:00.001+02:00

قال لي:

"عِيد الزمن من الأول، عِيده من تاني، عِيده تالت ورابع، ولو سألوك، قولهم إن في الإعادة إفادة، إفادة عن المستقبل الماضي والحاضر المتعاد،لا ندم ولا توبة، لا الإعادة إعادة ولا أنتَ أنتَ ولا المحطة الجاية حَ تفوتك، كل المحطات قبل الوصول فايتة."

كنّا نتمشى لحد الميدان ساعة المغرب والشجر بيهزّ أوراقه سلامات في وداع الشمس، والعمر اللي كرمش وشه وفتل عروقه هوَّ اللي خلّى الخطوة على قد العَرج، والكلام على لسانه بيفك حبس السنين الخُرس.

وقال:

"مش ضروري كل الزعل والقمص، ولا حتى كل الفرح والزينه، كله في معاده، بدايه ونهايه، لا قبل قبل ولا بعد بعد، وإن ترضى بحكمة الصبر والتأجيل، لا ترضى بكدبة الهزيمه والتسليم. لو الحياة للموت والنومة للصحيان والنهار لليل، يبقى ما تخافش تبدّل سعدك بأحزانك زيّ ما بتبدّل همّك بأفراحك."

وقفني في موقف أجره، وفاتني من غير كلمه زياده. كانت الناس حواليَّ رايحه وجايه بتلّف في رغيها وكلامها ألف مدار ومدار، و عواميد النور اللي طفّت لون الغروب خليتني متثبت في مكاني بوداع متأخر عن معاده.

من وحي أرض رجل – رجل

2011-07-28T01:16:00.002+02:00

بعد سنين، بعد سن الخمسين، وهزايم تقيلة ومش نبيلة، وخساير ما لهاش مكاسب تعوضها، كانت عادة كل يوم إنه بيصحى بكابوس، يقعد على كرسيه الخاص ويتفرج منه على الماضي في شاشة التلفزيون المطفي.

من وهم المرايات

2011-07-12T23:23:00.002+02:00

-بإلهام من سمية ربيع-

5 يوليو 1944:

ميدان الأوبرا، والأزبكيّة جنة العشاق في زمنهم، على باب السينما مرسوم أفيش "رصاصة في القلب"، والساعة مستنيّة عقاربها تدق اتنين، لاجل الميدان يتملي طرابيش لابسة بدل على قمصان. كانت الشمس كبيرة وعالية، واقفة على دماغ الناس زيّ الحقيقة الواضحة، صالبة شعورها أسياخ تنخس ضهور الناس.

وكان فيه بنت وولد على الرصيف ماشيين، حاضنين إيدين بعضهم بحبّ غرقان في ميّه عرق الخجل والخوف، هوّ كان لازم يلحق يروّحها البيت، وهيّ افتكرت لحن "بلاش تبوسني في عينيَّ" لما شافت الأفيش على الحيطان معروض.

على طرف الناصية وقبل ما يعدّوا الشارع وقفوا لحظة، حسّ إن فيه شئ بيشكّه، وما كانش عارف.. هوّ ده الحب اللي في قلبه؟ ولا قلقه من التأخير على المواعيد؟ ولا العرق اللي سايل تحت قميصه؟ عدى قدامهم عربجي بكارو شايل فوقيها مراية عريضة عريضة، عاكسة فيها صورة الميدان كله، بسّ الولد ما شافش من دا غير نفسه والبنت جنبه إيدها في إيده وقرص الشمس فوقهم زيّ الحقيقة الواضحة، شاف فيها باقي عمره منسوخ من اللحظة ديّه، والصورة ديّه.

لسّه العربجي بيعدي بحماره بالراحة جنب الرصيف، وهوّ على لسانه كلمة حُبّ حَ يقولها، جت بدالها نظرة واحدة طويلة طويلة، بتتكلم من غير نقط وحروف، والإبتسامة بعدها اترسمت على الشفايف هادية ومش خايفة من التأخير، وقرص الشمس اتقسّم بسن المراية الفايتة شموس أصغر.

5 يوليو 1977:

ميدان الأوبرا، والأزبكيّة جنّة للعشاق بسّ مقفولة، على باب السينما منشور أفيش "أفواه وأرانب"، والساعة بتدق اتنين إلا ربع في الفوّالة، اتنين إلا عشرة عند الكخيا، اتنين إلا خمسة في عدلي، واتنين في الألفي. والشمس الكيّادة فاردة شعورها خراطيم تنفخ لهيب يسيّح كل الجوامد.

وكان فيه بنت وولد على الرصيف ماشيين، من زحمة الناس يقفوا كل خطوتين، والحَرّ لفّ حوالين رقابهم حبال من خيش وخلي طعم الكلام في حلقهم ماسخ، والحيرة اللي اتجمدت في قلوبهم دلوقتي بتتسرّب من بين ضوافرهم. كان سهل يتوهوا وسط الناس ويروح كل واحد في طريق وحده، بسّ السؤال اللي خايف من الإجابة، "إيه اللي كان قبل؟ إيه اللي يبقى بعد؟"، قيّدهم في بعض، لأن كل شئ مع الإجابة حَ ينفلت بعيد ومش راجع.

على الرصيف وقع لوح قزاز واتدشدش تحت رجليهم، الطريق اتفرش كسور وشظايا، ومن صورة واحدة بقوا ألف صورة متنتورين، ألف إيد وألف بق وألف عين. البنت حسّت إن الشمس اللي لمعت في فتافيت القزاز خزقت عيونهم بكل كره قديم وقسوة ممكنة، ودلوقتي هيّ خايفة من عماها تمد خطوة قدامها.

وبصّت في عيون الولد، كانت جفونه بتبربش على إجابة فيهم بترتعش.

5 يوليو 2011:

ميدان الأوبرا، والأزبكيّة جنّة العشاق المنسيّة، على باب السينما منشور أفيش فاضي مكتوب عليه "قريبًا" ، والساعة ممكن تدق اتنين في أي لحظة محتملة، والشمس كوره من الدهب بتتدحرج على وشّ العالم بتقل مؤلم، وتفتح جروح الناس بلسعة كرابيجها.

وكان فيه بنت وولد على الرصيف ماشيين، هوّ دايخ والدنيا في عينه مايلة، مايلة على صدره الضعيف، وهيّ بتشبك نفسها في الأرض برجلين زيّ الفراخ، ولو تسلّم نفسها للنسيم السخن راح تختفي في عين الشمس، وكان التاجر القاعد في محله ورا البتارين كأنه ملك الزمن نفسه بيتفرج بعين ناعسة على الناس الجاية والرايحة، والبتارين هي شاشة تلفزيونه اللي بيشوف فيها كل ألوان الحياة.

أما الولد والبنت، فما حدش غيرهم من الماشيين خد باله إن البتارين بتعكس الصورة الكاملة، شافوا فيها الشمس كابسة فوق ضهر العالم، والناس غايمة زيّ البخار، بسّ فين هيَّ وفين هوَّ؟ كانوا أرفع من العواميد، وأطول من الشجر، أعرض من العربيات، وأقصر من الدكك، فيهم شئ بيضم سوا كل معنى ونقيضه.. الأمل واليأس، السعادة والحزن، الخيال والواقع، أو يمكن معنى أكبر من إن يكون له دليل في فهرس المعاجم.

مطرح ما عدّوا سابوا ابتسامات واسعة على كل البتارين، كسفوا الشمس الحامية وفضلوا ينوّروا في الميدان بدالها لحد المغرب وطول الليل.

مكرر: النوم تحت العتب

2011-07-01T06:23:00.001+02:00

-وما يخلصش الوقف وراه-

... بأستريح أكتر لما أنزل قدام العتبة وأخبط وأستنى قدام الباب، النور لما يتسّحب ويخرج، الصوت اللى بره لما يقلّ وينيّم، خبطة واحدة، خبطتين، الصوت اللى من جوه عالى بسّ مكتوم، ممكن بيسأل "مين ؟"، يمكن بيقول "إدخل"، يمكن بيصرخ "إمشى"، يمكن مش سامع أو مش عايز يسمع الخبط على بابه، سرسوب النور من عقب الباب لما بيرّعش البدن وأنت محجوز وراه. كل اللى سافروا وغابوا ورجعوا ووقفوا ما كانش فيه حد فيهم زيي، يقدروا يفتكروا ساعة ما الحبايب أخدوهم بالأحضان، وساعة ما سابوا دموعم في قصمانهم، وواحد اتفأجوا بوجوده، أو إن كل حاجة فضلت في مكانها زي ما سابوها، فى نفس المطرح تمام، صور كتيرة في الخيال مزحومة بتفاصيل أكتر، فيها شماعة وفوطة وحنفية ميّة وأكل على السفرة، وأنا كل بأفكر فيه عتب مقفول أو مفتوح، وراه اللي وراه ..
حصل إنى شلت بلاط البيت الأصفر وحجر العتبة الأبيض وعبّيته في الشنطة ومشيت، كل اللي ضاع في مسافة سكة ما غبت ما كانش مهم، أو ماكناش مهم قد اللحظادي، -مع إنى رضيت "قبل" ورضيت باللى عرفته عن "بعد"، يمكن الرضا كان هو الأجدر لى بالكلام عنه-، من أول الشارع بأهدى في مشيتي وأتأمل أفعال الوقت وألعابه في غيابي، في الأسلفت، في البيوت، في البلكونات، مين علي، مين وطي، مين قبّ ومين غار، وأخبّط على باب فوقانى من باب الإحترام والأدب، أوطى راسى من باب الخضوع والإعتراف، وأنزل سلمتين في الضلمة كأني بأنزل ميت سلمة، أخد نفس عالى أخير متشبع بريحة التراب الناعم والنور الدافى، وأمسح رجلي في العتبة وأدق على شقة فاضية مهجورة وما استناش حد يفتح لى.

* الصورة من كوم الدكة للفنان أسامة مهران

شظايا الزمن الفاصل

2011-06-29T11:45:00.003+02:00

-22-

أنا قلبي فرد حمام يطير ويرجع لي.

-23-

كل ما ألمس روح تتحول فراشة تطير ما ترجعشي.

-24-

كل ثورة بتنتفض.. كل حب بيتجدد.. العالم بيترعش لها كأن الكون بيتخلق من الأول تاني.

-25-

ممكن نتفق، مثلًا.. أنا أكبر والزمن يفضل يعيّل!

-26-

على كل شئ متأخر. كل قطوراتي على كل الأرصفة بتفوت.

-27-

افتكروا دايمًا إني عشت حياتي بأقاوم النعاس والنوم.

-28-

قالت لي: الحيّة اللي لسانك مش أكتر من فرّيرة صوتها عالي حبتين.

-29-

ربنا نحَت ملامحي بإيدين آلاف الأمهات.

-30-

الأوقات اللي ما كانش لها لا طعم ولا لون ولا ريحة في الذاكرة، بمرور الزمن اكتسبت من الخيال طعمها ولونها وريحتها.

-31-

ما عادش عندي كريمات تنفع لعلاج التشققات النفسية.

-32-

لأني أعمى، مضطر أخبط في الأحضان الغلط قبل ما إيدينا تتلاقى.

-33-

أقل شئ ممكن ينتصر على الموت.. زيّ إن النهار يتلون بجمال كلمة "صباح الفلّ".

مُكرر: خدادية النوم السلطاني

2011-06-28T08:56:00.001+02:00

النوم يا ملاكي النوم.. سلطانك.. عزيز عينك، لما تتاوبي في وسط قعدتنا من النعاس التقيل، لما الدنيا تغيم وتروق في عينيكي، لما راسك تتقل وتخف، ما هواش تعذيب، جحيم الفوقان والصحيان، جمر الأسماء، التفاصيل، الوشوش بتلسع.
النسيان، التدليك، المشط يحلّ شعورك وخيالاتك المعقودة، قميص نوم يرّق عليكي ويشف ويطير، تفردي بدنك على ضهر الهوا وتغيبي في أحضانه، وتضمي شفايفك السُمر زي الرضعان وتبوسي فُم الناي، عدى الهوا في الناي خلاه يصفر صفير خفيف.
لياليكي بساتين، أزبكية نص الليل، نور ضعيف، سهارة لأجل نومة متونسة سرحانة في الأحلام، قولي مفيش أحلى من الناي، لما تريحي راسك على المخدات، وعينيكي تروح في النوم شوية بشوية، وأنتي بتسمعي جوقة من الملايكة بتغني لك "طفْ يا درّي" على همسه السارح اللامتنهي.

زيارة للسيّدة

2011-06-22T02:29:00.002+02:00

القطار دخل المحطة بشويش وانفتحت أبوابه. نزل منها واحد شايل سلّة أكبر منه بعشرة الضعف، وبيتسرب من قعرها خيوط من رمل الأسود. لولا تقل الشيلة والحطة كان نزل وطي يبوس حديد القضبان واليافطة المكتوب عليها (السيدة زينب).

في طريق السّد البراني والرجلين بتحاول تجر خطوتها في الزحمة على قدام، عدى عيّل صغير وضحك وقال، "حوش اللي بيوقع منك". لولا كسوفه ما كانش رجع يلملم خيوط الرمل المتسرب وراه من السكة بإيديه.

لما وصل عتب المقام الأخضر، رمى حمله على الأبواب. النور وريحة المسك والبخور استقبلوه من جوّه، فجأة حسّ إنه اترفع في الهوا خفيف مفرود، خفيف طاير، واكتشف قد إيه أحماله كانت ضغطاه، وإنه أطول، وإنه أعرض، وإنه أوسع، وإنه منشور فوق المقام زيّ السما على الأرض. لولا حبّه العضم والمفاصل المربوطين كان زمانه اتبخر وما بقاش منه إلا حمله المركون على الباب.

أول خروجه الريح بخّت في عينه عفارها، تمتم بدعوة بإسم أم العواجز، واتوّكل على الخلّاق وشال السلّة من تاني، لولا إن جدر العصب انغرس في الأسفلت لحظة ما قام مهزوز كان جذعه انقطم واتدلدق الرمل الأسود من السلّة في كل مكان.

بره المكان، بره الزمان

2011-05-28T23:50:00.003+02:00

- أنتَ عارف إن ممكن ده ما حصلش؟
- إيه اللي ما حصلش؟
- اللي بيحصل دلوقتي!
- قصدك يعني إنه ما حصلش قبل كده؟
- لأ.
- أبقى مش فاهمك!
- بالراحة بالراحة.. عندك دليل؟
- دليل لإيه؟
- دليل للي بيحصل!
- ....
- طيّب .. إحنا فين؟
- إحنا.. إحنا في الزمالك.. لا لا.. في جاردن سيتي... إيه ده؟ الأماكن في بالي شبه بعضها ومش عارف إحنا فين! فين صحيح؟
- مش مهم.. والساعة كام دلوقتي؟
- مش معايَّ ساعة! مش عارف!
- شفت بقى؟
- لأ، دليلي إن أنتِ قدامي دلوقتي وبتكلميني، وإن الناس اللي رايحة وجاية لسه بتروح وتيجي!
- تعرف إسمي؟
- إيه؟.. إسمك.. إسم.. لأ.. مش فاكر الصراحة!
- يبقى دليلك ضعيف ومحتاج إثبات.
- قصدك إننا في حلم ولا خيال؟
- كل شئ وارد.
- طيّب وبعدين؟
- ولا قبلين. ممكن ترتاح هنا شوية معايَّ.
- أنا مرتاح، بس عايز أعرف الحقيقة. باحاول أفتكر وصلنا للحظة دي والمكان ده إزاي؟
- ما تحاولشي، خد عندك مثلاً.. أنا وأنتَ واقفين في نص الشارع دلوقتي، يا أخ.. يا أخ، بطل تفكير، خليك معايَّ هنا، الحاضر مش دايما محسوس، إيه الحاضر أصلاً؟ الحاضر كلمة هشة انحشرت بالغصب بين كلمة البني آدم وإسمها ماضي وكلمة ربنا وإسمها مستقبل.
- مش وقت شعر وفلسفة على فكرة.
- ليه؟
- عشان. إحنا. محبوسين.
- أبدًا، أنتَ دلوقتي بتعيش خلودك في الأبد.

- سكت ليه؟
- يعني أقول إيه؟
- قولي حاجة.. أي حاجة.. قول بحبّك.. قول كرهتك.. ما تزغر ليش قوي كده! أنتَ ممكن تموت هنا بالمناسبة.
- شكرًا.
- عفوًا. مش حَ تلاقي مكان ولا زمان أنسب من كده، صدقني.
- أنسب لإيه؟
- للموت .. أو الحب.
- يا سلام!!
- ما هو الإنسان لو مش بيموت .. يبقى أكيد بيحب.
- أو بيكره مثلاً.
- ما فرقتش كتير.
- لأ فرقت، الموت والحب والكره برضه لهم مكان وزمان، إحنا لا في زمان ولا في مكان.
- مين قال؟ إحنا في مكان وزمان بس مش عارفين إيه همَّ.
- أنا حتى دلوقتي مش عارف إحنا واقفين مع بعض بقى لنا قد إيه؟
- وعشنا سوى العمر ولا يومين.
- أنا حتى مش قادر أمشي لأني مش عارف أنا فين!
- نفسي أفهمك يا أخي. ليه أنت مصّر على إنك تعرف مكاننا وزماننا.
- عشان يبقى عندي إثبات إن ده بيحصل!
- وهو مهم؟ افترض إنه ما حصلش.
- ما حصلش إزاي وهو بيحصل؟
- وبعدين ما هو لو حصل حَ يكون خلص ويروح لحاله. لكن لو ما حصلش فهو عمره ما حَ ينتهي.
- أنتِ مجنونة.
- ممكن تقول للناس اللي بتروح تقرا روايات ومسرحيات خيالية ما حصلتش أكتر ما بتقرا كتب التاريخ اللي حصل إنهم همَّ كمان مجانين!
- ممكن.

- أنت عارف إن ممكن تكون بتحبّني؟
- ... !

دورة العمل

2011-05-09T07:13:00.000+02:00

إلى محمد مستجاب -رحمه الله-

أفاق من غفوته عندما سقط رأسه على صدره، نظر يمينًا ويسارًا، واطمئن أن لا أحد يراه، الكل مشغول في عمله تقريبًا. مسح لعابه السائل فوق شفتيه بيده ونهض من مكتبه، ثم خرج إلى الصالة الرئيسية، نظر إلى الساعة، الثانية عشر مساءً. شرب سيجارة، وتأمل الشارع من النافذة، أحس بملل الإنتظار يأكله، لم يأت إلى العمل اليوم إلا للإنتهاء من إنتظاره الطويل.

هبط إلى الدور الثالث. تجوّل بين المكاتب، مكتب التحرير، مكتب المتابعة والتحليل، سلّم على الزملاء، وتبادل الأحاديث حول حركة التغييرات الجديدة، عبر مكتب الشئون سريعًا كي لا يراه إبراهيم. في مكتب التصديقات، سأل على الأستاذ عباس، لم يأت إلى العمل اليوم، قرأ تاريخ اليوم على نتيجة الحائط، ثم خفض رأسه إلى صدره وزفر زفرة حارة.

صعد إلى الدور الخامس. صادف أمنيّة على الدرج، حيّاها بابتسامة زائفة، ردت عليه بتحية الصباح وتوقفت، فكّر ألا يتوقف من أجلها، لكنها سدت عليه طريقه. سألته عن أحواله، سألها عن رئيس الهيئة، أجابت أنها لا تدري. ربع دقيقة من الصمت مرّت، بدت وكأنها دهرًا مميتًا، كانت ترسل فيها نظرات تحمل إليه رسائل لا يريد استقبالها. تنهّد ثم ودّعها وأكمل صعوده.

دخل مكتب السكرتيرة. ألقى التحيّة عليها وجلس، انتظر حتى انتهت من مكالمة التليفون، ثم سألها عن رئيس الهيئة، لم يأت إلى العمل بعد، أخبرها أنه لا مانع لديه من الإنتظار. دخل الساعي حاملًا صينيته، سألته إذا كان يحب أن يشرب شيئًا، فنجان قهوة، عادت إلى أوراقها المتناثرة فوق سطح المكتب. حاول قضاء الوقت والتودد إليها ببضعة أسئلة واستفسارات لكنها كانت منشغلة تجيبه من بين الأوراق، هل باستطاعته التدخين، ومتى سيحضر بسلامته، وهل هناك أية أخبار عن الطلب الذي تقدم به إلى رئيس الهيئة، نظر إلى الساعة الموضوعة على المكتب، الساعة الثانية عشر وخمسة عشر دقيقة، الوقت يمضي في الهيئة أبطأ من كل ساعات العالم. طرق الساعي الباب، الرئيس هنا، خرجت السكرتيرة مسرعة، ثم عادت بعد عشر دقائق، الرئيس مشغول وسيغادر إلى مقر الوزارة خلال نصف ساعة، رفع رأسه إلى أعلى يائسًا وأطلق سبة في سره.

هبط إلى الدور الرابع. مر على مكتب زميله أسعد، اشتكى له توقف الحركة داخل الهيئة، الوقت والإجراءات، وتساءل يائسًا لماذا يطير اليوم في الخارج بسرعة بطريقة يبدو معها الوقت هنا جحيمًا أبديًا؟ طلب أسعد له كوبًا من الشاي، لكنه لم ينتظره، وقام يتجول بين المكاتب الأخرى في ردهة الدور، سليم يقرأ الجرائد، هناء تثرثر مع كريمة وهي جالسة على مكتبها، توفيق يشرب قهوته بلا أية عمل آخر. عبر الصالة الرئيسية، ونظر إلى الساعة، الساعة الواحدة وخمس دقائق.

اكتشف أنه أمام مكتبه.

ظلّ واقفًا.

سلامات أخيره

2011-04-21T15:52:00.001+02:00

-1-

بعد ألفين سنه، حَ تحكي علينا كراسي المطاعم ودكك المحطات.

وكل شئ تاني حَ يسكت كأنه ما حصلش وما لهوش وجود عندنا.

-2-

بكره فيه أثر من إمبارح ما بيروحش بسهوله

ما بيتمحيش زي الأسامي ع الرمل ما بتتمحي من موجة بحر.

إمبارح حرق. وشم فيه صورته وإسمه وعنوانه، وبكره بيت مسكون بأرواح من إمبارح.

-3-

كبيت أباريق دمع السنين الفاتيه،

ما كل السنين عيطت في الوداع وأكتر قبلنا.

وخدت الليل والنهار في أحضاني ونمت وياهم،

ونورت طريقهم بالشموع واللمض،

ما همَّ دايماً غربا في سفرهم زينا.

-4-

زي البخيل بأحوّش كلام كتير

لكن بأحوش نفسي

قبل ما أبعت جواب من الوحشة والتوحيش.

-5-

خفت قوي لما مشيت ولاقيت خيالك عدي ورا ضهري كأنه ما يعرفنيش.

-6-

ما ليش في السرير مطرح

ما ليش في البيت مكان

ولا حتى كرسي في قهوه

ما ليش..

واقف بره دنياكي في ليل المطره

بردان ومبلول ومستني

تاكسي المرواح.

-8-

زيّ أول مقابله، كان نفسي أسألك وقت السلام الأخير.. "إسمك .. إيه؟".. !

-9.025302345-

افتراقنا كان انكسار صوره في مرايه مشروخه .. ومش أكتر.

-10-

في ليل عين شمس أو زحمة الملك فيصل كان صدري بيعبي الهوا بسواد دخانه، القاهرة كلها منسيّه تحت تسع طبقات من مستنقعات قطران، والضلمه تحت أبديّه لولا المآذن واقفه وحيده زي أبراج لاسلكي ساكته بتطفي وتنوّر وتطفي وتنوّر.

...

مصير الماشي يقف ويتأمّل.. لسّه فاكر ليله ما شفت العدرا في عينيكي، كانت بصر وبصيره، كان جلالك من جلال شمس فتّحت في عيني نهار، والقاهره اتغسلت عشانك ولبست توبها القديم، والساعه قصرت وطالت، والدنيا وسعت وضاقت.

...

راجع على سريري من غير نوم، وفي راسي ليله ساكته زي أبراج لاسلكي بتنوّر وتطفي وتنوّر وتطفي.

-0-

أصعب عشر دقايق

همَّ عشر دقايق

يروح فيها كل إحساس بالدفا وينسحب

بعدهم باتسمّر في الأرض بحقيقه بارده ومخيفه

كأني كنت ماشي في شارع مضلّم بأغني ومتوّنس بنفسي

وفجأه صوتي اتحبس !

-1111111111-

ساعه الحصار

يبان كل شئ مقاوح ضدي زي صخر في وش نحّاته

افتكرت نفسي أسير الفشل والضعف

وعملت نفسي ميّت ونطقت الشهاده

لكن عدت نسمه نفخت فيَّ رقتها وقوتها

وصححت الروح من تاني.

-12-

أنا كنت يونس ابن الهلاليه

وبقيت يونس ابن متّى النبي.

-13-

والحياه لما تراضيني تبقى في الرقّة متناهيه

زي الطبطبه بعد العرق والمكاسب والخساير.

-14-

فيه خيط نور من بعد غيم

نفس مريح من بعد خنقة

نبض خفيف من قبل موت

فيه لسّه روح.

-15-

ومفيش مشاكل

ما النهار زيّ المشارط

مشارط جراحين

شفرة سلاح

فِ إيد مجانين

أما الليل

قطن وشاش وقزازة يود شبه خلصانه !

-16-

ممكن أفوّت القطر اللي على الرصيف دلوقتي

وأستنى اللي جاي بعده

عشان أشرب شاي بلبن في قهوة المحطه

وأتأمل شويه في وشوش المسافرين

وأسباب السفر.

-½16-

لحظه غريبه

تشبك في لحظه قديمه

يصحى اللي كان نايم

بحبّة زعل..

وخلاص.

علاقة

2011-04-05T01:54:00.000+02:00

هبت نسمة باردة في وجهه من رصيف المحطة عندما انفتحت أبواب قطار المترو التي كان يقف خلفها تماماً، هبط من القطار تائهاً بعد أن اصطدم بالركاب الصاعدين والتفت يميناً ويساراً بحثاً عن المخرج.

كانت تفاجئه من حين إلى آخر أثناء محادثاتهما بسؤالها الهستيري "أنتَ مش حَ تسيبني لوحدي؟".

قدّر من المرّة الأولى علّة سؤالها المتكرر على الرغم من كم الابتذال الذي يحمله بسبب مباشرته ووضوحه، فإن مرورها بعدد لا بأس به من العلاقات الخائبة مع الرجال منذ أن بدأت في الإرتباط بهم نتج عنه خوفها المرضي من الفشل والانكسار الذي أرغمها على استباق أحداث بينهما بمثل هذه الأسئلة.

كان يعجب كيف لإمراة مثلها تخشى الإخفاق كل هذه الخشية؟ لأنه ظن أنها ستكون أقل رهاباً من اللواتي لم يجربن الارتباط بالرجال من قبل، حيث أنها ستكون أكثر دراية بأسباب فشل التجارب العاطفية، ثم توصل إلى أنها ربما دخلت أغلب علاقاتها حاملة فوق ظهرها تاريخها الثقيل الذي لا تراه إلا أسوداً ولم تعتبر شيئاً إيجابياً مما مضى عليها، بل ربما كان سبب إخفاقها الأول هو أنها أدخلت تجربة إحدى صديقاتها الفاشلات في تجربتها الأولى، وربما كان سبب فشل الأخيرة منها سؤالاً كهذا.. لا أحد يدري، فكل هذه التصورات تبدو ساذجة ومضحكة !..

لكن الحقيقة الآنية أنه قد بدأ يضيق بذعرها هذا، والحقيقة التالية أنه قد خطر له بالفعل أن يتركها، لأن جروحها القديمة أصبحت تثير قلقه وتوتره حيال علاقتهما وتهدد بقاءهما معاً، بنفس القدر التي تدفعه إلى التمسك بها لأكثر من سبب، منها افتتانه الأول وانجذابه تجاهها، ومنها رغبته القوية في حمايتها من ضعفها، وإحساسه الداخلي بالواجب الإنساني العام، لذا كان يعهد إلى نفسه مسؤلية إحساسها بالطمأنينة.

كان يعلم إن أسئلة مباشرة مثل "أنت لسه بتحبني؟" و"أنتَ مش حَ تسيبني لوحدي؟" لا تصلح معها إلا الإجابات الحاسمة والصادقة، ولا يجدي التهرب منها داخلياً أو خارجياً. لكنه وجد في كل هذه الأسئلة نتيجة استفهامية واحدة أنه إذا كان بالفعل يحبها ولا يريد أن يتركها، فلماذا ينزعج من السؤال؟

قطع رنين جرس الهاتف المحمول في جيبه أفكاره، كان هي المتصلة، أجاب شارد البال، وأنهى المكالمة بكلماتٍ مقتضبة سريعة.

سارا متقاربين في مشية بطيئة متجهين إلى الميدان الواسع. كان الصمت سائد بينهما طوال الطريق، وكلاهما غارقاً في أفكاره الخاصة عن الآخر بعد لقاء فاتر.

عندما وصلا إلى بداية الشارع المظلم، ثبتا في مكانيهما لحظة لأن أضواء كل أنوار الدكاكين والمحلات وأعمدة الإضاءة العمومية في الجانب الآخر من الميدان غشيتهما فجأةً كإبر دقيقة توخز أعينهما بقوة، وارتفعت كل ضوضاء الميدان إلى أذنيهما صارخة من ضغط الضجيج.

ثم راحت الأضواء والضوضاء تخفت تدريجياً.

Another Yellow Brick Road

2011-03-07T03:46:00.000+02:00

تحت تحت. زلزال فوق الأرض زيّ حبّة رز بتتنطط فوق سطح طبلة. انهيار الدور السابع عَ السادس. الدور التاسع متعلق لوحده في السما! الهروب! الهبوط من قمّة تلال الخراب وأطلاله الرومانسية! يوتوبيا مقلوبة على ضهرها، راسها في التراب ورجليها في الريح زيّ روايات جول فيرن. ما عديتش على الكباري، كل عواميدها قش! مفيش طريق للخروج من المدينة، كل بواباتها اتقفلت! باحفر تحتي، احفر احفر لحد ما أوصل الطرف التاني من الأرض. تحت تحت تحت زيّ الخلد احفر.

* Caspar David Friedrich, Wanderer above the Sea of Fog

بوسة

2011-02-14T01:48:00.001+02:00

أمرتنى أمي أن أصعد لأبلة (سامية)، كي أقضى عندها وقتاً حتى يتسنى لأمي الذهاب إلى الطبيب، كنت أشعر بالسعادة لأن (إيمان) إبنة أبلة (سامية) التي تكبرني بثلاثة أعوام سوف تجالسني هذه المرة، فقفزت إلى أحضان أمي وقبلتها. قالت لي قبل أن أخرج من باب الشقة، "ما تتشاقاش، هه؟".

تسلقت السلم درجة درجة ممسكاً بالحاجز الحديدي، وضوء النهار يسقط من أعلى حتى أسفل السلم، أكملت صعودي ثم توقفت عند الباب لاهثاً، طرقته طرقة خفيفة ثم تراجعت. فتحت لي أبلة (سامية)، كانت ترتدي ثوباً منزلياً باهت اللون، رحبت بي ودعتني للدخول، وسألتني في لطف "بقى عندك كَم سنة دلوقت؟"، أجبتها "سبعة ونص"، وبينما كنت أعبر طريقي إلى غرفة (إيمان) سمعت أصواتاً تعلو، فالتفت التفافة خفيفة ورأيت عمّ (عبد الباقي) في غرفة الجلوس مع رجل آخر، أكملت سيري نحو الغرفة، طرقت بابها مرتين قبل أن أسمع صوت إيمان يهتف "أدخل".

وجدت (إيمان) واقفة في منتصف الغرفة كأنها تنتظرني، قالت لي "تعالى اقعد يا حسين"، ثم تركتني وخرجت من الغرفة وجذبت الباب وراءها. كانت غرفتها الصغيرة منظمة، يتوسطها سرير عريض وسجادة حمراء مستديرة، ودولاب ملابس عريض يغطي أحد حوائط الغرفة، تقف فوقه عدة دمى. فكرت أنني عندما أعود إلى غرفتي سوف أرتبها مثلما رأيتها ترتبها من قبل. كنت أحب مجالسة (إيمان) لي، حيث أنها كانت الأقرب إلى سني، ونادراً ما رفضت اللعب معي، ومشاركتي القصص التي كنت أرويها لها.

عادت إيمان تحمل صندوقاً مغلقاً. لاحظت أنها متجهمة، وضعت الصندوق فوق السجادة، حاولت أنا نزع غطاءه ولم أفلح، ففتحته هي، وأخرجت منه بعض الألعاب الصغيرة والدمى، وجلست أفكر بماذا نلعب هذه المرّة، قلت لها "تحبي تلعبي بإيه؟"، قالت شاردة البال "أي حاجة"، فعدت أخيّرها حتى أجعلها تنتبه "تحبي تاخدي البنت والولد وأنا أرتب العيال على الكراسي؟"، كررت بنفس شرودها "أي حاجة"، صحت فيها، فأخذت الدميتين من يدي بعنف ووضعتهما أمامها، شعرت بالحزن، عدت للبحث عن ما تبقى من الألعاب والدمى التي أخرجتها، وبينما كنت أبحث داخل الصندوق وقعت يدي طائر خشبي دقيق الهيئة بلا رأس، هتفت من الإعجاب "الله ! حلو قوي .. بس فين بقيته ؟"، أجابت ضجرة "بابا كسرها"، فتشت داخل الصندوق عن بقية الدمية حتى وجدت الرأس، أخذت جسد الطائر ثم جمعته برأسهِ لكنه لم يلتصق فيه، اعترضتني (إيمان) بصوتٍ حزين "ما تحاولش.. مش هيتصلّح"، فكرت قليلاً وأنا أنظر إلى الطائر، ثم أخذت أحاول إصلاحه بطرقٍ عديدة حتى استطعت ثبيت رأس الطائر في جسده والتئم جزءا الدمية ببعضهما.

اختطفت (إيمان) الطائر من بين يدي في سعادة، ثم رفعته عالياً وحركته يمنى ويسرى في وضع الطيران ثم ضمته إلى صدرها، اتسعت ابتسامتها على شفتيها، كم سعدت لحظتها بنظرات الفرح التي كانت تغمر بها طائرها الخشبي، ظلّت تردد عبارات الشكر والعرفان قائلة "أنا أحب اللعبة دي قوي"، ثم أخرجت قطعتين من الحلوى المغلفة وأهدتهما إليَّ، في تلك اللحظة شعرت بالخجل من امتنانها ولم أدر كيف أجيبها، فاقتربت منها وقبلتها على وجنتها سريعاً أثناء انشغالها باللعب بطائرها، أدارت وجهها إليَّ في ذهول بينما كنت أعود إلى موضعي السابق بجانبها، وأخفضت وجهي إلى الأرض، سكن كل شئ للحظات، وشعرت بالخطر في هذا السكون، ثم سمعتها تقول بصوتٍ مبحوح "هأقول لماما" وانطلقت تجري خارجة من الغرفة، قفزت خلفها لكنني لم أستطع اللحاق بها فبقيت في مكاني خائفاً، فكرت دقيقةً بالتسلل خارج الشقة، لكن أمي لم تعد بعد من عند الطبيب، شعرت بالرهبة وظللت في مكاني على الأرضية خائفاً، هل ستخبر والديها؟

سمعت صوت أبلة سامية ورنين أواني معدنية تسقط، فاقتربت من باب الغرفة، ورأيت (عم عبد الباقي) يقطع الصالة إلى المطبخ ووراءه الرجل الآخر الذي كان جالساً معه، تراجعت إلى طرف السرير والتصقت به، لم أعرف ماذا يحدث ؟، ولا أعلم لِمَ تخبر إيمان أهلها؟!

مرّ وقتاً حتى دخل الرجل الغريب عليَّ الغرفة، انحنى وأمسك ذراعي بقوة وجذبني كي أقف، جلس على المقعد وأنا بين يديه، نظر إليَّ بحدة من فوق إطار نظارته ثم سألني، "إسمك إيه يا حبيبي؟"، أجبت برهبة:

-حسين

- بابا فين يا حسين؟

- .. مسافر

أطلق زفرة حارة وصمت قليلاً، ثم سألني:

- أنتَ عارف أنا مين ؟

هززت رأسي أن "لا"، فقال،"أنا خال إيمان"، ثم أضاف:

- أنتَ عارف إن اللي عملته ده غلط؟

- أنا متأسف.. ما كانش قصدي يا عمّو.. هي اديتني البونبوني وأنا كنت بأشكرها.. أء..

قاطعني لائماً، "أنت عارف إنه ما يصحش الولاد يبوسوا البنات؟"، لم أعرف كيف أجيبه، أبعدت نظري عن وجهه بينما كانت الأصوات القادمة من خارج الغرفة تعلو أكثر، سمعت عمّ (عبد الباقي) ينادي الخال، "يا مصطفى.. يا مصطفى"، صاح الخال، "أيوه"، ثم نهض تاركاً إياي وخرج مغلقاً الباب خلفه بقوة، هدأت الأصوات مرّة واحدة، ظللت صامتاً مترقباً ما سوف يحدث، مضت الدقائق وأنا أنظر إلى الباب المغلق والملابس المعلقة فوق المشجب، كنت أود الخروج من هنا، اتجهت إلى الباب، لم أجرؤ على فتح باب الغرفة وإلقاء نظرة خارجه، نظرت من ثقب المفتاح فلم أرى إلا كنبات غرفة الجلوس شاغرة، وضعت أذني على الباب وأرهفت السمع فلم أسمع شيئاً، كأنه لم يعد هناك أحد بالمنزل، التقطت الطائر الملقى على الأرض بينما كنت أعود إلى المقعد، تذكرت القبلة الخاطفة، وفكرت في أمي، ماذا سوف تقول وتفعل إذا أخبروها بما حدث؟، انتظرت عودة أمي بصبرٍ نافد، أخفيت وجهي بين يديَّ، ثم تطلعت إلى الباب مرّة أخرى.

وللدمّ النبيل كرامة

2011-02-12T02:18:00.004+02:00

خُد العلم من إيد الشهيد وإمشي في طريقه. آدي دمه بيجري قدامك وشق لك سكّة. اللي يعرف معنى كلمة "دم" يعلم إنّ الدمّ غالي، لأنه قصاص للحيّ قبل ما يكون للشهيد، لأنه شقا مبذول ساعة حق، ولأنه نبضة قلب صادق ضميرها، لولاه ما كان الطريق صبّح لنا واضح ومستقيم، ولولاه ما كان طلع علينا النهار رايق وسليم. الحياة أصعب ما دام الطريق اتفرش بالدمّ، والبقعة منه زيّ الحرق على صدر الناجي، علامة إن الحاضر شايل كرامتين وإنسانيتين: الشهيد ونفسه.

الأغاني

2011-01-21T16:46:00.003+02:00

عمرك سفرك بيتمدد قدامك في سكة صحراوية طويلة من الملل واليأس وأنتَ تملاه بالأغاني! إيه الأغاني؟ ما هياش بساط الريح تركبه وتطير به أو شلالات فاكرها جاية من ضهرك وراح ترفعك تحتها لحد آخر السكة وأول النبع! إيه الأغاني؟ الأغاني للمسافرين يمكن تكون سراب اللي نسيوا إن العطش دايماً وراهم والعطش هوَّ اللي قدامهم، ويمكن تكون نجوم بتنوّر وتطفي في الضلمة من غير سبب! بس الحقيقة إن كل الأغاني ورود دبلانة في اللحظة اللي فكرت فيها إنك توقف بس عشان تشم عبيرها! دي الأغاني مطرح ما تمشي تلاقيها مرميّة على الجنبين!

يومية شتوية

2011-01-20T04:55:00.073+02:00

كتب في آخر رسالته:

"أنا بردان . بردان قوي . ربنا يبعت الغطيان"

وبعتها. واستسلم لموته اللي انعاد عليه كل ليلة من الشتا، تنسحب منه الروح في دنيا فيها الأشباح تقوم الليل لتعذيبها، ويقوم هو من النوم مضعضع هزيل شاحب كأنه كان مدفون تحت رمل الصحارى.

صرخ أول ما صحي من النوم:

"يا ريت محدش يكلمني النهاردة"

وسكت. لأنه فزعان طول الوقت من عيون الناس وأحضانهم وأياديهم، فيفضل دايما هربان وبيجري بعيد عنهم. مع إنه كان في نفس الوقت مستني حد يتكعبل في قلبه ويقول له بابتسامة سمحة.. "صباح الفلّ".

وشوش في آخر اليوم:

"آه وآه يا كَسرة قلبي"

ووقعت دمعة من عينه. شالت فيها كل الحنان والنقمة عَ العالم، سخنة بلون الحرايق على وشه الرمادي اللي لوّنه الوحدة. ما مسحهاش وسابها تسيل وتشق لها وادي في خدوده.

سأل في أول المكالمة:
"إزاي يطيق الإنسان سواد نفسه؟"

وما استناش رد. قفلّ تليفونه، وحط لوح القزاز اللي بيحطه كل يوم بينه وبين الناس، وقعد يتفرج عليهم وهمَّ بيعدوا قدامه وكلهم مشغولين وعاملين مشغولين. ولما نادى عليهم، صوته ضرب القزاز ورجع له خايب ومتقطع.

دعا في آخر مناجاته:
"يا رب، خدني في جملة المتونسين برضاك أو خدني بس!"

وطلق تنهيدة. غمض عينيه بعدها، ونشر ضهره على السرير لكرابيج تنزل عليها طول الليل.

الحَكّة

2011-01-16T21:46:00.000+02:00

كلما سمع أقداماً تصعد أو تهبط الدرج، قفز من السرير، حتى يبدو عليه أنه كان مستعداً للمغادرة. لم يعد إلى السرير هذه المرة، فقد كرهه بعد أن بقى فيه ساعات الليل والنهار كلها لا يفعل شيئاً إلا أن يحملق في السقف، ظل واقفاً عند النافذة يتأمل في بلادة الأضواء المنبعثة من الأعمدة القريبة وأصحاب المتاجر الجالسين عند أبواب متاجرهم والسيارات العابرة والمارة، لم تكن في يده ساعة يتعرف بها على الوقت، لكن انطلاق أذان المغرب أثار توتره، حكّ رأسه بقوة مفكراً، أزعجه أرق الليلة الماضية، قلّب فكرة النوم في خاطره مرة أخرى، لكنّه إن لم يغادر الآن فسوف يقع شجارٌ عنيفٌ بينه وبين شريكه في الشقة.

ترك النافذة ودخل دورة المياه حيث التقط قميصه الكالح، امتعض لاتساخ بدنه من كثرة النوم والإستيقاظ حتى أصابته الحكّة في أماكن عدّة، تثاءب وفكر في نوبة استحمام سريعةٍ، وبينما كان ينزع قميصه مرة أخرى، سمع طرقات سريعة عالية، أفزعته، جحظت عيناه، وأمسك أنفاسه، شلّت أطرافه، وتأهب متحفزاً، سمع أقداماً بطيئة تصعد الدرج وأخرى سريعة تهبطه، ارتدى قميصه على عجل، ثم تأكد من إغلاق الباب، مرت دقيقة بطيئة صامتة لا يُسمع فيها إلا ضربات قلبه القوية المتسارعة، ثم تمالك نفسه أخيراً وخرج مديراً عينيه الجاحظتين في أرجاء الشقة، لم يجد أحداً غير الضوضاء الصاعدة من الشارع.

أراد أن يشرب كوب شاي واحد يهدئه قبل المغادرة، وضع البراد تحت حنفيّة الماء وفتحها، وجد أن المياه مقطوعة عن الشقة كلها، وتذّكر أن شريكه أغلق المحبس بالدور الأرضي قبل ذهابه إلى العمل، حتى يرغمه على الرحيل بعد أن فصل من عمله وانقطع عن دفع نصيبه في الإيجار لشهورٍ عديدة، أعاد التفكير في احتمالات صعوده في كل لحظةٍ تمر، سرت في جسده رعشة لمرور ذلك الخاطر في عقله، ربما يستطيع التوسل إليه لأن يبقى يوماً آخراً، جاب الردهة القصيرة المؤدية إلى الغرفة فارجاً ساقيه وهو يحك النيران المشتعلة ما بين فخذيه متردداً بين البقاء والمغادرة، عاد إلى السرير حيث سحب حذاءه، تقدم تجاه الباب في خفة وفتحه، هبط الدرج حذراً، ثم قفز خارج المنزل إلى الشارع العمومي مسرعاً حتى يتجنب مصادفته في الطريق.

فى شارع الرئيسي أحس الليل حاراً ولزجاً، دس سيجارة بين شفتيه، وظل يمشى بها سليمة، أوقف أحد العابرين وأشعل سيجارته، سحب أنفاساً متلاحقة، تنهد بارتياح، طوّح ساقيه في جهة نهاية الشارع إلى النيل، سأل نفسه هل يستطيع العودة إلى الشقة لالتقاط ما تبقى من أشياءه؟، لكنه لم يجد إجابة واضحة داخله. عند الكورنيش، عشاق وأزواج متراصين مثل الأشجار التي يجلسون حولها، وكوبري ممتد حتى الضفة الأخرى من النيل يحمل فوقه مئات السيارات، جلس على أحد المقاعد الشاغرة، ثم خلع حذاءه ووضعه بجانب المسند كيلا يسرقه أحد، ومدد جسده على المقعد وأسند قمة رأسه إلى المسند ورقبته فوق الحذاء واضعاً ذراعه فوق عينيه حاجزاً ضوء الشارع البرتقالى عنهما.

مرت الدقائق تليها الساعات وهو يقف فوق الحاجز الذي يفصل بين اليقظة والنوم، يغفو ويفيق، تضايقه همسات المحبين وخلافاتهم، شرطى يتحدث فى جهازه اللاسلكى، ولا يكف عن إصدار التوجيهات وإرسال الضحكات السمجة، أطفال يلاحقون بعضهم البعض بثيابهم المتسخة حول مقعده ويتقاذفون فيما بينهم مخلفات الشارع، زقزقة العصافير على الأغصان، الحرارة والرطوبة التى تجعل الجو كالصمغ، لم يصدق أنه قد نام حقاً إلا عندما استفاق تماماً وأدرك أن الوقت صار فى آخر ساعات الليل.

استقام فوق المقعد، تثاءب طارداً النعاس، فك صدر قميصه، مرر يده فوق عنقه وصدره اللذان يغمرهما العرق، ظل يحكّ جسده بأظافره الطويلة ثم قام من مكانه، تساءل لماذا شعر بالقلق وأحسّ كأن شريكه يراقبه أثناء نومه؟، نزل الدرج الصغير حيث النيل والقوارب المعقودة إلى الشاطئ، قفز إلى واحد منهم، كان يعرف أحد أبناء أصحاب هذه القوارب، وجد صاحب القارب العجوز يجلس مقوس الظهر على حافة قاربه، التفت العجوز وراءه ليرى القادم، فألقى السلام عليه، لكنه لم يرد عليه سلامه، لاحظ أن العم العجوز يمسك بين يديه كوباً من الشاى، التفت جواره فوجد البراد على نار الموقد الصغير يغلى وعدّة الشاى بجانب الموقد، سأله عن ابنه، فأشار إليه برأسه حيث القارب الذى يضج منه أغنية شعبية وتتراقص أضواءه باهتزاز القارب يمنةً ويساراً من رقص ركابها جميعهم عليه.

حضّر شاياً لنفسه، أمسك بالكوب من قاعدته، وسحب سيجارة من جيب قميصه، أشعلها من نار الموقد، ثم وقف على حافة القارب المهتز، شرد قليلاً وقلب فكرة فى نفسه، انحنى ووضع الكوب الذى لم ينتهى منه، وسحب نفساً أخيراً من سيجارته ثم أطفأها في قاع الكوب، نزع قميصه وبقى ببنطاله الجينز، وانحنى مرة أخرى على الماء ومسح ذراعيه ورقبته وصدره العارى بالماء البارد، ثم استعد في وقفة مستقيمة وقفز فيه، غاص للحظات ثم ظهر على سطح الماء، اقترب من القارب، وفرك كتفيه ونحره عدة مرات، شعر براحةٍ وبخدرٍ لذيذٍ يتسلل إلى أصابع أقدامه، مدّ ذراعه وانطلق يعوم، ويعوم مع تيار النهر المظلم، والعجوز يراقبه بعينين ناعستين.

شجرة جديدة في شارع الجمهورية

2010-12-07T06:15:00.001+02:00

كنت عاوز أقولك:
بكره .. الزمن حَ يحليكي ما بين صيف وربيع. من هنا ورايح الناس مش حَ تشوفك إلا شجره ذكيه وجميله، رقيقه ونشيطه، تطرح سنه لمون، وسنه برتقان. وأنا وأنتِ بس الوحيدين اللي عارفين سرّك، رحلتك من ضلمة الطين لضيّ الشمس، الأيام العاصفه البارده، والأيام الرايقه الدافيه. حَ يحتار اللي يشوفك في أولك وآخرك ويتشابك في أغصانك بغيّره ومحبّه. مع إن الحكاية بسيطة جداً، لها بذرة في بطن الأرض قبل ما تفرّع جذور وأوراق وتبقى إسمها شجره على إسمك.
بعد بكره .. الزمن حَ يقلب شتا وخريف، والصُفره تزحف على ورقك، والعَجَز يدبّ في قشورك. ساعتها ما لكيش عَزا في نفسك غير بذره تحت الأرض شالت في قلبها سِرّ حياتك وسِرّ مواتك.

مشهد

2010-11-05T13:43:00.000+02:00

كانت دمائي تلوث كل شئ حولي، بنطالي وقميصي والسرير وثيابها والمنشفة التي كانت تجفف صدري العاري بها. كانت تريد إكمال مهمتها لكنني لم أستطع تحمل ألم مرور يدها بالمطهر فوق الجُرحين العريضين اللذان يشقان أعلى بطني، أمسكت معصمها بقوة قبل أن تصل إليهما وقلت لها "كفى!". مضت دقيقة وهي تحاول تخليص معصمها وتنظر بشفقة في عينيَّ المشتعلتين بنار جروحي الدامية، أفلت يدها ثم نهضت لأقف أمام المرآه، أخرجت رباطاً مطاطياً طويلاً من جيبي وشرعت في ربطه حول صدري من أجل إخفاء الجرحين. التصق صدرها بظهري وظهر وجهها في المرآه فجأةً، كانت تريد أن تساعدني في ضبط وضع الرباط على الجرحين، أحكمته كيفما اتفق وتركتها وحدها أمام المرآه.

كان الألم يخترق رئتيَّ ومعدتي، والرباط يضغط صدري كلما حاولت التنفس بعمق. رائحة الدماء تزكم أنفي حتى شعرت أنَّ حوائط الغرفة هي الأخرى تنزف دماءً مثل صدري، وفكرت أن هذان الجرحان يحتاجان إلى هواءٍ آخر نقي للشفاء خارج هذه الغرفة.

شتاء السويس 1965

2010-10-20T09:45:00.000+02:00

سلّم الأب العامل على ابنه بعد أن استلم الطعام المحمول إليه من البيت، ثم جذبه من ذراعه وأشار باتجاه الشارع المظلم المقابل لبوابة المصنع وقال "الطريق اللي عايز ترجع منه طويل ومحتاج عربيّة الشغل .. ده أقصر"، وأوصاه قائلاً "ما تخافش، أنتَ كبرت .. سلّم على الحاجة وأمك واخواتك"، ثم غادره عائداً إلى عمله.

بدأ الإبن سيره بخطوات ثقيلة مترددة. تذكر ما قالته أمه أن هناك أرواحاً شيطانية تسكن الشارع منذ وقت الحرب، وأنها هي التي خرّبت كل محاولات البلدية لإنارته، "كان لازم تنسى عشاك النهاردة يابّا؟".

غطي أنفه بيده مخففاً من استنشاقه لرائحة الأوحال الكريهة التي تناثرث في الطريق، وبقع شحم عربات النقل والسيارات التي تلوث جوانبه، حاول أن يشغل عقله في أي شئٍ آخر بعيداً عن طريقه المقفر، فيما سيفعله عندما يصلّ إلى المنزل، "العشا وكوباية الشاي السخنة والسرير وغطا تقيل يدفيني". فكّر في الطريق الآخر الذي يحبه ويحب أعمدة الإضاءة الساهرة فيه، وما أن جاءت صورة الأعمدة في خياله، حتى أضاءت الأعمدة ثم انطفئت مرة واحدة، تصاعد الخوف إلى حلقه، هرول مسرعاً أكثر.

سمع نباح كلاب يتردد في الأرجاء، التفت حوله في كل جانب حتى وجدهم، كان ثلاثة منهم قابعين على الأرض ينظرون إليه بأعينٍ باردة، وثلاثة آخرين يقفون متأهبين كأنهم كانوا بانتظاره، أبطئ قليلاً في مشيه، وراح يعض لسانه من الخوف، شعر كأنهم يتعقبونه بخطوة بخطوة، وتخيل أحدهم يقفز ناهشاً لحمه إذا ما حاول أن ينحني لإلتقاط بعض الحصى، تملّك الفزع قلبه، ولم يجد بُداً من الفرار، أخذ يجري ممسكاً أنفاسه، انطلقت الكلاب خلفه وهي تنبح، تعثّر في حجر وكاد أن يقع على وجهه.

صرخ الأخ الواقف في أخيه الذي انكمش أمامه لاهثاً:

"أنتَ إيه أخرّك؟ .. أمك قلقانة في البيت وأنا تلّجت في مكاني مستنيك .. مالك واقف كده ليه؟".

اتسعت عيناه ذهولاً لمّا رأى المياه تتدفق في حوض بنطال أخيه.

مُكرر : صفحة من اليوميات : الميتين

2010-10-02T10:32:00.001+02:00

قفشت نفسي نايم وأنا ماشي في الشارع، النوم حَبَك معاه يزورني بعد خمس أيام من الأرق، كنت همدان، صايم وما تسحرتش، الشمس فوقي سطيحة، بسّ الجو كان مهوي والنسمة مصحصحة، كمان الشارع كان رايق من العربيات والناس، راسي مالت شمال ولورا كأني مغمى عليّ، وصلت للمستشفى وسألت عليه، طلعوني الدور الخامس، لما دخلت له لاقيته بيغير هدومه، لابس قميص سمنى وبنطلون رمادي وعليهم بدلة صوف من نفس لون البنطلون، أخدني من إيدي من غير ما يسلّم عليَّ.
اتمشينا في الطرقة، أول حاجة قالها لي، "معاك سيجارة ؟"، طلعت علبة وناولته واحدة، جيت أطلع معاها الولاعة، ردّ إيدي، فضل يقلبها بين صوابعه، قلت له "عامل إيه ؟"، اتنهد وقال لي "جعان"، كنت عارف إنه كل مرة ينزل هنا لازم يحس بالجوع، سألته "عامل إيه غير إنك جعان ؟"، سكت شوية وسألني هو "أمك عاملة إيه؟"، قلت له "كويسة"، "إبقى سلم لي عليها"، كان بيسحب رجليه على الأرض، وكل ما يتك على رجله الشمال، يبان على وشه الوجع، حاولت أمسك دراعه عشان أسنده، بس هو فلّتها من إيدي، واصاني أقول لتيتي تعمله أكل، هزيت راسي وقلت "حاضر"، وقف في مكانه ساكت شوية، كانت الطرقة لسه ما خلصتش والنور من العنابر خارج يعاكس في بعضه على الأرض المتلمعة، والممرضات واقفين متبسمين عند نهاية الطرقة بيتفرجوا عليه وهو بيحبي برجلين زي العيّال لما بيتعلموا المشي، لف على رجله اليمين براحه واتسند على كتفي.
وإحنا راجعين خرج دكتور صغير السن من أوضة مضلمة، ماسك في إيده ملفات، سأله "معاك ولاعة ؟"، الدكتور قفلّ حواجبه ورد "التدخين ممنوع هنا"، مفيش دقيقتين كان مجرجره في الكلام، عن نظام المستشفى والزيارات والبيات مع العيانين، لحد ما خدوا على بعض وضحّك معاه، حسيت بالغيظ منهم، وقاله في الآخر "تسمح تولع لي ؟"، فتش الدكتور في جيوبه عن ولاعة مالاقاش، جيت أطلع ولاعتي، رد إيدي، وشدني ومشي بيَّ لحد أوضته.
لما دخلت الأوضة دورت عيني فيها، لاقيت طواجن الأكل في مكانها متغلفة بالألمونيوم، الزر والخضار والكبدة، الصراحة أنا استغربت قوي، وقلت من دهشتي "الله!، ده الأكل زي ما هو اتلمسش!"، ضيق عينيه وزام، "ماليش نفس"، اتهمدت على الكرسي ساكت من غير ما أناقشه، حسيت إني مهدود ومحتاج أنام من كتر التفكير والتعب والمشاوير، قالي "لو عايز تنام .. السرير آهوه"، ما كسرتش كلمته، رفعت ملاية السرير وخشيت تحتها، كان واقف قدام المراية بيمسح دقنه ورقبته الممصوصة، فردت جسمي، صوت العصافير بره كان آخر حاجة وعيت عليها قبل ما أروح في النوم.
لما صحيت، كانت الدنيا مغرب، وقت الأدان بالظبط، أول حاجة اتبينتها إن باب الأوضة مفتوح وإنه ماكانش موجود هنا، أول ما قمت عدلت هدومي ودخلت الحمام شطفت وشي وخدت الطواجن معايا على مطعم المستشفى وقعدت أفطر، شلت الفويل عن الكبدة وغمستها بالفتافيت العيش اللي لاقيتها موجود على الترابيزة ودسيت وشي في قعر أكلي ساكت.

إيه يا سيد يا سويسى؟، رحت فين؟، لساك بتضحك زى عادتك فى أحلامى، كنت بقميص صيفى خفيف مقلّم ولا كان سادة؟، وشنطة قديمة مقلًمة أخضر فى أحمر مش ظاهرة فى صورة خيالاتي لكنها بتحكى عن كل تغريبة وسفرية وكوفيتك الشتوية وشرايط صوتك، الدقى بتحلف بضحكتك، وعزبة ولاد علاّم والعجوزة القديمة، الشمس اللي بتحبها لساها بتيجى لحد النهاردة حتى لو مش على طول، وتنوّر الدقى من تانى بألوانها الطبيعية المسروقة، يا أبو طارق.. يا للي عملتنى قيمة الضحك فى وش نعمة الدنيا.. بس قولي ليه بتختفي وتوه عني ؟.. أنا أنا نفس الولد اللي كان بيجي لك لسه بأجي لك..
افتكرت وفكرت وسرحت وأنا راكب رايح القطامية، زي اللى بأنتقل من ليل لليل، مش باين تحته غير عواميد وعربيات أسفلت الطريق اللى شق الصحرا والمقابر الخرسا، مديت نظري في الضلمة وغبت عشان أنسى خوفي من وحدتي.

عديت في الحارات الضيقة ما بين البلوكات اللى مجاري الصرف نحلت ضهورها ونشرت صنانتها، وضلّها القطراني طابق على ضلوع صدري، الناس اللى رايحة وجاية بتتستر في ضلمتها، كأنهم أشباح بتعدي ويّا الهوا في السرّ.
لما وصلت البيت لاقيت كل شبابيكه مفتّحة على آخرها، صقفت بإيدي وأنا داخل وقلت "ياللي هنا"، البيت كان فاضي من كل العفش إلا كنبة وحصيرة وقلة مية، والحيطان كانت على المحارة، جاوبني صدى الصقفة وشخشخة صدره بالكحه، خرج عليّ بيشد رجله التقيلة في الطرقة، كان بيتمم وسمعت كلمة واحدة، "خش"، لكني ما اتقدمتش ولا خطوة، لما وصل لي شدني من إيدي، وسألني "إيه اللى جابك هنا ؟.. اقعد اقعد"، قعدنا على الحصير متربعين، سند ضهره على رجل الكنبة، سحب من تحت مسند الكنبة علبة سجاير، طلع منها ورق بفرة وسيجارة وفصّ ملفوف بسلوفانة، قالي وهو بيلحس جنب السيجارة، "قوم إعمل شاي لروحك قبل الأدان وأنت راجع هات الشرموطة معاك".
لما خرجت شايل كوباية الشاي السخنة بالخرقة سمعت صوت البط والفراخ ماشي بيتدألج ورايا، سألته بصوت عالي "هو مين اللى بييجي يشوف الفراخ ؟" وما ردش، لما قعدت قال، "ستك أم طارق بتنزل كل يومين تشقر عليه"، بصيت من الأرض على الدنيا بره البلكونة الدنيا ما كانتش نهار ولا كانت ضلمة، غيوم شتا حبست الشمس عن شروقها في السماوات.
قطع سرحاني لما سألني فجأة "وإيه كمان ؟"، "إيه ؟"، وأنت عامل إيه في دراستك ؟"، عيني راحت في الأرض وقلت متضايق "بأسقط"، هزّ راسه هزة خفيفة وسكت من غير ولا كلمة، طبطب على فخدي وقال "قوم بص على تعريشة العنب اللى هناك ديّه"، لما قمت لها افتكرتها، نفس التعريشة بنفس التفاصيل، بس ورقها كان دبلان وناشف، هاش في إيدي، قالي من مطرحه بثقة متناهية "كلها شهر وتلاقي عنبها طرح"، كنت مستغرب إزاي بس صدقت كلمته، لما رجعت له قام اتسند على إيدي، "أنا داخل أنام"، واتاوب ببق مفتوح، "لأه... قول ليحيي إني عايزه حالاً"،"حاضر، تصبح على خير".
ضهره المحني وهو راجع على أوضته ثبتني مكاني، اتخضيت من نفسي لما لاقيت روحي رايحة معاه، وإن مفيش حاجة من التاريخ عليها، وإن إسمي وأصلي وفصلي اتسمح في لحظة واحدة، قفلت محبس المية، وهيشت أصوات الفراخ والبط على العشة، شديت أكباس الكهربا، وقفلت باب البيت بالمفتاح، ورحت الدقي عشان ألحقه هناك.

الحب في المقاطع

2010-09-24T23:38:00.011+03:00

-1-

الحب قاد شمعتين فينا كانوا ضينا ليلة ما مشينا جوه فدادين الوقت المفتوحة.

-2-

كان المكان اللي جمعنا بعيد عن الأرض بشوية،

وبعيد عن السما بمسافات،

وقريب من الحلم بخطوة.

-3-

الإيدين على مفتاح الراديو في أول النهار، أغنية لليلى مراد من البرنامج العام، وفي لحظة واحدة بقينا لحنين ناعمين في فضا الأوضة يترددوا للأبد.

-4-

وكأن جبل العذاب اللي شيلناه اتبخر من حرارة ضحكة رايقة في ساعة صافية.

-5-

فاض لبن الأمومة من صوتك لما ندهتي إسمي.

-6-

كده تبقى نهايات حواديتنا السعيدة حركة تقدمية !

-7-

على سكة بتوديك وسكة بتجيبك

والزحمة للناس زي خنق الرقابي

يستحيل تبقي في طلوع الروح لوحدك !

-8-

حرموني ضلّ الشجر،

حرموكي نومة الجنانين،

وما كانوش عارفين إنهم من نصيبنا الجاي.

-9-

وطلعت عليَّ شمسك بتضحك.. لحظة ما رديتي "صباح النور".

-10-

يا أول الطريق اللي ما لوش آخر.

-11-

كل اللي قلناه،

وزعلني وزعلك،

بكرة هييجي من نفسه

ويطيب خاطرنا.

-¼11-

شايك من إيدي أول ما جيتي،

غيرتي ريقك من مرار اليوم.

-12-

أربعة وأربعين دقيقة كانوا محسوبين بعقارب الساعة كان فيهم معنى العمر اللي عشت عشانه.

-13-

كل ما تسكني في إمبارح هتفضلي بكرة معايَّ.

-14-

رسالة قصيرة:

هأوصل بالليل متأخر، ولما أصحى من النوم، هأكلمك بكره في التليفون، وممكن أعزمك على شاي، اتنين شاي، وشاي لاتنين..

-15-

وتفضل لك ابتسامة سايحة في عسل العيون
دليل ما كان من الشكر الواجب للحُب.

-16-

كنت بأشهق من كابوس طويل..

وأنتِ بسرعة دسيتي إيدك في صدري وقبضتي بيها على قلبي ولحقتيني من موتي.

-18-

فين الأغاني اللي تزّهر ولا تدبلش بطول الأيام؟

-19-

أول ما أصحى كل نهار بأحضن من شوقي الشمس اللي في بزازك.

-20-

إمتى عرفت إن أنتِ أنتِ؟

كان عندي ست سنين، نفس الليلة اللي أنا وأمي كنّا واقفين على شبّاك الهيئة قبل المرواح، بنتأمل في السما المبقعة بالنجوم وهي تحت رجلينا وشارع طلعت حرب في عربياته وناسه ودوشته نازلة من فوقينا.

-22-

شفتك شايلة شنطة

بتعدي إشارة مرور

لمعتي في عين الشمس

وأنا اتعميت بالنور

-22-

فى أيام شتوية تشبه لدى، نتكلفت بالبطانية ونضلم الأوضة ونقعد نتفرج على فيلم كئيب وفى نهايته نفضل نعيط على السنين اللى ما عرفناش بعض فيها وآخرتها ننام مطرح ما احنا قاعدين وأنتِ نايمة على حجرى وراسك على كتفى والبطانية بتضمنا وتدفى صدرنا.

-24-

خلي الحُب في سِرّ تسبيحك..

يعينك على الصبر،

والصبر يعينك على الشقا،

والشقا يعينك على الدنيا،
والدنيا والشقا والصبر
يخلصوا في الجنة
والحب ما ينتهيش.

-25-

أما القزاز طَقّ من الصريخ،

جت الأحضان تلم كل الجروح.

-26.5-

يا هل ترى سمعتي سؤالي في همستي في أول مقابلة وأنا بأودعك.. "أنتِ مين؟" .. ؟!

-27-

الساعة في الميادين نسمعها بتكتكاتها، الوقت الوقت، وإحنا نطير فوق لسعة عقاربها، زي العادة، لو كنت ناسي، فأنا قصدت إني أنسى.. أكيد قاصد.. خليت النهر بوصلتنا، ولوحدنا مشينا بعيد. فكرت لو إني مش بأضيع في السكك اللى مشيت فيها من قبل، ودايما أمشي وقلبي مش هايب، كان زماني مهجور في وسط الشوارع لوحدي. قلتها لو نتوهم سواد الليل يبلعنا وينفينا فيه، قالت لي الوقت الوقت، وأنا رديت يسقط يسقط كل الوقت !

-28-

وقت ما تبعدي توحشيني، بأحسّ بالشقا من التوهة والقلق والحيرة، وروحي بتحرقني من الشوق تشوف الصبح رايق من الأمل اللي في عينيكي.

-29-

آدي شارعك المشّجر هادي لكن قصير ..

ممكن تحطي إيدك في إيدي قبل ما زعقة العربيات تفرقنا من تاني ونعدي لأول صفوف القيامة حاضنين إيدين بعض؟

-300-

يا ريتنا قلّتين على باب جامع قديم يسقوا اليوم الرايح واليوم الجاي.

-31-

كلمتك حلّت فنجاني، طلعت ضحكتي تجري بجلاجل.

-32-

تيجي نتسابق على سلم برج الجزيرة ؟
يمكن لو وصلنا الدور الأخير نقابل بكره بذاته ويقولنا سره !

-33-
بعد ألفين سنة
هينزل النور على الميدان في المغرب كأنه الصبح
ويتبقى لنا احتمالين
يا أنا وأنتي ويّا الناس
لا أنا ولا أنتي ولا الناس

الشمس

2010-07-04T20:27:00.005+03:00

-.. وبعدين ؟
ولا قبلين، عادي، لو كنت ناوي أموت هنا .. ودلوقتي .. يبقى هأموت تحت رجليكي، والتشخيص: التعرض المباشر إلى حرارة الشمس العالية لفترة طويلة من الزمن تسبب تسارع تنفسي وقلبي وانخفاض شديد في ضغط الدم مما أدى إلى الوفاة... بإختصار "ضربة شمس". لو كنت ناوي أموت هنا دلوقتي.. كنت هأموت لوحدي متمدد على الأرض من شعوري بالقهرة منك، وأبداً ما هيبقى في العمر الطويل عزايَّ ما دمت مُت غريب زي كلب وحيد في صحرا فاضية، وأخلص عند الناس كلهم بفعل كان محدش شافه بيحصل.
- و"دلوقتي هنا" إيه اللي فاضل لك؟
مفيش، حبّه من نفس معافر، وقلب ينطح في صدري عشان أمشي خطوتين، بيت شعر على لساني، إسمي وعنواني، فزع أمي عليَّ، وصورة بعيد منقوشة في بالي، وخيال الأماني اللي من حرارتك بيتطاير، وكل شئ تاني باين لي سراب إلا أنتِ، وحدك أنتِ بقسوتك وجنانك تحط روحي في ضمة إيدك، متعلق في دراعك لأنك باقية لي طول سكتي من دون الناس..

بقيّة

2010-06-17T21:27:00.004+03:00

بصت لي باستغراب وقالت:
- أنتَ سمعت ماما بتقولك "يا رب يوجعك" بدل من "يا رب تكون بخير" ؟
قلت لها:
- آه.. مش فاهم إزاي ؟
سكتت شوية تفكر، بعدها قربت مني على الكنبة وحطت دراعها في دراعي وقالت:
- إذا كنت عملت كده، أومال لما تبقى حبيبي هتعمل إيه؟
رديت:
- أبداً، ما تتوقعيش ده يحصل تاني !، أنا واحد مجنون.

حلم

2010-06-15T03:40:00.000+03:00

وصلت إليها في المساء.
لم أجد صعوبة في العثور عليها بين زملائها. وجدتها تقف بينهم، عندما اقتربت منها، كانت مهتاجة وتعاني من غضبٍ بسبب شئ ما، لعنت حظي السئ، لكنني أظهرت لها حضوري ولم أتراجع إلى الخلف، نظرت إليَّ وعاملتني بصلافة شديدة، جاءني أحد أصدقائها والذي كنت أعرفه معرفة سطحية، سلّم عليَّ ووقف إلى جانبي، وقفت هي الأخرى أمامي وقالت بما يعني "أنتَ إيه اللي جابك هنا؟"، حاول صديقها تهدئة الأمر بيننا، فقالت أن عليها الذهاب الآن لأن والدتها تنتظرها عند ناصية الشارع الرئيسي، تركتهما وانطلقت من فوري حانقاً من الحرج خارجاً من المكان كله، كل ما كنت أفكر فيه عندما جئت أنني كنت لا أريد إلا السلام والسؤال عن أحوالها، لكن فيما يبدو لي الآن أنني جئت في أكثر الأوقات خطئاً، أعماني إحساسي بالحرج من الموقف كله، وأكملت طريقي إلى الخارج، سمعتهما يحاولان اللحاق بي، ثم حاذاني كل واحدٍ فيهم من جانب، كان صوتها يلهج بعبارات الأسف والاعتذار، حاولت إفهامها سبب مجيئي، لكننا كنّا قد وصلنا إلى الخارج ورأينا والدتها المنتظرة واقفة بين جموع المشاة فتوقف الحديث، سلمت عليَّ أنا وصديقها سريعاً، لكنها خصتني بنظرةٍ فيها الامتنان لحضوري والتأسف على ما حدث، وقالت أنها سوف تحدثني على الهاتف بمجرد أن تصل بيتها، ثم عرّفت والدتها بي، فقالت "أهلاً وسهلاً يا ابني، حمد الله على السلامة، إزيك عامل إيه؟"، أجبت بسرعة "الحمد لله يا طنط، أنا بخير"، توقف الحديث مدة لحظات، ثم عُدت أقول "شكراً على سؤالك"، أجابتني بصوتٍ حرج "العفو، على إيه؟، يا رب تكون بخير"، ثم انطلقت مصطحبة ابنتها في يدها سريعاً من أمامنا، كان صديقها لا يزال إلى جانبي ينظر إلىَّ في استغراب، أكملنا سيرنا بخطى بطيئة، لمست وجنتي عرضاً بأصابعي فوجدتها رطبة ومبللة بدموعي.

مُكرر: زي إمبارح وزي بكره

2010-06-10T13:32:00.004+03:00

محكوم عليه يفضل على كده للأبد.. حتى وقفته ما تتغيرش.. مكتوب عليه يستنى اللى ما بيجيش.. ويعجز بإنتظاره الأبدى.. ويقولك فى الآخر "يعنى أعمل إيه غير إنى أفضل مستنى؟"... وحيد زى لمبة عمود النور اللى على الرصيف التانى سيبنها والعة ليل مع نهار والكهربا تنحل سلكها لحد ما تيجى عربية الديوان العام فى أول كل سنة وتغير المحروقة من غير ما تتطفى الجديدة... يبص للناس الهيمانة فى الشارع شوية ويقلب عينه للسما الممدودة قدامه شويتين.. والخبط يهد باب شقته وهواه لسه سارح فى اللى ما بيجيش... سيجارة تشد سيجارة.. وشمس يطلع وراها قمر.. وصيف يجر شتا.. والزمن بياكل فى الحيطان الجير.. والمشهد ما يتغيرش... فإوعى تتوقع منى إنى حأكتب النهاية اللى ترضيك عنه !

*الصورة لعماد ماهر

.

2010-06-09T13:20:00.004+03:00

التقيته مصادفةً أثناء استغفاري بعدما صليت الضحى في الجامع، وجلست في أحد الأركان بين يديه.
رأى الكرب بادياً عليَّ، فاقترب ووضع يديه على ساقيَّ وسألني، "ممّا تشكو؟".
أجبت، "ثقل ما اقترفته وما علمته عن نفسي وأهوائي".
قال، "وأين أمسيت بما حملته؟"
قلت، "قريباً من هاوية تسكنها أشباح منتظرة".
ابتسم مجيباً، "لا عليك، ويعفو عن كثير"، ثم أشار، "اذهب ونمّ في المحراب إلى أن يقوم الآذان".
أطعته مصدقاً، أسندت رأسي وأغمضت جفني، وتمنيت لو أنني أحشر داخله، ظللت أفتحها بين ثانية وأخرى حتى امتدت أمامي الأرض وغبت عنها وغابت.

الرجل الآخر

2010-06-09T00:48:00.003+03:00

-استخرج من القطعة التالية-

بالأمس دعتهما إلى العشاء معاً.

اجتمع ثلاثتهم في مطعم فاخر في موعد العشاء وجلست قبالتهما، في البداية تبادلوا الأحاديث الخفيفة عن أحوالهم ثم غلب عليهم الصمت بعد قليل مرةً واحدة. ظلّ الثلاثة يتبادلون النظرات فيما بينهم، لكن تلك النظرات كانت تختلف من واحدٍ إلى الآخر، وعلى الرغم من أنها كانت تلقائية فيما تبديه من حركةٍ وسكون، فهي لم تبد تجاه أياً منهما ميلاً يفوق الأخر، ولم تحملق هائمة في وجه أحداً منهما دون الآخر، ربما إذا مرّ إنساناً غريباً عليهم ورآهم لظنّ أن الأجواء مشحونة بالتوتر بينهم، لكن هذا لم يكن وصفاً دقيقاً على أية حال.

كانت تشعر بالسرور والائتناس بلقاءهما، مع كل ذلك الجو الموائم من الأضواء الخافتة والروائح العطرية، فكرت أن هذه هي أصدق لحظاتها وأكثرها اكتمالاً منذ شهوراً عديدة مليئة بالحيرة وانشغال البال والشعور بالنقصان، وأنها تشعر بالاسترخاء والانسجام في هذا الموعد المتأخر كأنها تستمع إلى موسيقاها الكلاسيكية المفضلة في ساعة رائقة من يومٍ شاق، لم تستطع أن تفكر في أي شئ آخر بعيداً عن تلك السعادة التي غمرتها منذ بداية الموعد.

عندما أتى النادل بأطباق العشاء الرئيسية، شرعت هي في تقطيع شريحة اللحم خاصتها قبلهما مسرعة من جوعها، ألقت نظرة مودة سريعة عليهما بينما كانا يستعدان مثلها للطعام، حاول أحدهما أن يفتح فمه ليقول شيئاً، فرفعت شوكتها محذرة وأصدرت صوتاً انفجارياً قوياً "بَبْ !"، فأغلق فمه بسرعة يائساً وصمت مرة أخرى.

في نهاية الموعد اتفق ثلاثتهم على التلاقي في نفس الموعد من الأسبوع المقبل.

نزيف داخلي/ خارجي

2010-06-06T03:29:00.006+03:00

خيط الدماء القاني الرفيع الذي يجري من فتحة شرجي على الأرض ويلوث لباسي وجلبابي، والعرج الثقيل الذي أمشي بهِ في ردهة شقتنا، كان نتيجة اغتصاب عضوي الذكري الأحمق لمؤخرتي أثناء نومي.

السبت فات والحد فات

2010-06-02T07:08:00.004+03:00

استيقظت مبكراً، ثم عبرتني ماضية إلى دورة المياه بخطواتٍ ثقيلة.
كنت جالساً أمام التلفزيون أستمع إلى "يا أهل المحبّة" لمحمد عبد المطلب بأعينٍ بليدة، عندما خرجت كنت أظنها سوف تعود تجر أقدامها إلى غرفة النوم كعادتها، لكنها جاءتني وجلست فوق فخذيَّ وأراحت جسدها ورأسها فوق صدري وكتفي، لم أبد ردّة فعل، بينما استنشقت هي نفساً عميقاً واحتبسته داخل صدرها، ثم مدت أصابعاً إلى رأسي وداعبت شعري القصير.
توالت إذاعة أغاني عبد المطلب على الشاشة، لم تكن مناسبة تماماً لمزاجي العكر، لكنها كانت ألطف ما يمكن أن يقدمه الصباح لي. رفعت رأسها عن كتفي وتأملت وجهي بنظرة متفحصة لما لم تجد مني قبولاً وسألتني في استغراب، "مالك كده؟"، لم أبعد عيني عن الشاشة، فقط مددت يدي إلى رأسها وأملته إلى كتفي مرّة أخرى.
ظللنا صامتين هكذا حتى أطلقت زفرة حارّة في عنقي شعرت بها كأنها زخات من رصاص.

* العنوان إسم أغنية لمحمد عبد المطلب

2

2010-05-31T22:36:00.006+03:00

دعوتني إلى التجول معكِ.

كانت سحب الليلة كثيفة، تحتشد كأنها موشكة على الإنفجار والتناثر إلى قطعٍ صغيرة تتساقط في الشريط الضيق من السماء الداكنة فوق قمم الأشجار الممتدة، والأعمدة البرتقالية تبدو لانهائية في تتابعها على جانبي الطريق المفتوح أمامنا.

هل سمعتني وأنا أدندن مترنماً دور "الله يصون دولة حسنك"؟، وهل رأكِ أحد وأنتِ تتقافزين مرحاً أثناء سيرنا بين الفينة والأخرى؟

.. ربما لن أتذكر عن تلك الليلة إلا الهدوء الذي دثّرها.

1

2010-05-22T02:23:00.003+03:00

كنت جالساً على المقهى عندما سمعت نداءك الليلي، لم يكن صوتاً حقيقياً، بل كان أقرب إلى خاطر مرّ في ذهني، كان نداءً صغيراً هامساً. أدرت رأسي يمنةً ويساراً باحثاً عنكِ، فلم أجدك إلى جانبي، نهضت مترنحاً من مقعدي، وهبطت حائراً عن الرصيف إلى نهر الشارع الساكن، سمعت همستك تناديني في عقلي مرة أخرى، تطلعت في الجهات الأربع النائمة حتى تبينتك، كنتِ واقفة في قلب ميدان عند شجرة الصفصاف، جاءني نداءك الثالث أصداءً وكأنما كل الأشياء صارت تردده، شعرت بفمك الصغير وهو يفتر بالنداء الهامس، ابتسمت لكِ وأحسست أنكِ تردين عليها بأخرى مثلها أو أكثر اتساعاً.

مُكرر: البشارة

2010-05-20T19:24:00.001+03:00

.. وسيأتى من صلبك طفلاً جميلاً يحيلُ ببراءتهُ الكونَ إلى حدائقٍ وجنان ونهر من العسلٍ الذائبِ فى الحليبِ... بين النجباء هو الأطهر.. بين الطاهرين هو الأنجب.. ولذلك هو الأبقى.. منا ومن دهاةِ العالمِ وخبثاءهِ... كلنا زائل –ولو بعد حين-.. ويبقى فى الأرضِ نفسٌ طيبٌ يشهدُ له ولنا من بعدهِ يوم الشهادةِ.. لذا من دونهِ يصبحُ الكل قبض الريحِ.. يعرف من الألوانِ: الأخضر الذى ينيرُ الحكمة فى قرارة عقله.. والأبيض الذى يزينُ بهاء قلبه.. والأزرق الذى يضفىُ على روحه صفاءها.. والأسود الذى يحيده عن طرق الرحمن الرحيم.. تعرفه إذا ما فحصت صدره فوجدت زهرة العشاقِ، وثمرة الجائعين، وأغنية المنشدين، وتكبيرة للهِ همست فى أذنهِ يوم مولده.

الإنسان

2010-05-14T06:41:00.007+03:00

-إهداء إلى الغائب-

بعد انتهاء المحادثة، أغلق كل شئ ثم أطفئ جهازه ونهض عن مقعده شارداً، متجولاً داخل الشقة المظلمة، بعيداً عن الشاشة التي ظل جالساً أمامها ساعاتٍ طويلة لا يدري كم عددها، وأبطأ في خطوه كي لا يتعثر في أثاث المنزل. وعندما اعترضته مرآة مدخل المنزل، فزع وشك الذعر أوصاله لأنه لم يتبين صورته جيداً، فظن أن ذلك الشخص الذي يتجول ليس هو عينه حقاً.

مُكرر: وهم المرايات : "مدينة الجناين" نايمة !

2010-05-11T23:29:00.003+03:00

أمشى معايا شوية لحد آخر الشارع، مانتاش خسران حاجة، يرضيك برضه تسيبنى أمشى وحدى فى الساعة دى؟..
...
من يومين كنت معدى قرب نفس المكان، على الرصيف التانى، فى شارع القصر العينى، على الساعة اتناشر ونصف وخمسة، قول واحدة، كان الشارع سمع هس، وميدان التحرير ما فيهوش صريخ ابن يومين، والريح بتعدى فيه وتصفر صفير ما بيخوفش، وكانت حيطة البنك اللى معدى من جنبه من الرخام، رخام أسمر اللون، فى انكسارات صورة الشارع الفاضى، شفت على الرصيف التانى بنت ماعداش سنها حداشر سنة واقفة كاشفة صدرها وبترضع الماضى، الماضى المجروح بيرضع، يرضع نايم، وجروحه بتتلم وكأنها ما كانتش من الأصل، وفجأة من كل الشوارع خرجت ناس كتيرة، من "المبتديان" خرجوا، ومن "الشيخ ريحان"، من "المواردى"، من "أفراح الأنجال"، من "مجلس الأمة"، خرجوا لابسين بيجامات كستور ومنامات حرير، وكل واحد فيهم شايل ألواح خشب وشنط كبيرة مليانة، فى الشارع الفاضى كل واحد طلع مسامير وشاكوش، وبدأوا ينجروا الخشب فى هيئة سراير، ومصاطب، فتحوا الشنط وطلعوا منها ملايات ومخدات كبيرة وصغيرة بأكياسها، فرشوها ولما خلصوا، اللى ينام على ضهره، واللى يتمدد على بطنه، واللى يتقلب يمين وشمال، واللى يحط راسه تحت المخدة، واللى يحضنها، واللى يحضن مراته، فى النهاية، الكل نام -حتى عسكرى الحراسة جوه كشكه- بانتظام الأنفاس والشخير فى شارع القصر العينى تحت دش النور البرتقانى اللى نازل من العواميد.

من الموت

2010-05-09T21:26:00.005+03:00

كنت بأتمشى على كورنيش الشاطبي ولاقيته. مكان قديم من قزاز. قايم على البحر. كإنه كان كازينو قديم واتقفل، حديده مصدي، خشبه مسوس، وحروفه إسمه متاكلة. فضلت واقف كتير قدامه من غير معنى بأبص له ويبص لي..
دفعت للحارس النايم على الباب ودخلت، ما كانش فيه حسّ إلا صوت البحر المكتوم، وريحة التراب والطحلب الأخضر اللي مالية المكان، لفيت بالراحة ومسحت بإيدي على كل عواميده وقزازه، صوابعي حست كل شئ من عجزه بيئن. قدام البحر، ساكت سرحان وبأفكر..
الشمس طلعت شاحبة وبطيئة، بتتسحب ورا السحاب الماشي، بدأت بخيط أبيض متكسر، الأزرق الممدود قدامي اتفرد سلاسل دهب، عيني تاهت زي مركب تاهية، وحسيت في اللي بأشوفه بزغلله. دوّرت نفسي حواليَّ، الأرض مفروشة نور، وأصوات المصّيفين على الشطوط جاية لي رايقة، كل شئ في هدوءه انسيابي وبسيط.. حتى الموت، هيكون مريح ولو بان لك لحظتها عنيف.
حسيت بجمال الجملة في بالي وحبيت أقولها بطريقة تانية بصوت عالي، ابتسمت ابتسامة خفيفة وقلت "أنا عارف إني لو..."
كانت هناك إيد ممدودة في ضهري بمسدس. بتكة طلقة رصاص. طاخ.

ساعتها أدان الضهر ادن والناس كانت بتتمشى على الشط زي عادتها.

مُكرر: حمّام الهنا

2010-04-17T12:18:00.001+02:00

أجلس عارياً على الأرض، أمد يدى إلى مفتاح "الدش"، تنهال علىّ المياه الفاترة كالشلال، أجلس فى وضع القرفصاء ضاماً رجلىّ إلى صدرى، محيطاً ذراعىّ حولهما، وينام رأسى على ركبتىّ، أنتظر فتأتينى، تدخل وتغلق الباب خلفها، تمسك بالصابونة بيدها المكتنزة ذات الأساور النحاسية، ثم تنحنى علىّ، بأصابعها تنزلق فوق مسامى، وتدعك ظهرى المكشوف، تدعك، تدعك، وتدعك، حتى يصير جلدى إلى اللون الأحمر، تهيل الماء على جسدى، فأحس بالطهارة من التراب والطين والخطايا والآلام التى تتساقط مع قطرات المياه، تصبّن ظهرى مرة أخرى، من أعلى رأسى إلى أسفل مؤخرتى، تمسك بالليف وتكتب اسمها واسمى دورٍ بعد دور، يلتهب الجلد احمراراً، لكنى فى كل دور أصير شفافاً، روحاً لا بدناً، ترفع يدها المكتنزة الرقيقة إلى أعلى انهاكاً، فتهتز الأساور النحاسية فى رنين مثير، لتترك الماء ينسال فوقى يغسلنى.

عين على الطاولة

2010-04-16T14:54:00.004+02:00

كان الضوء الأبيض يسقط على الموجودات، بينما كانت الظلمة تحيط بمركز الحدث. هو.. كان يلهث في غضبه، تدافعت صور عشوائية أمام ناظريه وكلمات حمقاء في فمه، لكنه ظلّ صامتاً محدقاً في سطح الطاولة، أمّا هي فكانت حائرة ولم تدر ما العمل في ثورته هذه؟، وضعت يداً مترددة فوق يده الموضوعة على الطاولة، لم تلحظ ارتفاع صدره باللهاث المتزايد، جذبت يده إليها بين راحتيها ثم قالت برفق:
- إيه ؟، بالراحة على نفسك، عايز تقول إيه؟
رفع عينيه المشتعلتين بسورة الغضب، وجذب يده بعنف من بين يديها هاتفاً:
- إيه اللي بتعمليه ده !؟، شيلي إيدك..
أزاح الطاولة من أمامه ثم نهض وغادر المكان كله، ظلّت تنظر في دهشةٍ إلى كرسيه الشاغر، ثم أشاحت بوجهها بعيداً، فكرت أنه سوف يندم لاحقاً عندما يعيد التفكير فيما حدث الآن، وربما لا ؟، استطاعت تبدد دمعة بغلق عينيها قبل أن تنزلق فوق وجنتها، ثم نهضت وتركت المكان كله مثلما فعل، بينما بقى الطاولة والكرسيان منتظرين في موضعهم حتى حلّ إظلام المشهد العنيف عليهم.

مُكرر: توهة

2010-04-14T16:57:00.002+02:00

بيحكوا عن عيل صغير ماسك فى إيد أمه وماشيين فى سوق شحاتة الجمل رايحين لملك الغابة -حسب كلامها-، وقفت فجأة تشترى حزمة بقدونس من عند الخضرى، رمت إيده وقالت له "إياك تتحرك من هنا يا واد"، شوية والوقت طال، فجأة من غير ما يدرى، على بال ما اتلفت وراه ثوانى، ووطى يجيب بلية لاقاها على الأرض جنب أقفاص القوطة، شد أمه من إيدها بيستعجلها، لاقى نفسه مسك إيد ست تانية، نده "ماما"، ردت عليه "أنا مش ماما"، قعد يبص ويلف حواليه أكتر من مرة، حاول يفتكر كانت لابسة أنهى طقم هدوم وكانت إيه ألوانه ؟، الناس اللى اتلمت حواليه تسأله عن إسمه أو إسمه أمه أو عنوان بيتهم، لكن الفزع خلاه ينسى كل حاجة.. حتى إسمه، الناس اتفرقت من حواليه بقولة "لا حول ولا قوة إلا بالله"، جرى من بين الناس يمين وجرى شمال، شوية بشوية بدأ يحس إن أمه تاهت منه، كان خايف عليها، عض صوابعه وفكر فى إنها مش حتعرف ترجع البيت من غيره، ولا هو هيعرف يرجع البيت من غيرها، فكر فى إن زمان ملك الغابة أكلها عشان راحت له من غيره، الناس سابته رايحة وجاية فى طريقها مش واخده بالها منه كأنه دخان أو كان موجود من زمان فى نفس المكان، دلوقتى تلاقيه كبر زى الشحط واقف فى نفس المكان سادد الطريق فى نص سوق شحاتة الجمل حاطط صباعه فى بقه عامل يسأل لحد دلوقتى "هى ماما تاهت فين... تاهت فين ؟"

نهار مضروب

2010-04-02T08:52:00.006+02:00

دخلت من مكتب مأمور النقطة على مكتب الأمين اللي كان بيخلص ورقي، كان لابس راس الإله آنوبيس أو الإله تحوت، معرفتش أفتكر وقتها بالظبط، بس فكرت أرفع له إيدي وأقسم له "أنا لم ألوث ماء النيل"، من غير ما يبص عليّ قالي من جوه الراس المقفول، "ما تبقاش تصطاد هناك تاني بدقنك دي عشان دي فيها حبس"، بصيت له واترسمت على وشي ابتسامة استهزاء خفيفة، رمى لي بطاقتي على طرف المكتب وارتاح على الكرسي ومدّ نفسه عليه، وأنا خارج من نقطة البرج اتحسرت على السنارة وكيس الطعم اللي اشتريته من الميدان ليلة إمبارح واتنهدت، اتمشيت لحد المحطة، كنت عشان أهدى من البهدلة اللي حصلت لي على ريق الصبحيّة، قعدت أدعي لجدي بالرحمة، لما وصلت المحطة طلعت أول عربية التلفريك لاقيتها في وشي، رغم إن العربية كان أغلبها فاضي، رحت قعدت جنب واحدة ست في الأربعينات، كانت اليافطة العريضة اللي جنب شباكي منقوش عليها "محطة برج الجزيرة"، استنينا لحد ما طلع السواق قطع لنا التذاكر، وقعد على كرسيه وسحب دراع العربية، فضلت العربية تزمجر وتزيّق لحد ما طلعت، لما بقينا فوق النيل، خبطت على كتف اللي قدامي وسألته:
- هو بيروح على فين ؟
لما بصّ لي شفت عينيه سوده بسّ حواليها حلقة زرقا كأنها عتبة بتفصل بين السواد والبياض، رد عليّ:
- بيخلص في روض الفرج
هزيت راسي، وسألته تاني عشان أبص في عينيه:
- وهي الساعة كام دلوقتي ؟
- الساعة حداشر ونص وخمسة
الست اللي جنبي فتحت شنطتها وطلعت إبرتين تريكو وبكرة خيط وقاعد تشتغل وتنشغل فيها، بصيت من الشباك، لاقيت فردين حمام بيض بيتسابقوا جنب العربية الطايرة، ما كنتش طايق أتفرج على النيل ولا أبص من خنقتي منه رغم الشمس الطالعة اللي سطعت عليه، مديت إيدي في إيد الست وأخدت منها الإبرتين والكوفيه، وقعدت أشتغل فيه بدالها لحد آخر السكة.

مُكرر: زنّ

2010-03-30T17:59:00.001+02:00

-وإقروا الفاتحة للشيخ زكريا أحمد وجدي سيد السويسي-

أول ما نزلت محطة مصر، قلبوا يابا الصبح الواضح ليل غميق، ليلة مقطوعة ومحطة مقطوعة، وأنا مقطوع بيَّ، ملطوع أسبوع في مكاني، جنبي شنط السفر، وتعدي حواليَّ كل أصناف خلق الله، بهوات موظفين، صيّع شيالين، عواجيز أنتيكات، عيّال شياطين، وأنا في مطرحي يابا، في وسط المحطة، ثابت متثبت، عيني تايهة، وفي ودني صفارة القطر، كما ريح صفرا، أو ناي إسود، يخبّط فيَّ الرايح والجاي، وما عليهش إلا كلمة "آسف" و"لا مؤاخذة" و"ما تحاسب" و"يا أعمى"، ولسه واقف زي نسيت حاجة وبأحاول أفتكرها بلا فايدة، زعيق زعيق زعيق، زحام زحام زحام، قلبي هيخلص مني يا ناس !!، بأدوخ وهأقع !!، وألاقيهم يابا قلبوا العصر الحيران ليل كحلي، وكل القطورات رجعت صندوق الخزين والبيات، وولعوا كل كهاربهم في عيني، زي ألف شمس دشدشوا دماغي روسيات ونبابيت ، ومحطة بقت فاضية إلا من صوت الجنّ والعفاريت، ملطوع مقطوع بيَّ، زي لمبة من دولم متعلق بسلك رفيع منحول، حسست بودني ومشيتها علي الحيطة، جسيت صوت زنّ ورنّ، وكعب جزمة بيزيّق، ودبدبة حيّاني، نغم قديم، نَفَس راسي، أتاريه يابا صوت عودك بيتسحب من السما عايز يونسني.

دكّة في محطة

2010-03-25T22:09:00.001+02:00

الحياة لما تقعد في أوضة، كل الأوض بحيطان، كل الحيطان بتخنق، بتعمي، بتخرس،
البيت رغم الشتا كله حبال مشانق متعلقة، بخار ميّة يطفي العيون ويعصر الرقاب،
سابت الكنب الحزين الناعم، وخرجت بره بيتها طيف من نور، وتلاقي مسلكها لحد آخر الشارع.
..
هسْ هسْ .. اسمع
الجو هيرقص، ويطبّل، ويصفّر، شكشكة الخوف وعضة البرد في شارع وحلة، والليل كحلة، بتظن لأول وهلة إنه ده بيتها، كان حلمها الصغير إنها تنام على أرض الشارع رافعة راسها، وشها في وش الليل، ونجومه في عيونها بتبرّق، بتغمز، بتغمّض، واللُمض ألف نجمة منوّرين في الضباب الحيّ، تفتح إيديها في وشهم وتفقلها وكأنها بتملك كل شئ فيهم، وتشوط الحصى برجليها، فيجري بعيد، ويفضل يجري من غير نهاية.
عند آخر الشارع عدوا السهرانين متكلفتين في كوفياتهم وبلاطيهم، بيمدوا ويختفوا في الضلمة، إلا الكنّاسين بيتمرجوا بمقشاتهم خطوة قدام، وخطوة ورا في حركة رقص.
إسم محطة المترو بارز بحروف كبيرة، ومقلة نص الليل فاتحة أنوارها تكشف ساحة الشارع، والمحمصة تدور بنارها تسّوي السوداني والحمص، جت ريحة سخنة في خياشيمها فتحت نفسها، اشترت لروحها قرطاسين، مشيت بيهم ودخلت المحطة.
قعدت على الدكة الأخيرة وفضلت مستنيّة أول قطر.

.. الجولة الثانية

2010-03-24T23:12:00.005+02:00

... كنت أراقبها جيداً من أعلى المدرج في منتصف المحاضرة، لم تكن تحادث أحداً، وكان يبدو عليها الشعور بالملل، في لحظة ما رفعت رأسها متطلعة كأنها تشم أو تسمع شيئاً بعيداً، ظلت تدير رأسها يمنةً ويساراً، ثم قامت من مجلسها وصعدت فوق المقعد - نظراً لقصر قامتها بين زملائنا- بين الطلبة والأستاذ الجامعي، ومدت ذراعها جانبها وأخدت تهز يديها وقالت:
- هش هش هش هش هش هششششششششششش
ظلت تفعل ذلك حتى سكت الأستاذ وسكتت الثرثرة المنتشرة في المدرج تدريجياً، تطلع الجميع إليها مندهشين من فعلها الغريب والوقح، كانت هناك ثلاث فتيات يثرثرن معاً جانباً، فهتفت فيهن:
- بس !
فسكتن.
فتح الأستاذ فمه معترضاً:
- إيه ؟ أأ...
- الله !
ثم استدارت إليَّ وأشارت بسبابتها وإبهامها وزأرت قائلة:
- أنتَ، عايز تقول حاجة ؟
أخذتني المفاجأة، وأشرت إلي نفسي متعجباً، هززت رأسي نافياً وأجبت مستنكراً:
- مين؟ أنا؟.. لأه!.. أبداً!.. إزاي؟ أقول إيه يعني؟
ضيقت عينيها ريبةً ثم ابتسمت ابتسامة ذات مغزى فبادلتها الابتسام الماكر.

أعمل واحد عبيط

2010-03-24T09:16:00.001+02:00

ذات نهار، ذهبت إلى محاضرتي مبكراً على غير العادة، لم أجد أحداً قد وصل بعد، حجزت لنفسي مكاناً في أول مقعد واضعاً حقيبة ظهري في المكان الذي اختره، ثم تركت المدرج الفارغ وخرجت للتسكع قليلاً حتى ميعاد المحاضرة.
عندما عدت إلى المدرج وجدت المدرج ممتلئاً بالطلاب، حمدت الله على نصاحتي لأنني حجزت لنفسي مكاناً في المقدمة، لكنني فوجئت بزميلتي زينب تجلس في نفس المكان الذي اختره لنفسي في المقعد، وقد امتلئ المقعد إلى آخره ولم يبق موضعاً إضافياً، ووجدت حقيبتي فوجدتها ملقاة على الأرض مهملة أمام المقعد الأول.
ينبغي لي أن أقول أن مثل هذه الحركات السخيفة معتادة بين الطلبة في الجامعة. أما زينب هذه فهي فتاة قمحية قصيرة، بالنسبة إليَّ بالطبع، شعرها بني اللون ناعم، ذات وجه مستدير وأنف صغير وشفتان رفيعتان، وتحمل في عينيها الكثير من الصلف والكبر واللامبالاة.
كنّا نتبادل المشاعر السلبية بيننا، وقد تعودت على أفعالها الاستفزازية أثناء اصطدامنا اليومي ببعضنا، حملت حقيبة ظهري من فوق الأرض صامتاً وأنا أوجه لها نظرات الحنق، سألتني "إيه؟، اتضايقت؟" بلهجة من يريد شجاراً، في نصف ثانية قرأت فوق شفتيها إجابة "اتفلق" إذا ما قلت لها "أيوه، اتضايقت"، عبرتها بينما كنت أجيب بلامبالاة صادقة "لا، عادي".. وصعدت المدرج راجعاً إلى آخر مقعد فيه.

ملك الترسو

2010-03-23T20:39:00.002+02:00

دخل البطل في الفيلم المعروض في السينما الترسو يطيح يمين وشمال، فوقه وتحته، اتلموا عليه من كل حتة، مسكوه وقيدوه في الكرسي بالحبال الخيش، حاول يفك نفسه مرّة، واتنين، وتلاتة، فضل كتير بيحاول، الجمهور القاعد قام في القاعة الضلمة، وصفّر، وزعق، وابتدى يخرج..
البطل المتكتف طلب نجدة اللي فاضل من الجمهور، اتحرك الجدعان منهم ونطوا جوّه المشهد، ضربوا الأشرار، وفكوا البطل من على الكرسي وخدوا بإيديه، اتلموا حواليه وسلموا عليه واحد واحد، كلهم في الصالة نزلوا بيضحكوا ويهزروا مع بعض، وخرجوا من باب السينما.
وقف البطل قدام السينما متاخد من منظر الشارع الزحمة، الناس والعربيات والعيال السريحة، أنوار المحلات الفاتحة في عينيه وزعق الزحام الطارش في ودانه، خد خطوة على قدام، جاله موظف قطع التذاكر من الشباك وقاله، "أنت إيه اللي خرّجك من جوّه !"، بقى متسمر مذهول في مكانه والناس واقفة وراه، عدى أتوبيس الهيئة في وشه وزمّر، رجع خطوة لورا، خبطه صبي سريّح بملاية مليانة هدوم على ضهره بيجري بيها من البلدية، شاف عساكر بتنط من على ضهر عربية نقل بتجري وراهم، خد له خطوتين كسكسه، بص له موظف قطع التذاكر من ورا القزاز وضرب كف بكف متعجب، "أنا مش عارف إيه اللي طلعه من الفيلم ؟"، ساب البطل جمهوره اللي كان وقف معاه ودخل، عدى بين كراسي الصالة الفاضية، وطلع المشهد وقعد على الكرسي، حاول أكتر من مرّة يربط الحبل على جسمه تاني ومعرفش !!

إبن الإنسان

2010-03-06T10:35:00.001+02:00

تروي أمي هذه القصة:
ذات مساء، صعدت أمي الميني باص المتجه من محطة بولاق الدكرور إلى محطة ميدان الفلكي – باب اللوق، كانت تحملني بين ذراعيها، وقتها لم يتجاوز سني عامٌ كاملٌ، وكان الميني باص ممتلئاً، فظلت واقفة حاملة إياي طوال الطريق، حتى عرض عليها رجل بلدي يرتدي جلباباً وعمامة جالس بجانبها في الردهة أن يحملني عنها، ترددت قليلاً ثم وافقت، ظلّ الرجل يداعبني إلي أن ابتسمت في وجهه، سعد بذلك كثيراً وأخرج من طيات ملابسه ربع جنيه ثم دسّه في ملابسي..

...

كلما تذكرت هذه القصة تخيلت نفسي رضيعاً محمولاً في شارع السادس وعشرين من يوليو ببولاق ليلاً بين ذراعي أحد الناس بينما تلتف جماهير النساء والرجال والأطفال والشيوخ حولي، ويمتد أمامي وخلفي طابوراً عريضاً منهم بانتظار مشاهدة طلعتي البهيّة !

خالد

2010-03-06T10:22:00.002+02:00

(1)
يدخل شارع القهوة متمهلاً يتبعه كلب أسود أجرب، يسحب كرسياً ويجلس وحيداً ويطلب الشاى ويتجاهل المعارف الجالسين ببرود كما يتجاهلونه، والكلب يقعى تحت قدميه وينام، يمر عليه فلان ويجلس مثرثراً دون رد، وعلان يمر ويلقى السلام ماداً خطواته من أمامه رهبةً، وهو على كل من هذا وذاك، يسمع ويهز رأسه ويتأمل وجه السماء، يشرب شايّه وينهض صامتاً هو والكلب دون ربع كلمة.

(2)
وفى ليلة لا تختلف عن باقي الليالي، كان جالساً وسط جماعته على المقهى نائماً وشخيره الرتيب يزيد الليلة ضجراً، لكن الجالسين كلهم كانوا يتكلمون ويثرثرون من غير حرج !!، فجأة !، أفاق من نومه بلا سبب، رفع رأسه وهزّه يميناً ويساراً ثم مضمض فمه بالماء وبصقه أسفله، ثم انتظر إلى أن سادهم الصمت، وبمجرد أن انتهى منها، خفض رأسه على صدره صامتاً ولم تمر ثلاث دقائق وراح شخيره يملأ الكون.

(3)
المرئيات مهتزة كعادتها لحظة الإستيقاظ، أبعد الغطاء الرمادي عن جسده بحركة واهنة من قدمه، ثم نهض معتدلاً مستنداً على ذراعه فى إصرار بطئ، تحسس ملابسه التي لم يغيّرها منذ أيام بحثاً عن موبايله، أراد إرسال رسالة "كلمني.. شكراً" المجانية لصديقه الطبيب الذي يطارد أبيات الشعر فى جنبات وأركان عنابر المرضى بالقصر العيني، دسّ أصابعه فى جيب الجينز الضيّق ولم يجده، وتكاسل عن البحث عنه فى أي مكان آخر حوله، لكنه أخرج عدّة أوراق نقديّة ضئيلة لا تكفى إلا لمواصلات اليوم الموعود وثمن وجبة إفطار واحدة تمنحه القدرة على التحرك المتزّن، حاول أن يتذكر أيّة تفاصيل غير التي حفظها عن ذلك اليوم لكنه لم يستطع، كل ما يعرفه أنه بعد ثلاثة أيام سوف تقبض يده أوراق نقديّة أكبر من تلك التي فى جيبه، فشل في تحديد الوقت بالنظر إلى الضوء المتسرّب من النافذة، لم يعرف إن كان الضوء ربانياً أم كهربائياً، خمّن أنه العصرّ الآن، الأصوات الصاعدة من حركة الشارع أسفل البيت بددت شعوره بالوحدة والخوف، حلّ حزامه من حول خصره ثم رفع بنطاله المتسخ إلى أعلى وأحكم إغلاق الحزام هذه المرة ضاغطاً بشدة على بطنه الخاوية منذ صباح الأمس، لا يفكر إلا بشيطان الجوع الذي يزحف متسللاً على جسده النحيف الهزيل، وهو يزحف هارباً منه بنوم إجباري ملئ بالأحلام عن الركض مع نخل يجري فوق صفحة جدول نيلي صغير، وكان كلّما شعر بفراغ معدته قبل النوم حلم بالركض بجانب الجداول النيلية، ذكره الماء بعطشه الذي يجزّ عنقه بسكين ناري، وفكر أنه لو استطاع القيام ليشرب فلسوف يبحث عن موبايله المفقود، خرج رنين الموبايل من مكان ما خفي قريب، فصار يلقي بالأشياء في هوس بعيداً بحثاً عنه، ضغط زرّ التحدث دون أن يرى اسم المتكلم، وفي نهاية المحادثة ألقى بالموبايل بعيداً في يأس من احتمالات تغيّر حظه اليوم، حتى إنه نسى إرسال الرسالة المجانية إلى صديقه الطبيب كي يخرجه من الغرفة الليلة، تقلّب على جنبه عائداً إلى النوم، وهو يشد الغطاء الميري الثقيل إلى جسده، أصدرت أمعائه أثناء تحركه أصوات مكتومة، ابتسم رغماً عنه، فقد اعتقد أن عصافير بطنه قد ماتت جوعاً منذ فجر اليوم، لكن جوقة العصافير تلك أثبتت أنها لا زالت حيةً تصرخ من وقت لآخر مثله.

(4)
كنا نسافر سوياً
من ليل قبلي إلى ليل بحري
عابرين زحام القاهرة
وكان يتمنى في قرارة عقله الإسفنجي
لو طار الأتوبيس..
وارتطمت ألواحه النحاسية
بجدران الخرس الخرسانية
فيمزق بشق أبيض نهاري
لوحة السماء المظلمّة

(5)
ضباب رقيق يغشي فضاء الشارع، وبناياته تتوارى تدريجياً وتتحول إلى أجسام هائلة كائنة بلا أيّة تفاصيل، وأسفلت الشارع الأسود يبدو فى لمعانه كالمرآه بعد يوم مطير، تتشكل برك موحلة صغيرة على سطحه المتعرج، ثرثرة فارغة وجدل بلا معنى وضحكات ميتة تخرس بقوة البرودة الشتوية، وتبقى رائحة السِكر في الأنفاس المتجمدة، صقيع زاحف مقابل دفء منحسر، فقد الرفاق مقدرتهم على تحديد الإتجاهات بمجرد أن خرجوا من المقهى، فظلوا واقفين في مكانهم حائرين، تضاعفت طبقات الضباب حتى ملأت المكان، أحسّ بوٍحدته فجأة، انفصل عنه رفاقه وضاعوا دون وداع، سار بضعة خطوات مترددة، ارتقت مشاعر الخوف إلى عقله، خطر له أن يجري حتي يخرج إلى شارع أوسع أو ميدان أرحب، لكنه توقف ولزم مكانه، فقد تكاثف الضباب فى الهواء حتى انعدمت الرؤية.

(..خاتمة..)
ويقوله: يا ليل اسكت شوية عايز أكتب.. والليل مابيسكتش
يقوله: يا ليل اخرس.. والليل ما بيخرسش
وقالك إنه طلع مطوته وفتحها فى حركة استعراضية وشق بيها بطن الليل
فضل باصص له في السما شوية.. وبعدها كمّل كتابة على الورق..

مُكرر: صفحة من اليوميات : يوم مع نعيمة عاكف..

2010-02-28T03:06:00.001+02:00

... تاني يوم ، كان أجازة، خدنا بعضنا ونزلنا نتمشى في شارع مراد ، نسايم الصباحيّة روقت كل اللي كان بينّا، نعيمة كانت بتمرجح إيديها وتفرد دراعاتها في الهوا من إنبساط روحها، وتلّف دراعيها حوالين كتافي وتحضني من جنبي بشوقها المكبوت، حاولت إني أكون متزن ووقور في مشيتي معاها عشان الناس ما تبصّلناش قوي، بسّ من جوه ما كنتش قادر أطيق إننا نرجع للبيت ونقفل بابنا علينا، أسبوع والشقة مكتومة وضلمة والتراب مغطيها، الشوارع كانت غريبة كأنها صبح العيد، زحمة .. بسّ زحمتها هجران، شوية وحسيت إن نعيمة ما عادتش جنبي
وقفنا تحت صفصافة مفرّعة زي الشماسى وقعدنا على الرصيف العريض ومدينا رجلينا في نهر الشارع، ريحت راسي لفوق وشفت الشمس نازلة من بين الورق والغصون بتسمح على شعرها وتطبب على ضهرى، ما لحقتش أغمض عيني وأتمنى إن أصحى الصبح ألاقي نفسي شجر على النيل، إلا إنها قامت فجأة تعدل همومها .. وخدت خطوتين بعاد وقالت لي "يالا"، لكني فضلت قاعد أبص على مشيتها، الدلع المتداري في عقصة كعوبها مهما حاولت تمشي بإستقامة، الرقص المحسوس في حركتها الهادية، خفة صوابعها لما بتلمس الأرض بعد السرير... قمت وراها وكان في نفسي إني أشيلها على صدري زي النونو
لما حست بالتعب قالت نرجع، مشينا بنجرجر رجلينا على الأرض ساكتين، شمس الضحى بدأت تحمى وتشد حيلها علينا، إحنا ساكنين في شارع السوق، عينيَّ دايماً لازم لها لو رايح أو جاي تصبح وتمسي على الكل، الشاري والبايع، خضري وفكهاني، صبيان ومكرمشين، طوب الأرض، الطوب اللي قوم العمارات قديم وجديد، الوحل اللي عمره ما ينزاح من وش الأسفلت، كأني لسه ساكن جديد إمبارح، حطت إيديها في دراعي فجأة بعد ما كانت سرحانة طول ما إحنا راجعين، وسألتني "هو أنت ليه بطلت تكتب ؟ "، حاولت أفضل ساكت، قلت "ما بقاليش نِفس أكتب"، رجعت تسأل تاني بخباثة "مالكش نفس ولا مش عارف ؟"، قررت إني ما ردش عليها ، "يعني سكت !!"، "مش عايز أرد، هو بالعافية ؟!؟"، سكتت وشالت إيدها من دراعي بعد شوية
لما طلعنا البيت، كنا مهمودين، هي اترمت على الكرسي، وانا وقفت في نص الصالة محتاس، حتى ما كانش لينا نفس نحضّر الفطار، قلت لنفسي مش لازم اليوم الأجازة يبوظ، وأنا بأقفل القزاز على الشيش، شفت صورتها اللى معلقها وهي واقفة على ضهر الجمل فاردة دراعيها ووراها الهرم الكبير، قلت وأنا لسه بأبص في الصورة "أنتي عارفة أنا بأحب الصورة دي قد إيه ؟"، حطت وشها بعيد وقالت "آه .. كان زمان"، النور الداخل من الشيش عدي في صورة وحلاّها أكتر وأكتر
هي استغربت قوي لما ركعت على ركبي ونزلت تحت السرير، شديت كرتونة صغيرة وفتحتها وأخدت منها ورقة ومديتها ليها، أخدتها وقعدت تقراها بصوت عالي، اتوترت في مكاني وما بقيتش عارف أروح فين من صوتها، ولما خلصت رجعتها وهي بتقولي "حلوة .. عجبتنى"، دسيتها في قلب الكرتونة، زقيتها تحت السرير تاني بسرعة، سألتني "دي آخر حاجة كتبتها ؟"، قلت لها "تحبي تلعبي كوتشينة ؟"، لعبنا دورين وخسرتهم، ما كنتش عارف إذا كنت خسرتهم بمزاجي ولا هي اللى كسبتني، رفعتها على السرير في حموة الدورين ونمنا مع بعض مرتين، الأولى بركت فوقيها، حطت عينها في عيني بتحدي، بعدها رحنا في تقييلة الضهرية براحة من غير ما ناخد بالنا
لما صحينا كان كل حاجة ارتاحت وهديت، ريحة العصارى منتشرة في الأوضة، الشاي واللمون والنعناع وبرغل الحَمَام، قلت لها هأطلع أشقر على الحَمَام ووافقتني، بس اشتطرت قبل الطلوع إني أحكي لها حكايتي مع رباية الحَمَام، قلت لها إن الحكاية دي سمعتها ميت مرة وأنا حكيتها لها مليون مرة بألف طريقة، لكنها أصرّت، قلت لها إن البنت اللى شاغلتني في الجامعة هي علمتني حبّ الطير، كانت كل يوم الصبح قبل معاد المحاضرات أجي أنا وهي ونقف قدام بوابة جنينة الحيوانات ونستنى، ما كنتش عارف هي مستنية مين ولا هي عارفة أنا مستني مين، نفضل نبص فى الساعة ووشوش الشجر والناس لحد ما ييجي معاد المحاضرات ونمشي من غير ما حد ييجي ياخدني أو ياخدها، اتعرّفنا ودردشنا وضحكنا كتير، بسّ عدت سنين قبل ما نفهم إن المعاد كان بينّا إحنا الاتنين..
طلقت الحَمَام طاير في حلقاته وبراية كبيرة في إيدي مرجحتها يمين وشمال، وسرحت في حاجات كتير، في بطن باطها الطري لما بتسيبني أمرمغ راسي ووشي فيه، في ريحة الهدوم والملايات بعد النوم، في طعم فنجان القهوة اللى بتسقيهاني بإيديها أيام ما بتيجي، تهنين أوجاعي في صدرها، حاجات لما ترفرف في الذاكرة أتمنى لو أفضل قاعد في كنفها ما أتحركش بعيد، خوفي تروح منى وتسيبني، قلقى لما أكتب ما يعجبهاشي، لما أضحكها بنكتة تجيي من بُقى بايخة ورزيلة، خوفى أصبح وأملس مكانها على السرير ما لاقيهاش أبداً، عارف مش هيكون ليها قلب تقولي "مع السلامة" و"خلي بالك من نفسك من بعدي"، من بعدها بياض يخوّف ويقشعر بدني، في ظلها الوردي والخمري يعيش ويتنفس وما يموتشي
اللى فاتونى دايماً ما عرفتش ليه فاتونى ولا إمتى ؟، زي أطياف الأحلام الغريبة عدوا، زعلت لما حاولت أنساهم وزعلت أكتر لما الدنيا علمتني نسيانهم، فين الغلط ؟، كان منى ؟، طب إزاي ؟، اتشعلقت زي العيال في ديولهم ومشيت في حبّاهم، راحوا وفاتوني من غير ما ياخدوا السؤال، ومن غير ما يسيبوا الجواب، وفضلت طول الوقت حاير فيَّ وفيهم
رميت نظرة لتحت في شارعنا، لاقيت نعيمة خارجة مرّوحة من راسه وتختفى في لخبطة الناس بالعربيات، كانت هأناديها وحسيت حسي اتخنق بشلقة حجر في الزور، حاولت أستعيد كل تفصيلة حصلت في اليوم تفرّح قلبي وتخرجه من أحزانه، مديت عيوني لقدام ولاقاني النيل في عيوني، كان الليل بدأ يتسحّب من بعيد على ضهر السحاب، غبت في المشهد ساكت، وشفت المراكب الكبيرة والصغيرة عايمة وحدانية في المرواح والمجي بتنوّر زي مقامات الأوليا في الموالد على وش النيل

لنتحدث قليلاً عن هذا الظلام

2010-02-24T12:55:00.002+02:00

Cynophobia: is the abnormal and irrational fear of dogs

"Wikipedia "
*

قاعد على الأرض ومش قادر أقوم، الأوضة بتوسع وتضيق على كيف كيفها، لطشات النور من الشارع بتجري على الحيطان، وتعدي من بين الأشياش ترسم سطور زي سطور الكشاكيل والكراسات، أقرا عليها حدوتة قبل النوم..
كان مرّة فيه أميرة ركبت حصان أبيض وخرجت تدور على فارسها، بس الفارس كان خرج من الحدوتة كلها، ودخل جوّه حواديت تانية بيدور فيها على حصانه اللى ركبته الأميرة، آخرة المتمة الفارس تاه ونسي الحصان والأميرة والحدوتة الأصلية..
أنا عايز أروح لستي في الشرابيّة، أنا عايز أتفرّج على فيلم السهرة عند الفكهاني اللي قدام البيت، أنا عايز أنزل الحوش أشوف فقرة الساحر أوز والأراجوز، أنا عايز… الكلاب ! الكلاب السودة بتنبح ! هَو هَو. أنا مش بأخاف من الكلاب. لأه. الكلاب طيّبة، حنونة، زيها زي باقي الحيوانات اللى بتمشي على الأرض. الحقيقة. الكلاب هي اللي بتخاف مني. هَو هَو. الإنكار مفيد، الإنكار بيساعد أحياناً .. وأحياناً لأه. خليني أتخيّل إنه بيساعد، لأني جرّبت كل حاجة وتعبت. هَو هَو. الفارس ! الفارس خرج من كل الحواديت بعد ما خلّصها وأبطالها قالوا له "توتة توتة خلصت الحدوتة"، بس ما عرفش يرجع للحدوتة بتاعته، ولما عرف يرجع يا حسرة ما لاقش لا الأميرة ولا الحصان بس لاقى كلاب كتير مخيفة ! هَو هَو.
الكلاب بتشمشم عقب الباب. أنا مش هأصّرخ وأقول يامّه. أنا هأستنى النهار يطلع.. أيوه أنا أحسن حاجة هأعملها دلوقتي إني أنام. هأحاول أنام. الكلاب ! الكلاب برّه هتقطع مصاريني والنهار لسه بعيد.. خليني قاعد على الأرض. يا ماااااماااااا.. يا ماااااامااااااا هويداااااا.. يا ماااامااااا..
من الشباك.. هَو هَو.. للبلكونة.. هَو هَو.. لبير السلم.. هَو هَو.. النور مقطوع.. هَو هَو..

من قصاقيص الأقاصيص

2010-02-21T14:54:00.003+02:00

كانت بنت مجنونة مجنونة، في روحها كلام كتير مش بتقوله لروحها، يوم ما كانت زهقانة من وحدة أسرارها على السرير، عايزة تنام ومش عارفة تنام، فتحت الدرج وطلعت مقص، وجابت شنطتها وطلعت دفتر تليفوناتها، وفي كل صفحة قعدت تقصقص الأسماء، حسن، زينب، فتحيّة، عائشة، هدى، نعيم… لحد ما الدفتر خلص.
نفخت صدرها من الملل، طارت كل الأقصاقيص جوّ الأوضة، ونزلت منتورة في كل مكان زي ميّة المطرة، زي زينة يوم عيد الميلاد، طفت البنت الأباجورة، وفرشت غطاها عليها، لكن نفسها اللي طيّر الورق اتعلق فيه، اتلخبطت الأسماء، كلها فيها روحانيّة من نفسها.
اتخانقوا واتعابوا، اتخاصموا واتصالحوا، عيّطوا وضحكوا، وفضلوا يتكلموا ويرغوا، والبنت اللي كان كلامها مش بتقوله لروحها ما عرفتش تنام من كتر ما اتقال ليلتها !

دكّة في جنينة

2010-01-18T04:10:00.001+02:00

عريان الشجر عريان، طريق مرصوف الريح بتتنفس فيه وتكنس بنفسها الورق الأصفر، والشمس فوقيهم حلقات حلقات.
دكّة في جنينة، تقعد عليها بنت حزينة حزينة في نهار شتوي فاضي، تبص يمين، تبص شمال، وتحضن شنطتها، تغالب نفسها بالبسمة والتنهيد، وفي بالها أغنية عيال. السما بدأت تنّدع، تعدّ النقط النازلة، نقطة، اتنين، تلاتة، نقطة على كتفها، نقطة على شعرها، نقطة على فخدها، كأن كل نقطة لما بتقع بتدوس علي حتّة منها .. غمضت عينيها التعبانين وتاهت في العدّ.
غام الضباب بلونه الرمادي حواليها، قلبها انقبض، قبضت على إيد شطنتها، واتهيئ لها إنها شافت ورا الغيم بنت عريانة، وسطها نحيل لكين راسها كبيرة، وعينيها واسعين، بتبص لها، أكيد بتبص لها، ماسكة في إيدها ولد أسمراني، تجري وتطير قطط وعصافير كبيرة مبحلقين عينيهم فيها مطرح ما تروح، دوّرت عينيها في الجنينة، عريان الشجر عريان، بس النجيلة زهرّت زهور خيالية كبيرة، متشبّكة، مليانة شوك.
البنت فكرتها بكوابيسها الجديدة، كانت تدخل تنام لابسة كل دولابها، وتتغطى بكل الألحفة والبطانيات، وكل ليلة وليلة بتحلم إنها ماشية عريانة من هدومها في الشارع، البرد !.. مش بردانة، الستر؟.. ماهياش مستورة، وإن كان محدش شايفها، ما كانتش حاسّة إنها مبسوطة.
شويّة وظهر لها، مهرة بخيّالها، كانت بتشبّ بحماس كأنها بتتعلق في بخار الميّه الطاير من أنفاسها، قربّت منها، وعندها شدّ الخيّال اللجام، كان مبرّق بعينين فيهم الدهشة، أو الخوف، يمكن الرغبة؟، من صدره العريض مدّ لها إيد واثقة، انكمشت في جنب دكتها، هزّت المهرة براسها مرتين، شافت في رقبتها وحمة، وحمة على شكل وردة، فضلت كامشة في الدكّة والخيّال واقف لها بالمهرة وباسط إيديه، حسّت بإصراره، ركب عنادها الخوف، زادها العناد عناد، اتنحنحت مرة بعد مرة، ابتسمت لما جت في بالها أغنية "ما انتاش خيّالي يا ولا/ ما انتاش على بالي والنبي"، بعدت وشها عنهم شويّة، ورجعت ثبتت عينيها فيه، قفل عينيه المبرّقين عنها، لملم إيده وقفلها على لجّام المهرة وشده بعيد، لفّ بالمهرة حوالين الدكّة، واختفى ورا الشجر واختفت كل حاجة معاه.
الشمس بتحاول، رغم إن يومها قصيّر، النور خلّى الضباب يسقط على النجيلة ويغطيه بلونه الباهت، كان صدى كل شئ حواليها بيبعد ويطير، فكرت مش هتمشي لوحدها أبداً، اتعجبت من الفكرة قبل ما تقوم وتفرد هدومها وشنطتها وتشوف سكّتها، أبداً مفيش طريق مختصر ولا معاد قريب للمكان والوقت اللي يستحقها، موسم طويل .. بعده موسم طويل وممشى طويل.. بعده ممشى طويل..

الأيام بضهرها

2010-01-10T16:15:00.004+02:00

يوم التلات:
صاحى على سريري قاعد وضهري محني، الزعل طافي على روحي زي خشبة على الميّه، نكست راسي وطلقت تنهيدة، مش فاكر أي شئ من إمبارح غير الألم اللي نمت بيه ونام بيّ، احترت في إيدي ورجليَّ، حاسس كأني عروسة قطعوا خيوطها واتسابت مرميّة، خيال النور بيتلاعب من بين الأشياش على سقفي، قلت في روحي، إحتمال يكون النهار ده جميل بس أنا أعجز من إني ألحق جماله.
اتكعبلت مرتين وأنا نازل من على السرير، وسقطت على الأرض، لولاش كانت الأرض باردة، ما كنتش رضيت أقوم منها. اليوم أنا لوحدي في البيت، فتحت التلفزيون، حسيت بوشّ في وداني، ولا كنت فاهم كلمة، كأنه كلام تاني غريب عليّ.. فكرت أطفيه، ولكن سبته واطي يعمل حسّ في الحيطان الخرسا، النهار برّه عايرني بجماله وضحكه ولعبه بين النور والضلّة، والشمس ندهت على إسمي ميت مرّة، وأنا مش سامع إلا صوت نهنهه جوّه، جاي منين ؟، من المطبخ، من الحمام، من أوضتى، فيه صوت حد بيعيط بمرارة ومش قادر يبطل عياطه، نمت على جنبي اليمين على الكنبة، واتكومت في بعضي زي الجنين، فضلت مبلّم في الشباك اللى فاتح صدره على الدنيا وسرحت فيه، رنّ التليفون فجأة، حسيت بزغد في أقدامي، ما اترددتش كتير، سبته يرنّ في دماغي بلا نهاية.

يوم الاتنين:
زي كل اتنين، زرتيني في الحلم، المترو رايح حلوان، والدنيا ليل بره القطر، مطفيّة، مضلّمة، وعربيتنا بنورها الوحيد بتعدي في كل المحطات من غير وقوف، واقف قدام الباب سرحان ومستني محطة للنزول، وأنتي ورايا في ركن العربية البعيد شايفاني، بتبص لي بغضب محزون، ما كنتش واخد بالي، وفي نص طريقه، وقف القطر، ونزلت أنا وحدي، مشيت مشيت في الرمل زاحف، قدامي الضلام، وورايا القطر بيصفّر بقفل أبوابه، رميت بعيني ورايا عليه، لاقيته بينطلق على السكة، مسحت اللى سال من عيوني ساكت، وكملت الصحرا ماشي.

يوم الأحد:
النهاردة زحمة، الناس كتيرة، بأعدي في شارع شريف، وشايفنا واقفين مطرح ما كنا واقفين، درايت وشي مننا. بأفكر بس مش فاكر، أو فاكر بس مش بأفكر، زي كل الناس، بأخبّط وأتخبّط، غريب وسطيهم زي ما كلهم غربا، مشيت في وسط الناس.. زي كل الناس.

يوم السبت:
... إلخ إلخ إلخ

سنويّة

2009-12-29T15:02:00.006+02:00

الإنتظار فى المكان الخطأ:
كنا فى انتظار السيد المناضل "جودو"، مُحرر ميدان التحرير من الأمن المركزي، ومُحرر الأرض الفلسطينية من الصهاينة، تمر الدقائق ونحن نتبادل النظرات بيننا، تنتصف الشمس فى صفحة السماء، وضباط المباحث يقفون بعيداً وبسمات السخرية المقيتة ترتسم فوق وجوههم، كيف يخشى كيان الدولة الهائل بضعة بلهاء حالمين متناثرين ؟، يلتف المخبرون حولنا فى دائرة مغلقة، أخيراً صدرت الأوامر بالاعتقال بتهمة "الحماقة الرومانسية".. والسيد "جودو" خذلنا ولم يأتِ بعد.

فى عربة الترحيلات، دسست أصابعي فى فتحات النافذة، ونفثت دخان السيجارة إلى خارج العربة فى الهواء متأملاً حريته، حاولت إدراك شعور المحتجز السجين لكننى فشلت، فالعالم الخارجي يبدو شاسعاً بلا معنى، قاحل وجاف ومقفر، كنا هنا نتوهج بالهتاف، نتوهج بالنكات، نتوهج بالغناء، وبالأشعار والرقصات، الحماس الحىّ، وإن سكن قليلاً، لا يهمد أبداً، تارة نطلب مشروبات وهمية، زميل يطلب قهوة بالليمون، كأن الحياة ليس بها ما يكفى من المرارة اللاذعة، وتارة أخرى نغنى إحتفالاً بعيد ميلاد زميلة أخرى ونهتف قائلين:
"أول مطلب فى الليمان.. تورتة حلوة لست إيمان"
"أول مطلب للمساجين.. تورتة حلوة لكل سجين"
الأشياء تستعيد مذاقها الأصلي، البهجة وضحكاتها، السخرية ومرارتها، الحماس واشتعاله، حتى القلق مذاقه في ساعات الإحتجاز اختلف، والمخبرون بوجوههم التى تصطنع اللامبالاة يتمايزون غيظاً وكيداً عاجزين عن فهمنا.

غ.ز.ة:
تواشيح وأناشيد ومواويل بتتغنى، هقهقة ومقالب وضحك بيجلجل، سقف العنابر يتشقق، وأبص من ورا القضبان والشقوق ألمح شجر متجمع، شجر مكوّن فرقة تخت شرقى، قانون وعود ورقّ وناي، وبيعزف ألحانه الهادية طول الليل طول الليل، بعدها ألمح مصانع الأسمنت بتشغى غبار، يغطى كل شئ حتى الشجر اللى أوراقه بقت زى ورق مفضض بيلمع تحت القمرة، بعدها صحارى وقنا ضيقة وتلال وجبال فاضية ولا فيها صريخ ابن يومين، بعدها غزة على قبة البركان مستنية تفيض على الأرض هناك لحد هنا.

Dark Blue Dive

2009-12-07T23:09:00.003+02:00

ينطلق عواء صفارات الغارة في اللامكان واللازمان العربي، على الطريق القادم من حلب، هناك الميكروباص السريع الذي يحمل ركاباً من جبال الطوروس يراوغ الظلمات والضباب بأضواءه، وفي الحارة الصغيرة المعتمة، يخرج عاشقان عربيان من حانة ضيقة، لا يبدو على مظهرهما نشوة السُكر، يتوقفان جانباً ويختلسان الحب في ثمانية وثمانين قبلة بجوار جندي بريطاني –أو ربما إسرائيلياً- ملقى على الأرض مشغياً عليه ومجرداً من سلاحه.
ينطلق عواء الصفارات المزعجة مرة أخرى، فتلتصق أجساد العاشقين ببعضهما ذعراً، تشرأب أعناقهما وتنكمش، يتعلق اللحم باللحم، يتمزق الجلد بالأظافر، تطلى صفحة السماء بالكحلي قبل أن يتكثف الدخان، مائة ألف قنبلة تدك المنازل فتضئ الدنيا وتنطفئ بمائة ألف ومضة تغشي عيونهما، يرتعش البدنان بمائة ألف رعشة مماثلة تطقطق عظامهما من الخوف، كل الأشياء المحيطة تئن من وطأة القصف فوقها، تتدرج الأدعية والابتهالات في جوف السماء تصاعدياً، تُسمع آهة طويلة عالية تموج وترتفع إلى سقف الليل ذاته، تُسمع عميقة وقوية، تُسمع كإنها أبدية...
وفي لحظة، حلّ الصمت، وانقشع الدخان مرة واحدة، وبقيت ظلمة الليل الأصلية، فانطلق الاثنان من فورهما خارج الحارة حيث وقف الميكروباص عندهما وهبط منه صبي صغير ينادي: معبر قلنديا، العجمي العجمي، رمسيس رمسيس رمسيس.

ثدي

2009-11-22T03:20:00.000+02:00

بخارُ ماءِ يتكاثفُ صعوداً، أصابعُ نحيلةٌ تمسحُ المرآهِ، ثدي نائمٌ يتجلى تدريجياً، راحةُ يدِ باردة، وآخرى دافئة، حلمة ورديةٌ تٌجَس، آهة رقيقةٌ تُشهَق، تنهيدة صغيرةُ تٌزفر، والحلمةُ تَنتَصب.

حضن

2009-10-31T09:17:00.002+02:00

فضلت ألف في دواير في حوش الكلية وأنا بأعرج من الضرب والوجع، وشي كان كله دم نازف وكدمات سودا، الطلبة والدكاترة ملمومين حواليَّ في دايرة أوسع بيتفرجوا عليَّ، كنت بأزعق في اللي دخلوا يجيبوا رجلين الكراسي وألواح الدكك عشان يرجعوا يكسّروا عضامي بيها، "أيوة، أيوة، أنا مجنون، مجنون، مجنون... إبعدوا عني، محدش يقرب لي، سيبوني"، فضلت أعوي زي الكلاب المسعورة في الحوش وأشوح بإيدي في كل ناحية، الشمس الحامّية خليتني أزيد في جنوني بحريقها، مكنتش شايف الناس إلا وشّ واحد بيتكرر، وش بيضحك من فرط القساوة..
اتقدمت السمرا زي الحلم من بين الصفوف ناحيتي بشويش، بتأخر رجل وتقدم رجل، كنت بأصّرخ في السما طالق سيل شتايم، مدت إيدها مترددة، إيدي ضربت خدها بالألم بالغصب، لكنّها دخلت في حضني بقوة وشدت إيدي حوالين بدنها الصغير، شميت ريحة شعرها المغسول وحسيت بدوخة، سلمت نفسي ليها، ضمّت دراعي جنبي وحضنتني، انفجر الدمع من عيوني بدل من شرار الغضب، لحد ما عيوني زغللت من العيّاط وما بقيتش شايف حاجة ولا حد غير أطياف نور بعيدة، فضلت تمسح على راسي وضهري، وتمتم في ودني، حضنتني أكتر وأكتر، جسمها الدافي طلع الحرقة من عينيّ، وبدأت تقفل واحدة واحدة، مسحت خدها في خدي، نامت راسي على راسها. شفتهم كانوا رجعوا جايين واحد ورا التاني شايلين في إيديهم المكانس ورجلين الكراسي وجايين ناحيتنا، قلت لها "حوشيهم عني"، سألت باستغراب "مين؟"، كررت والبكا مغرَقني ومغرَقها "حوشيهم عني"، ضمّيتني في صدرها أكتر من الخوف عليّ لحد ما اختفيت جواها وبقت بتحضن نفسها..

آي آي

2009-10-23T23:53:00.005+02:00

ليت الفتى حجرٌ، ليت الفتى ما يحب،
...
ما تقفش قدامها، وإذا سلّمت عليها إيدك من الحُب تقول: آي، زي شكّة دبوس شعرها في قلبك. ما تقفش قدامها كتير، ارقص، غنّي، زغرط، ارقع بالصوت الحيّاني، لا تفضل أنت تفور وتغلي زي الوابور، وتاخد أنفاسك بسرعة وتبخّرهم في الجوّ بابتسامتها الساكتة الواسعة المعتادة، ما كل مرة الدباييس في قلبك تغرز أكتر، فبلاش تقف قدامها.
هي علامة استفهام متربعة بالغيظ على كرسي، لو مدت إيد تبقى مش فاهم!، ولو عقدتها برضه مش فاهم!، والتعب اللي شلته لوحدك، هبد عقلك القزاز ودشدشه على الأرض تراب مع كناسة الأرصفة. يا خسارة عليك يا قليل الحيلة!!، عندك فكر كتير بتجرجره زي علب الصفيح على البلاط، يا ريتك كنت قُلت وجريت، أو قُلت وطِرت ورا اللي طاروا من عصافير واجواز يمام على قطط على أرانب، نفدت أنت بروحك من جلدك طاير طير، وسبتوها في الدهشة متناهية، وسبتوا الشجر العيّاط، وسبتوا السما الأولى لحد السابعة، وخدتوا هناك كلكم عنّاب ولعبتوا استغماية ونمتوا في حضن الشمس، آديك بِلّم، الوقت مش حاسّك ولا حاسّه، تلوك الكلام ويلوكك، تقرقض أعصاب مبريّة بكل كلمة تقولها، وتفكر إنك لسه واقف قدامها ما بتبطلش قولة : آي.

*اللوحة للفنان صلاح عناني

Writer's Block

2009-10-12T14:03:00.006+02:00

وقفت السمراء أمامي ثم ضغطت زرّ التشغيل، فانطلق سير الماكينة في الدوران مصدراً صوتاً عالياً مزعجاً في أذنيّ مماثلاً لضجيج الجحيم، نظرت إليها مستعطفاً أن توقفها لكنها نظرت في عينيَّ بتحدٍ غليظ جعلني أنكمش.
رفعت ذراعها والتقطت عوداً معلقاً في الهواء فوقها، ثم ناولته إليّ، وكسرت إظفرها ووضعته في راحة يدي قائلة أمرها الصارم:
- اعزف لي.
كانت تروس الماكينة السوداء العارية الدائرة قد برّت من أعصابي ما يكفي حتى شارفت على الإنهيار، قلت لها في إرهاق محاولاً أن يكون قولي حاسماً:
- لا أستطيع !!
لم تكرر أمرها مرة أخرى، بل نقلت مستوى سرعة الماكينة إلى الأسرع، شعرت أن هناك نزفاً حاراً قد تدفق في أعلى رأسي من الصداع، أبعدت رأسي إلى الوراء مبتعداً، وتأوهت من الألم، كدت أسقط بالكرسي على ظهري، ألقت نظرة تحدي شيطانية في عيني ثم وضعت سن إظفرٍ آخر في منتصف أحد أعمدة الماكينة الحادة، فصدر صفيراً رفيعاً لعيناً نتج عن احتكاكهما، اتسعت عينيَّ رعباً وقلت لها راجياً:
- أرجوكِ، كفى !..
- اعزف.
وبدا من وجهها الألم لحظة اقتراب اصبعها من التهام العمود القاطع ما دفعني أن أتأهب بالعود في وضع الاستعداد وأمسك إظفرها الموضوع في يدي كريشة عزف، نزعت يدها من قلب الماكينة في برود، ثم مسحت طرف إصبعها الدامي في طرف ياقة ملابسها، نظرت إليه بمزيد من الإشفاق والهوان، أشرت لها أن تطفئ الماكينة حتى أستطيع دوزنة العود، فرفضت قائلة في صلفٍ:
- تستطيع العزف هكذا.
تقوست والعود في أحضاني، داعبت أوتاره محاولاً تجاهل ذلك العويل المستمر الذي يثقب رأسي كمسمار جهنمي، انحنيت أكثر تجنباً قسوة أوامرها، لكنها فجأتني بسؤالها:
- أتعلم ؟
رفعت رأسي نحوها متسائلاً:
- ماذا ؟
- .......
- ماذا ؟
- لا شئ.
لم أستطع خفض عينيَّ عن وجهها، وقلت لها:
- أنا جبان.
- ...........
- لعلّي لست جريئاً بالقدر الكافي.
- ..........
- وربما لأنني لست...
قاطعتني بعصبية ظاهرة:
- اخرس. اخرس. لا تقلها. أنت لا تفهم شيئاً.
أشاحت بعيداً عني لعدّة دقائق، ساد صوت الماكينة علينا، قبل أن تمسح تحت عينيها، وترتد إليّ قائلة بصوتٍ مخنوق:
- خذ شهيقاً عميقاً وعد إلى عزفك.
تشاغلت عنها بالانتهاء من ضبط الأوتار، وشرعت في العزف حذراً، ثم ارتقيت الثقة تدريجياً.
أغمضت عينيَّ، وابتعدت بخيالي مسافراً، سمعت صدى يتسلل، خرير ماء نهرٍ يتدفق، نهر قد يدعى النيل أو الليطاني أو دجلة أو الفرات، تناديه ألحان عودي، يمر تحت أقدامي، ثم يفيض فيحملني كزورق خشبي رُسمت فوقه الأسماء والزخارف والأغصان والأطيار، يحملني هادئاً في رحلة أبديّة بلا هدى ولا نهاية، مجرداً إلا من هذا العود، أدق عليه طربي ونشوتي، وتعبر فوقي آلاف الشموس والأقمار، وتظهر وتختفي ملايين النجوم والشهب، وأظل أعزف منسجماً سابحاً بين ضفاف اليقظة والنوم والموت والخلود.
فتحت عينيَّ، فوجدتها تقترب مني بعد أن أطفئت الماكينة، ركعت أمامي، نظرت إليها متعجباً، اختلجت أناملي فوق الأوتار، علقت خلاخيل ذهبية حول كاحلي في حنان، ثم أمسكت قدمي وهزتها مرتين فصدر منها رنين خافت، رفعت وجهها إليّ ونظرنا إلي بعضنا في رفق مبتسمين.
نهضت ثم جذبت كرسياً من الهواء، ورقاً صغيراً معلقاً، ثم جلست في مقابلتي ضامة أكتافها في انتظار، رفعت يدي بالإشارة، عدت للعزف برفقتها طوال الليلة الماضية.

مُكرر: نام يا حبيبي نام/ وأدبح لك جوزين حمام

2009-10-07T08:15:00.002+02:00

ولما عديت صحارى كوابيس الليل بمهرتى الشهبا، عقدت نفسى بأول خيط من الفجر، لقيتها فى آخر الطريق بتفك زارير قميصها، ولقيت نفسى بأصغر مع كل خطوة، اتعلقت زى المولود فى بزها الأبيض الصافى قبلن ما يشدنى الليل من تانى لكوابيسه، ضمت دراعيها تحتى ورفعت صدرى ينام على صدرها، احتوت كيانى فيها لحد ما صرت منها، كان الكلام بيتشكل ببطء ما بين عينينا من حروف صغيرة لجملة طويلة، ضحكت لما حلمتها دخلت فى سرتى وزغزتها، شبيت وقربت منها، ضغطت بشفايفى مضمومة بخفة على خدها الوردى الناعم، وهمست لها بكلمة واحدة فى ودنها، المكان لحظتها اتلون بلون ابتسامتها البيضا الصافية، ميلت جسمى الصغير على دراعها ورفعت التانى لفوق وجابت من الهوا عقد فُل ولبستهونى، بعدها نزلتنى واقف على رجلي، لفيت ومشيت من غير ما أبص عليها تانى وفى كل خطوة ناحية الباب الصغير اللى كان بيكبر كنت بأطول وصدرى بيعرض مليان دفا ونور

سيدة القصر .. قارئة الفنجان

2009-10-06T08:05:00.001+02:00

وجدت بابها موارباً، عصافير الصباح تتقافز على الدرج تلتقط الحبّ، الشمس مائلة بحنانها الربيعي تحت أقدامي، مددت يدي المرتشعة لأطرق الباب، فسمعت غناءً بعيداً يأتي من خلفه.
"فوق الشجرة أم الأحسن غنت"
شجعت وطرقت الباب بلا وجل، فانفتح من ثقل طرقاتي الخفيفة، ظهر خادمٌ يقف على مقربة منه منتظراً، قال بابتسامةٍ رفيعةٍ "أهلاً وسهلاً.. تفضل"، وأشار ناحية غرفة الضيافة، هززت رأسي شاكراً ثم تقدمت ناحية إحدى كنبات الغرفة وجلست خجلاً، فكرت فى إشعال سيجارة لكنني تراجعت عن الفكرة وتشاغلت بالزخارف المرسومة على الأرضية الرخامية البراقة رُسم عليها أطيار وأغصان متشابكة، بدت فى تتابعها وكأنها تحكي قصة.
"سامع صداها من العلايل يبرى"
صوت الأغنية الهائم فى أرجاء القصر لا يمسح السكون عن الأثاث والأشياء، بل يزيدها توحداً.
"طار نعاسي"
انتبهت من فوري على صوت أقدام تهبط سلماً، نهضت ثم تنحنحت، ألقيت نظرة مستطلعاً فوجدتها تدخل الغرفة، بهيّة الطلعة، ترتدي قميصاً فضفاضاً سمني اللون، وتعقص شعرها اللامع فى شكل كعكة هائلة يبدو معها عنقها المرمري شامخاً، تزين أذنيها بقرطين ثقيلين من اللؤلؤ، ابتسمت فبانت أسنانها البيضاء الكبيرة بين شفتين ورديتين وقالت "تفضل"، انتبهت من شرودي وجلست خافضاً رأسي في أدب، أشارت إلى خادمها فأتاها مهرولاً، طلبت القهوة، أخفض رأسه مطيعاً وخرج.
"ونشوف ضو اسنانها الي فجره"
جلست تتأملني ملياً، ضممت يديّ بين ركبتيّ، مرت الدقائق بطيئة حتى دخل الخادم حاملاً القهوة السوداء ثم وضعها فى رفق أمامنا على طاولة صغيرة وانسحب، شكرته ثم رشفت رشفة هادئة من الفنجان.
"ويحكي لها بمواجعي وبدايا"
طاب لي صمتنا الذي طال، لم أشعر معه بالحرج، بل شعرت براحة خافتة تسري فى أوصالي المكدودة، تأملت ألعاب الضوء المتسلل من النافذة الملونة المزخرفة فوق الحائط المقابل، رشفت رشفتى الأخيرة من فنجاني ثم ناولته إليها، قلبت صحنه الصغير فوق فمه، ثم قلبتهما وهزتهما معاً برفق ، وكانت قد فعلت نفس الشئ مع فنجانها، اقتربت منى ثم وضعت يدها المرصعة بالخواتم فوق يدي كي أقترب أنا الأخر منها وسألتني "ماذا الذي تريد أن تسأل عنه ؟"، احترت فى معرفة الإجابة وشردت عيناي بعيداً، لم أستطع إيجاد شيئاً بعينه أريد أن أعرفه، لم أهتم قط بالسؤال عن الآتي إلى تلك الدرجة، أردت أن أقول جذبني الفضول فأتيت.. لا، لا، أنا كذاب.. هناك ما أريد أن أسأل عنه، لكنني لم أعد أريد معرفة سوى ما ستقوله هي، جئت بمخزون قوي من السخرية والتكذيب، والآن أنا مهيئ تماماً للإستماع لكل حرف تنطقه كأنه من كتابٍ مقدسٍ، الأكاذيب من فمها ستبدو حقائق ناصعة، كدت أقول "لا شئ" لكنني همست متسائلاً "كل شئ ؟"، هزت رأسها مع ابتسامة خفيفة علامة الإيجاب، ثم تناولت فنجانها وقالت "أحب دائماً أن أبدأ بفنجاني"، أدارت الفنجان بين أصابعها وهى تدير عيناها فى داخله في تأمل شديد، اعتدلت فى اهتمام مراقباً إياها، مطت شفتيها في عدم اقتناع، ضيقت عيناها في تركيز ثم أشارت إلى داخل جدار الفنجان، "هناك طاقة نور"، وأضافت "وهذا طائر ملوّن صغير، لا أعرف له اسماً، يقف على حافة تلك الطاقة"، ثم صمتت وطال صمتها، وضعت فنجانها في رويّة معلنة إنتهائها من قراءته، رفعت رأسها إليّ وابتسمت، ثم التقطت فنجاني آخذة نفساً عميقاً من صدرها المرتفع، نظرت داخله في تعمق وغابت، رفعت خنصرها النحيل وأشارت به ناحية قاع الفنجان، "أترى هذا الباب؟"، هززت رأسي دون أن أرى شيئاً حقيقياً، كل ما رأيته تعاريج رفيعة نتجت عن جفاف البن داخل جدران الفنجان، "من يقف خلف هذا الباب الموارب؟" سألتني، "وهل هناك من يقف خلفه؟"، صمتت كثيراً قبل أن تبتسم مرة واحدة وتجيبني "هناك.. لكنه سيغادر بابك إلى بعيد"، "إلى أين؟" سبقتني لهفتي بالسؤال، اتسعت ابتسامتها أكثر وقالت "لا تقلق.. فسوف يعود يوماً فقد عرف من أي الأبواب يدخل"، ثم أعادت الفنجان مقلوباً ووضعته فوق الطاولة القريبة، ثم جاذبتني أطراف الحديث حتي نسيت الفنجان وقصة الفنجان.
ظلّت تسألني وتستمع منصتة إلى حديثي، وأنا أجيبها دون أنا أجد فرصة واحدة للتوقف، ظننت نفسي مخموراً لا يستطيع التحكم فيما يدلي به فمه، والحق أنني كنت كذلك، فبريق عينيها ولفتاتها الصغيرة المهتمة بما أقول جعلتني أشعر بنشوة الحديث معها.
ألقت نظرة طويلة في ساعتها، كففت حديثي خجلاً، فسألت "لِمَ صمت؟، أنا آسفة، لم أكن.."، قاطعتها خافضاً رأسي "لعلي مملاً"، قالت "لا. لا. لا تقل هذا أبداً أرجوك"، ثم زامت ونهضت فنهضت معها وقد تقابل جسدينّا، قالت متلهفة في صوتٍ آسفٍ "ربما قد نتابع حديثنا في وقتٍ لاحق، فأنا الآن عندي موعد في المطار، سأركب طائرة"، سألتها متعجباً "طائرة!، لماذا؟"، ابتسمت في حرج قائلة "ربما لا تعرف، لكنني أعمل مترجمة بالأمم المتحدة"، ضاعف قولها من دهشتي!، فقد انتقلت بي من عالمٍ إلى آخر في لحظة واحدة!، سألتني فجأة "لم نتعارف بعد، أنا فتحية"، أحسست بدوار يلف رأسي، "فتحيّة!! مترجمة!.. أنا حسين.. حسين الحاج"، نادت خادمها فجاءها، طلبت منه حقيبتها فذهب يحضرها، "أتعرف من كان يقف بالباب.. بابك؟"، رددت متلهفاً "من؟"، قالت مبتسمة واضعة يدها الدافئة في يدي"إنه نفس الطائر الملون الصغير الذي وقف فوق حافة طاقتي.. فرصة سعيدة"، ثم غادرتني ملتقطة حقيبتها من الخادم الذي ودعته سريعاً قبل أن تختفي من فتحة باب الغرفة التي كنت فيها دون رجعة.

Yellow Brick Road

2009-09-26T00:39:00.003+02:00

تحت تحت، الرقص في الدور التاني، دُمْ دُمْ تَكْ تَكْ دُمْ دُمْ تَكْ، المدن كلها بتتطربق، صالة بلياردو وبلّي وبولنيج في الدور التالت، كله نازل فوق بعضه بنفس ترتيبه، تَكْ تَكْ دُمْ دُمْ تَكْ تَكْ دُمْ، الأشكال قدام عينيّ بتتطوح مخمورة، هفف هفف، أنت مالك بتنهج فى الـ*يك زي اللى بيجري ؟، هفف هفف، البنت اللى رقصت معايا قالت لي واختفت، الحبّ معايا ..سكتة.. زي المشي على الصراط المستقيم، دُمْ ..سكتة.. تَكْ، منسق الأسطوانات هيسمعنا أغنية أخيرة يتبعها السلام الوطني، شششششششش، نداء، نداء، صوت معدني بارد، نحنُ على بعد 25 ألف فرسخ تحت مستوى البحر..
سامع حاجة ؟
شايف حاجة ؟

Down
Down
Down
Fades Out

اليوم النشيد

2009-09-22T12:19:00.002+02:00

هيصحى الصبح وهيبقى مضطر -يا حبة عينه- غضباً عنه يغنى "بلادى بلادى لكِ حبى وفؤادى"و"صوت الجماهير هو انتفاض عزم الأبطال" و"وطني حبيبي الوطن الأكبر" فى الحمام والشغل والأتوبيس وفى ودن اللى جنبه طول اليوم، لأن دماغه بتنقح عليه بيهم، وكل ما يقول لنفسه كفاية يعلّي بالصوت أكتر وأكتر، ويعلق الصور على الحيطان، وينشر الأعلام على المنشر، ويمشي بالخطوة العسكرية، ويحيي العلم، ويقوم يصقف بصدره في آخر الأغنية والخطبة اللى فكت حبس دموعه، ويلاقي كراريس الواجبات ومجلات سمير وشرايط الأغاني تحت السرير، ويرمي الأدوية من الشباك، عشان يبص في المراية ويفتكر شكله، ويبص فيها تاني ويعرف روحه، ويبص فيها تالت ويعيط من بزّه اليمين، ويبص فيها رابع ويضحك من قلبه الشمال، ويبص فيها خامس وكأنه ما بيشوفشي إلا نفسه صغيّر، وينسى إزاي صحي إمبارح وأول إمبارح وأول أول وإزاي صحي من سنين طويلة وفضل فايق ما بينامشي طول العمر ده ... إزاي ؟، وقبل ما يغطس فى النوم يرجع تانى يقول

"وإحنا مش عاوزين نشيد"*

* بيت من ديوان ميت بوتيك لفؤاد حداد

محاولة انتحار

2009-09-19T22:53:00.000+02:00

وقفت طيلة نصف ساعة أمام مرآة الحمام، أتأمل وجهي بعد الحلاقة، في كل مرة أحلق ذقني يبدو وجهي على حقيقته، صغيراً ومستديراً. طيلة النصف ساعة كنت أفكر وأحلم بأشياء عدة وأنا أجذب ذقني القوقازية وأعض على شفتي العليا متأملاً موضع شاربي المحلوق، رفعت وجهي وأخذت أتأمل عنقي الأسمر النظيف من الشعر وأضغط بأصابعي فوقه، وعندما خطر لي فجأة خاطر الموت، أحسست بالدم يجري في شراييني نافراً، كأنني مشرف على موتي فعلاً، أمسكت مكينة الحلاقة وأثنيت رأسها عدة مرات، لمعان شفراتها في الضوء وخز قلبي بالخوف، ضغطت رأس الميكنة فوق رقبتي، فكرت فيما يفترض فعله، ثم جذبتها سريعاً ناحية اليسار فيما أدرت رأسي في الإتجاه الآخر، وعندما رفعت رأسي مرة أخرى أمام المرآة لم يبد أن هناك شيئاً قد جرح، ثم ظهر خيطين عرضيين من الدم تدريجياً، سال منهما خيطين رفيعين من الدماء فوق رقبتي ونحري، كانت الدماء تلمع في المرآة مثل شفرات المكينة التي تسببت فيها، أحسست بالألم لكنني لم أرفع يداً لأمسح الدم النازف، وصرت أتأمل بدقة خيوط الدماء المتشققة وهي تشق طريقها وتجري هابطة نحو صدري المرتجف خوفاً، استفقت على صوت أمي يناديني من خارج الحمام وبطرقات يدها على بابه، انقطع حبل أفكاري وخيط الدم السائل، وارتد وعيي إلى العالم حولي وارتدت الدماء إلى داخل الجرحين الرفيعين، جففت وجهي من بقايا الشعر، وعنقي من قطرات الدم، ثم خرجت ملبياً إياها..

انتظار

2009-09-19T22:48:00.001+02:00

كنت أقف في الهجير منتظراً من لا أعرفه، فوقي شموس عديدة، كلها تقدح الشرر بلا رحمة، أرى حقلين بعيدين من أشجار الزيتون وبينهما طريقاً أسفلتياً لونه أحمر، مرتفعاً يحجب إمتداداً من الصحراء وراءه، خرج من بين أشجار الحقل الأول كياناً متحركاً بخطوات قوية منتظمة كمشيّة الجند يسير في إتجاه الحقل الثاني، أحطت عينيَّ بكلتا يديَّ وحاولت تبين ما أراه، فبدا الكيان كأنه لإمرأة ترتدي جلباب أسود وتضع حجاباً طويلاً غير معقود حول رقبتها، كانت قد وصلت إلى منتصف الطريق عندما ناديت "يامّا"، لكنها لم تتوقف ولم تبطء سيرها، رغم أن المسافة بيني وبين الطريق لم تكن بعيدة، ناديت مرة أخرى بعزم ما في من قوة "يامّاااااااااااااه"، أحسست لثانية أنها قد توقفت وبحثت بعينيها عن المنادي، لكنها استمّرت في سيرها المنتظم ذي الخطوات العسكريّة الواسعة، انطلقت أجري نحو الطريق وأنا أناديها مقطوع النفس، لكنها كانت انتهت من الطريق الأسفلتي وانحدرت داخل حقل الزيتون الثاني، وقفت أتأمل غيابها وراء أشجار الزيتون، وقلت في نفسي "لعلها لم تسمعني، أو سمعتني ولم تكن تريد إنتظاري"، عاد المكان إلى سكونه المعتاد في لحظات قصار، أحسست أن هذا السكون هو حقيقة لا تقهر، قلت في نفسي "أو لعلها كانت سراباً"، وظللت واقفاً في الهجير منتظراً من لا أعرفه..

ضلمة إمبارح

2009-09-06T13:44:00.002+02:00

الأتوبيس الأخير اللى كنت مروّح به بولاق نزلني محطة أرض اللواء، كان الليل ممدود فوقي على آخر السما، قلت معلشي، نتمشاها لحد البيت والسلام، ركبت رجلي وعديت السكة الحديد والميدان، دورت في عقل بالي من أي زواية أكسرها ألاقي نفسي في شارعنا، المهم تنكسر منين ؟، مشيت ورا الناس اللي ماشية، والتكاتك اللي رايحة وجاية، واهتديت بأنوار المحلات اللي سهرانة، الدنيا صيف وسحور، والناس ونس لما بيتهادوا على الخطوة، عديتهم، خلصوا كلهم وخلص الشارع، شفت من بعيد آخري مسدود في الكوبري الدائري من عواميد النور اللي بتحاوطه من كل جهة، وقدام عينيَّ عمارات زي العلب قايمة متنتورة في قلب غيطان مفروشة بالفضا، دُرِت حَوَاليّن رُوحي مَرّات، فكرت لو إني تُهت، حسيت زي ما يكون رجلي اتكسرت عليها ألف عصاية، عقلي شاور، اِرجَع من نفس السكة، رجلي قالت، ما أقدرش أرجع كل ده تاني !
جت نجدتي من حيرتي على يميني، لما شفت ناس كتيرة بتكسر في ضهري في شارع ضيق جانبي، ما صدقت مشيت وراهم ودخلت في شارعهم، الناس بتطمّني، مطرح ما رجلي خدتني معاهم مشيت، قبل ما أحس بالأمان أو أفكر، دابوا مني واختفوا، كأن أحواش البيوت المنوّرة بلعتهم واحد ورا التاني.
خفيت رجلي بس قلت مش راجع، وكملت المشي وحدي في الشارع، والهوا اللي بيرفّ زينة الشبابيك، رَفّ قلبي معاه من الخوف والرهبة، حتى المحلات والورش المفتوحة زي العيون المبرّقة ما بانش لها أصحاب واقفين، الخلا غيّم قلبي سواد، صدري انقبض من جواه لبراه، نبحت علىّ من خرابة كلاب ما بانتش لهم بين الأكوام هيئة في ضلمتهم، جزيت على سناني ولساني، مديّت خطاويَّ، ولما بعّدت وانتهيت منهم، كان الشارع مفيش له أول من آخر، عماراته بتعلى وتعلى، تعلى، والشارع بيوطى ويوطى، يوطى، ورايا وقدامي العمى وحده، لمبات النور تزيدها ضلام، جاتني رعشة من ضلّي، جريت على قدام زي اللي بأدحرج، بان لي مفترق طرق على البعيد، جسيت في صدري النهجان، ما شفتش نور، شفت عمارة خراسانة مهجورة مالهاش نهاية في وشي، كل السكك اللى بانت مفتّحة طلعت مسدودة، التعب والتوهة لفّوا دماغي بالدوخة، مفاصلي سابت، ما كانش فاضل حتة سما أبص لها من طول العمارة اللى سدت عرضها..
...
فضلت واقف وما دريتش إلا بدموعي كلها بتسح على وشي.

لا شئ

2009-08-24T14:45:00.002+02:00

أنهض فزعاً فوق السرير، لحظات وتهدئ نفسى، أضع مرفقى فوق الفخذ العارى من حر الليل، وأسند جبهتى على راحتى، وأنا أردد رداً على كابوس الليلة الماضية "مفيش حاجة... مفيش حاجة" فى الحمام، أغسل وجهى، وأصطدم بوجهى فى المرآه البلجيكية القديمة، يصدمنى تغضنه المفاجئ، أنكره كأن هذا الوجه ليس لى، حاولت الابتسام، فانشغلت عن البسمة المرسومة بذلك التجعيد الذى ظهر على جانب فمى، يسألنى الوجه فى المرآه عما بى ؟، أنثر قطرات المياه على صفحته، وأنا أجيب "مفيش".
أمى تجلس أمام المسلسل العربى المعروض على شاشة التلفزيون تقشر البطاطس، أجلس أنا الآخر أمامها وأغيب فى شعرها الرمادى والخصلات التى صارت بيضاء، تحول عينها إلىّ وترى وجهى الذى تقلص ألماً، فتسألنى "فيك إيه؟" فى نفس الوقت الذى يسأل بطل المسلسل جاداً بطلته ماذا بها ؟، فنجيب أنا والبطلة فى صوتٍ مهمومٍ غارق فى الشقفة على ذاته فى الوقت نفسه "مفيش حاجة .. مفيش أي حاجة"

لماذا المجنون الأخضر ؟ - بيان غير متكمل

2009-08-20T09:00:00.002+03:00

يا أخضر بقيت كل الألوان
إلا الأخضر

بعضاً من الحياء، بعضاً من الحماسة، كأن تزمّر مع الزمارين، وتطبّل مع الطبالين، وترقص مع الراقصات البدينات، تضع زهرة حمراء خلف أذنك ساعة الحب، بدلاً من قلم ساعة الإلهام والكتابة، وسيجارة ساعة التفكير والقلق، وجهٍ طفولي غضوب تصفه الفتيات بالذكورة المبكرة، والشيوخ بإنعدامها، فلماذا يسخر منا، نحن العشاق، الآخرين ؟، من رأسٍ حليقةٍ تشع الجنون، من جبهةٍ عريضةٍ تجابه الشمس، من أنفٍ أفطسٍ يبرز الهويّة، من وجهٍ صغيرٍ يذكرك بصبيّة الموالد، من جوهرِ الإنسانِ ؟

يا أخضر بقيت كل المواويل
إلا الأخضر

رجّ العبوة الناسفة قبل استعمالها

2009-08-20T08:57:00.001+03:00

هل تعرف؟.. هل كنت تعرفـ.. أتعرف من نحن ؟.. نحن المجهولون أبناء أولئك المجهولين الذي هتفوا لأم كلثوم في حفلاتها ب"عظمة على عظمة على عظمة يا ست"، أحفاد أولئك الذين تراهم يركبون فوق ظهور السباع فى الجداريات الشعبية !!، فلماذا نبدو كمن تطارد الكلاب مؤخراتهم ؟، ولى زمن القباب والمآذن التى تخترق السماء، وأصبحنا نصلي بالأقبية المكيّفة أسفل منازلنا، وقسمنا صلواتنا ما بين عوز وخوف من العوز.
حسناً، إذا أطلقنا المآذن كصواريخ فضائية إلى السماء، وفجرّنا القبور والسراديب خابئة الأسرار السوداء، هل سيعلم أي أحد ؟.. لَمْ يُلَمْ بالمثل يا عبد السميع/ إنّ يَرُد الصاعَ ألفاً لَمْ يُلَمْ *.. بالأمس مررت على قريتي القديمة التي تختبئ في قلب قلب المدينة، كانت سري وملاذي، جاءتها الجرافات والحفارات تردم وتقتلع وتهد، لا أعلم كيف علموا بأمرها؟، كدت أبكي من القهر وقتها، لكن لا بكاء على الأطلال تحت سماء الله الغاضبة بعد الآن، سأصوب الماسورة التي تختزن رصاصتي الوحيدة في رأس من يصيبني بالصداع بدلاً من أن أطلق الرصاصة في رأسي أنا لأخرسه.
والآن ثبت أصابع الديناميت فى جوانب الآلات، ولا تنس رج العبوة الناسفة قبل الاستعمال..

* الأبيات الأخيرة من قصيدة "الطاسة" من ديوان "ميت بوتيك" لفؤاد حداد

سموني أنا المفتون

2009-08-20T08:51:00.001+03:00

ليت الفتى حجرٌ، ليت الفتى ما يحب، السر فيكي، مبتدأ وخبر، كلهم فرقعوا في حبك عين العفريت، ورشّوا الورد، وطيروا الأرقاب، كلهم داخوا، أصحاب الرجا...
الحلوة صابحة رايحة تدوس الورد ونضارتي، وتقفل عليها الباب، وتحلّ شعرها وتكيدني، وأقول لو يا ريت تسمح ؟، وأغني سيبوني يا ناس أروح مطرح ما أروح، أزور جنتها وشجر الحنّة، أسهر وأنام تحتها باكي، وأمسح دمعي في كمي، ياريتني ما عشقت عامنول
...
تضحك في عبّها عليَّ
المكر وسؤالها يدبحني
"بتحب ؟ مسكين .. يا حرام !!"
"ومين المحظوظة ؟"
"بوسة ؟ يعني ايه بوسة ؟"
...
وأنا أقول
" يا حبّ عيب .. اختشي "

فيلم عربي

2009-08-20T08:50:00.000+03:00

زعقت أمي فيّ "يالا مستني إيه ؟"، اتنفضت من لخمتي، ونطيت من فوق السلم عَ الشارع، على الحنطور وطرت بالكرباج، ما في عيني إلا إني ألحقها، قاموا على كوبري بديعة في سكتي المتاريس، عساكر ببنادقها قدامي اتصفّت، طرابيش ببدلها ورايا بتهتف، حصاني الجرئ سابق، وشاط في وش الطلق، وزام فى الهوا طيران، جزيت على سناني "يا منجى نجي" ، ما دراناش بدمنا السايح إلا لما وقفنا على جمر الأسفلت.
بصيت لقيت القاهرة دخان، الشوارع صريخ، نطيت فى البويك وفتحت، شمال يمين، العجلة في إيدي مش شايفة، النار من الدكاكين، حودت يمين وشمال، المطافي وحلت السكك، "أطلبوا الإسعاف"، الموت مغطي بعفاره الأسود وشوش الناس، ريحة الحريقة فى البلد، وكل شئ كابس الطريق آهوه، شمال شمال، على الأوتوسطراد سايق لوري محمّل عائلات مترحلة،
زمّارة الغارة في وداني بتطوّل
سكوت
سكوت
سكوت
صفير بيشق السما، صرخت بعزمي عشان صوتي يغلب القنبلة، الطيارات بتطاردك، الطيارات عايزاك، قلت مانيش ناوي أموت النهاردة، زمّرت وكسرت ودست بنزين فوق الميّة، صفارة تانية بتشق وداني وتجيبها دمّ، "استرها يا رب"، الطريق حريق، طعمها فى حلقي، سدوا السكة بدبابة، الموت وقف في الزور، جت في عيني مرة كمان، عضيت بنابي وقلت يستحيل، عكست فى نفق مضلّم، وسبتهم فى أمان وجريت.
طلقت رجلي للريح، الوجع عصر كتافي، آهوه.. المطار آهوه، ولما وصلت عديت فى الناس والزحمة، لقيتها مستنية وعينها سارحة ف الجايين، جنبها الشنط منتورة، سالت دمعتها المحبوسة وهي بتضحك لما شافتني والعرق سايل على قورتي، دخت ونسيت كل اللى حصل كأنه ما كانش..

بأحبك يا توحة

2009-08-20T08:44:00.003+03:00

جابت الرقّ ودقت لي، مطرح ما رسيت رقصت، مطرح ما مشيت رقصت في الشارع، من غير حزام، من غير بدن، رقص الهوا في النسيم، رقص القصب في الريح، جبت صاجات مُدهبة من الصايغ ودقيت لها، وتدق برجليها تفتح الشبابيك، وتشاور بإيديها تقفل الدكاكين، وتطيّر الغسيل وتنور الميادين، وتبكي قلب الفرحانين، وتضحك عين الحزنانين، ونجري من بعض نستخبى ورا عمدان البواكي، وأربع خمس دقات ترجعنا، دقيت لي ودقيت لها، ودقوا لنا السامعين على الدربكة، إلى أن دقنا تحت عواميد النور طعم القبل في الفجر..

المول

2008-09-29T12:19:00.003+02:00

على مقربة من المجمع التجارى المنير الهائل تقف سيدة عجوز ترتدى الأسود الرقيق بأكياس المناديل على الرصيف المظلم -رغم أعمدة الكهرباء المحنيّة ظهرها التى تلقى أضواءها الكابية فتضفى على المشهد حزناً إضافياً-، مررت بها، فدعت لى بالرزق والبركة فى إرهاق شديد كى أشترى منها، لكننى لم أتوقف، كان مظهرى لا يشى بأننى ممن يحتاجون إلى المناديل فلم تصّر علىّ، ثم توقفت أنا بعد عدة خطوات واستدرت أتحسس جيوبى الخلفية اطمئناناً على المناديل خاصتى، كانت توجهت هى الأخرى إلى زبون آخر، أسرة صغيرة تبدو عليها آثار النعمة تحمل أكياس عدة من محلات الملابس والألعاب والمأكولات المختلفة، ظلت تلهج فى سرعة بالدعاء للأب والأم ثم الصبية الصغيرة لعل يحن قلب أحداً منهم عليها فيكرمها بشراء كيس أو اثنين، لكنهم ما انفكوا على تجاهلها كليةً، حاولت أن تقرب يدها الممدودة بالأكياس إلى الصبية الصغيرة، فما كان من الأم إلا أن دفعت ذراعها بيدها بعنف متوتر وهى تطلق الشرر من عينيها، تراجعت خوفاً العجوز إلى الوراء، إلى أن أشار الأب إلى تاكسى، وفى لمح البصر كان الثلاثة قد قفزوا فيه حاملين أكياسهم الثقيلة وانطلق يجرى بهم، جلست فى صمت قاتل على طرف الرصيف مسقطة رأسها فى يأس تمد ذراعها القصير بالأكياس إلى المارة، لم أستطع احتمال المشهد، استطعمت المرارة فى حلقى، انتحيت جانباً وأفرغت كل ما فى جوفى..

القانون مافيهش زينب

2008-08-13T13:43:00.003+03:00

ومين زينب ؟.. واحدة حكم عليها الزمن.. وياما الزمن حكم على ناس كتير بالغلب.. تفضل تلف وتدور زى التور من مكتب لمكتب ومن مصلحة لهيئة.. وكل اللى بتاخده جلافة وقلة أدب.. "روحى إدارة المخازن"،"تعالى الأربع الجاى" وطبعاً الأمر مايسلمش من حق الشاى والذى منه... كان لازم زينب يكون عندها ولاد وكان لازم الولاد دول يكونوا أيتام عشان أركان المشهد المأساوى يبقى مكتمل وخالص مخلص.. بالك وأنا قاعد معاها بأشفط كوباية الشاى اللى بيطلع من بين إيديها آخر مزاج تقولى "يوم ما المحافظ كرمنى بجايزة "الأم المثالية" قلت للراجل أشكى له من حالى ، قوم الناقص يقولى "ما أنتِ يا زينب مش موجودة فى القانون، اضحكى اضحكى، خلى الصورة تطلع حلوة فى الجرانيل""... سكت وفكرت شوية.. غريب قوى القانون اللى مافيهش زينب ولا عيشة لكن يعرف باكينام ويفهم كويس قوى فى دولت... هزرت معاها شوية "ما الحق عليكى يا زينب.. بختك دايما مايل.. فيها إيه يعنى لو كان إسمك بدل من زينب يبقى زيزيت؟"... سألت إزاى نلاقى مكان فيه القوانين تعرف زينب زى ما تعرف غيرها، قانون مش فوق الجميع ولكن يبقى للجميع.. وبعدين قلت "ألا يا زينب لو جه يوم وطلعتى فى القانون ده حيبقى موقف ملهاوى أو حتى على الأقل كافكاوى" وباين عليها مافهمتش الكلمة الأخيرة فاكتفت بمصمصة شفايفها وسكتت.
تانى يوم راحت على حس السيد المحافظ عشان تخلص ورقها يقولوا لها بكل قلة ذوق "آسفين.. القانون مافيهش زينب !!!"

الدندنة من أول وجديد*

2008-05-16T09:21:00.004+03:00

- سهرة مملة !
قالها لنفسه سريعاً كأنه سباب وهو يهبط السلم ، خرج من بوابة العمارة شاعراً بالنعاس، توقف على حافة الرصيف، ثم ملأ صدره بالهواء الليلى المنعش، احتار بين أن يعود إلى منزله راكباً تاكسى فى مثل هذه الساعة المتأخرة أو راجلاً، طوح قدميه قليلاً، ثم حسم أمره، وبدأ يمد فى خطواته، كاد نعاسه يغلبه ويبطئه، وقف معيداً تفكيره فى المسألة، بدأ يهمهم أثناء تفكيره بلحن أغنية غربية قديمة عن حيرة النفس، حرك قدميه ببطء على إيقاع الأغنية، زاده الغناء الخافت حماساً واستفاقة، فعاد لمد خطاه بطول الرصيف عائداً إلى منزله، رفع رأسه قليلا وهو يمشى ناظراً إلى الأمام محاولا تذكر باقى كلمات الأغنية، ولكن السيارة التى كادت أن تصتدم به فى منتصف الشارع قاطعته بزمجرتها العالية، نظر إلى السائق الغاضب بعينين مملؤتين بالدهشة، ثم تركه يسب ويلعن كما يشاء، عبر الشارع سريعاً، ثم على الرصيف الآخر غيّر الأغنية بأخرى، يتصاعد لحنها فى كل خطوة، ود بشدة أن يرقص مع الايقاع المتصاعد، لكنه اضطر إلى أن يخفت صوته إلى الهمس بسبب العابرين الصامتين المتعجبين بأعينهم من جنونه -رغم أن الرصيف الطويل شبه خالى من المارة فى مثل هذه الساعة-، وعندما يتجاوزونه يعود للغناء بانتشاء أكبر وأكبر، سحب نفسه وأتخذ طريقاً مختصراً بشارع مظلم خالى لا تستطيع أى عربة أو إنسان يزعج غناءه فيه، قطع الأغنية من منتصفها شادياً دون أن يخفت صوته هذه المرة لأى داعى:

وأنا والحبيب قاعدين سوا
قاعدين سوا...
قاعدين سوا على شط النيل
....
إمتى الزمان يسمح يا جميل
وأسهر معاك على شط النيل ؟
توقف لحظة فى منتصف الشارع الخالى إلا من جن الليل، أحس بأنه يريد شخصاً ما يشاركه بهجته، أخرج هاتفه من جيبه، وظل يبحث فى قائمته عن اسم ورقم معين، ضغط زر الاتصال بحماس، ورفع الهاتف إلى أذنه منتظر رنين الطرف الآخر، جاءه الرنين عالياً، تسارعت دقات قلبه، ثم خاب أمله إذ تحول الرنين بعد لحظات إلى صفير إنشغال الرقم المطلوب، تقدم ثلاث خطوات إلى الأمام، وقبل أن يضع هاتفه مرة أخرى فى جيبه، رفعه أمام عينيه وضغط زر اتصال مرة أخرى، فظهر أمامه الاسم الذى سبق وأن طلبه، تردد قليلاً قبل أن يضغط نفس الزر مرة أخرى، رفع إصبعه من فوقه، ثم أنهى الأمر بضغطه، وانتظر متوجساً، جاءه الرد على هيئة رسالة صوتية " الرقم الذى طلبته ربما يكون مغلقاً أو خارج..."، ضغط زر إنهاء الاتصال بعنف، ثم ألقى الهاتف بلا مبالاة فى جيبه، ثم همهم بلحن أغنية قديمة متجهاً نحو منزله وهو يحاول إيجاد عذر ولو صغير فى قلبه لكنه تذكر أن هذه ما بالمرة الأولى ولا الثانية وأن محاولاته تتكرر منذ أسابيع عدة ولا إجابة، توقف ثانية وأخرج هاتفه سريعاً وبحث عن الاسم ثم قرر مسحه بضغطة من الذاكرة – الهاتف والقلب معا-، جاءه السؤال " مسح الاسم والرقم ؟"، رفع رأسه للسماء الصافية متأملاً إياها للحظة، ودون تردد هذه المرة ضغط مؤكداً الأمر الصادر، أغلق لوحة أزرار هاتفه، ثم وضعه بهدوء فى جيبه، ومشى متهادياً مفكراً أو متذكراً شئٍ ما، تذكر إنه كان يغنى، عاد ليغنى موالاً لشكوكو مبتسماً ماسحاً تحت أجفانه دمعه الجاف وصدى غناءه يرعش أوراق الشجر النائم:
ياللى كويت الفؤاد عند مكوجى الطرابيش
ثم صدح بغناءه أعلى:
ياللى كويت الفؤاد عند مكوجى الطرابيش
وزر عينى اتقلع وأنت ما بتجيش !!

*اسم قصيدة لفؤاد قاعود

طَــٰـــه

2008-05-04T01:52:00.002+03:00

حس الشيخ طه الفشنى بيجيبنى باكى ويردنى مغسول، حس الفشنى بيبعتنى مساجد مجهولة فى مناطق بعيدة، حس الفشنى يقومنى بإمامة المغرب فى الناس على أذانه وإقامته، حس الفشنى يوقفنى وسط جوقة المنشدين أردد وراه مدائحه فى حب ابن بنت النبى، ويقعدنى بين الناس نقول "الله.. الله.. الله" ونهز راسنا متمايلين منه فى سهرة انتظار صلاة الفجر فى جامع السلطان أبو العلا والإذاعة تاخد من صوته وتسجل وريحة نيل الفجرية وصلت لنا من ريح الجنة الدايمة، حس الفشنى يخلى الدنيا عندى زواية ومصلى، حس الفشنى يدوبنى فى ضى المأذن الأخضر، حس الفشنى يطلق حمام الغفران والمسامحة والرضا، على حسه يدوروا الموالدية واصلين السما بأرضها ويعدى أتوبيس حامل ناس رايحين الأراضى الحجازية يأدوا عمرة ويزوروا بيت النبى ويملسوا على شباكه وأدخل أنا فى النوم براحة مسنودة راسى على حديد مقام الحسين، حتى الأرض إذا ما سمعته فى الفجر صدرها يتنهد رحمة بالناس كلها والليل ينزاح من على قلوب الناس سايب شمس اليوم الجديد تشرق علينا.

وشوشة نص الليل

2008-04-01T22:51:00.005+02:00

"يتصاعد الهمس الجماعى"
بيشوش الأسلفت فى عز عز الليل
بيشوش الأسلفت فى عز عز الليل
بيشوش الأسلفت فى عز عز الليل

......................

هو الأديب الأدباتى.. صدى خطوه فى الحى المقطوع زى الجرس.. بيشد خيط الدم الممدود من وراه.. وكوفية سودة دافن فيها دقنه.. عمود النور راصده زى البومة ومبانى المدينة مياّلة من كل جانب صدره.. طابقة على قلبه... والعالم من حواليه ساكن لكنه مش ميت.. لا ليله زى نهاره ولا إمبارحه زى بكراه.. ولا حتى بين الساعة والساعة ولا اللحظة والتانية... فى برك المجارى الطافحة بيشوف صورة تانية.. بدره فيها أوضح وأجمل ومدينته أبهى من العروسة فى ليلة الحنة وقامته وراسه مستقيمة فى العالى.. ومش بيجرجر خيوط دمه على الأسلفت وراه !!

......................

"ينخفض الهمس الجماعى"
بيشوش الأسلفت فى عز عز الليل
بيشوش الأسلفت فى عز عز الليل
بيشوش الأسلفت فى عز عز الليل

عبدُ اللهِ هنا

2007-12-30T02:47:00.000+02:00

أترى هذا المواطن المصرى، ذاك الذى يرتدى قميص أبيض اللون فوقها بذلة قديمة، فى صباح هادئ مبتسم والساعة لم تتجاوز الثانية عشر يعبر ميدان "لاظ أوغلى" إلى مبناه الرهيب، لا يذكر من دروس التاريخ إلا درساً واحداً، "الدوام لله من قبل ومن بعد"، له خبث الكسالى ومكر الثعالب وخفة النُمُوس، يمر من البوابة المهيبة والعساكر وأمناء الشرطة فقط بترك اسمه، الكل يراه ولا يراه، فلا أحد يعريه أى اهتمام، يمشى فى البهو الفخم والردهة المؤدية لمكتب الوزير منتصب القامة، رافع الرأس، عزيز النفس لكن لا يبدو عليه أى خيلاء، يقتحم مكتب الوزير دون أن يلقى السلام، وأمام عينيى الوزير المذهولتين يضع يديه فى جيب بذلته ويخرج بطاقة رقمه القومى ببطء كأنه يخرج مسدساً ثقيلاً ثم يتركها على مكتبه وينتصب مرة أخرى مبتسماً فى سخرية هازئة ويمضى إلى حال سبيله

بالأفراح.. السلطنة صناعة وطنية ثقيلة

2007-12-25T09:53:00.001+02:00

"وأفرح فإنى لا أحب إلا الفرحان"
النـِّـفـِّـرى
*

نفسى أفرح وسط الناس والجماهير.. ونقول "الله الله" و"عظمة على عظمة على عظمة".. مراوح صدرنا محروقة مع كل آهه وتنهيدة والعروق تطق والجبين يسخن والبدن كله يقشعر من الحماس... منايا أفرح معاكم يا أجمل خلق الله.. نرقص دبكة جماعية على خشب المسرح وأسفلت شارع كورنيش النيل.. وأفضل أرقص وأرقص لحد المرواح وصوت الموسيقى فى ودانى ما بيسكتش ولا يهداش... قلبى باش.. وكمان قلب زياد لما تحس إن الحنين قطع قلبه وهو بيختم شريط "بالأفراح" بموسيقى "زورونى كل سنة مرة"... زورونى كل سنة لحظة.. هى لحظة.. يا دنيا قديمة زى أغنية ما راحتش من بالى.. يا نشوة هزتنى زى ما رقصتى هزت الكون من تحتى.. يا غية حمام هجت من صدرى لما الشتا سكن فىّ أربع مواسم... هى لحظة.. تقف عندها كل الساعات وبعدها كل شئ يغرق فى تصفيق حاد بانتهاء الحفلة

اعتركوا يرحمكم الله

2007-10-23T10:51:00.000+02:00

أنا لابس فرقة انتحارية

ولابسنى روح الاستشهادى

!!! وخلينى أكتر نوكيا

2007-09-22T23:00:00.000+02:00

!فاضل شوية على ما توصل.. ممكن تسأل اللي جنبك عن اخباره"

"خليك أكتر اجتماعية

مخنوق من الزحمة؟.. ليه ماتقولش دى عيلة واحدة؟"

"خليك أكتر إيجابية

حاسس انك وحيد ؟... على الأقل في اتنين غيرك بيقروا الاعلان ده"

"حاول تلاقيهم... خليك اكتر فضول

إعلانات شركة نوكيا الجديدة

غريبة ! غريبة جداً ! مع إنى من أشد المعادين لفن الإعلان وفن البوب عموما لأنه فن رأسمالى استهلاكى دايما ما بيحمل معنى سلبى، إلا إنى مش قادر أخفى إعجابى بإعلانات شركة نوكيا الجديدة فى الشارع ومحطات وعربات المترو

الإعلانات بتحمل قيمة فعلا إيجابية تكاد تختفى من المجتمع المدنى عموما، والقاهرى خصوصاً، وفى نفس الوقت الإعلان مناسب جدا لحركة المواطن القاهرى المدنى السريعة، فتلاقى نص الإعلانات أشبه بالنصيحة اليومية السريعة اللى ممكن نلاقيها مثلا موجودة فى صفحات النتايج أو إعلانات الصلاة والحجاب الإسلامية ذات مضمون إيجابى لكن بتقديم سلبى للغاية، ومن الملاحظ أيضا إرتباط الإعلانات بشعار الشركة وهو

"connecting people"

وهى أساس فكرة التليفونات والإتصالات عموما مش شركة نوكيا لوحدها

فى الحقيقة أنا شايف حتى فى صياغة هذة الإعلانات شكل من أشكال الشعر كده

الغائبون

2007-09-06T12:47:00.000+03:00

الأقربون الأقربون إلى قلبى، حاضرين أم كانوا غائبين، لهم فى القلب آثار نديةٌ عطرة.. كل منهم زرع ياسمينة أو غرس نخلة تشق جداره.. أما الغائبين.. فغيابهم زادنى رقه ثم ضعفاً وهوان.. والإنتظار مر المذاق.. أعلم أن هذا ليس هجران.. غيابكم ليس بخل ولا دلال.. ولكنها حياة تخطف الأحباء كلما أرادت

أزمة صدرية

2007-08-02T01:39:00.000+03:00

كلينى لهمٍ، يا أميمة، ناصبٍ، وليل أقاسيه، بطئ الكواكبِ

تطاول حتى قلت ليس بمنقض، وليس الذى يرعى النجوم بآنبِ

وصدر أراح الليل عازب همه، تضاعف فيه الحزن من كل جانبِ

النابغة الذبيانى

صدرى مأزوم.. كأن هناك أثقال سوداء تجثم فوقه.. أرى نفسى منشوقاً مئة ألف مرة بأسلاك الضغط العالى.. صدرى مأزوم.. أتسلق جبلاً من القطران الأسود والشمس خلفى غاربة تتركنى مع ليل زاحف على روحى.. والنجوم تختفى واحدة تلو الأخرى بدلاً من الظهور كأنها غرقت فى بحر ظلمات الليل أو أن الجبل قد ابتلعها فى جوفه الأصم.. مرهق ومتعب أنا لكننى أخشى أن تنزلق يدى بفعل العرق فأسقط فى السواد اللانهائى.. صدرى مأزوم.. أنا جرح عميق الأثر لا يلتئم.. وقد قيل لى إن فى الليل شفاء ودواء.. وهاهو الليل يزيدنى ضعفاً فوق ضعف

رد إعتبار لنفسٍ كريمة

2007-06-27T20:28:00.000+03:00

أنا الإنسان.. أنا الحداد.. صانع تروس الغيب

والرب يحركها كيف يشاء

......

نوبة تمر سريعاً

2007-06-19T23:30:00.000+03:00

"ألم نشرح لك صدرك"

قرآن كريم - سورة الشرح

كل يوم أصحو لأمارس خطاياى المعتادة.. رغم كل قسم أقسمته على نفسى.. وأنف كل قاعدة رسمتها.. بقلبى حامل الآثام.. أرتكب الخطايا.. ولا أبالى بشئ.. أنا ومن بعدى الطوفان.. ثم لا شئ غير الندم.. ندم زائف.. لا يقينى من الوقوع فى الأفخاخ.. ولا يصل بى إلى التوبة.. وإذا قلت لك إنك لو رأيت روحى عارية من كل قناع لن تجد غير التناقض التام بين القول والفعل.. أقول كذا وأفعل عكسه بدمٍ بارد.. والحقيقة أن البشر هم كتل من التناقض.. لكن هذا لا يبرر أى شئ هنا.. هذا لا يبرره غير الضعف.. ضعف ترك فى قلبى ندوباً سوداء لم ولن يصلحها الزمن مهما نسيت أو تناسيت.. من سيصفح عنى غير الله؟.. حتى هذا الصفح اعلم أننى لن أحصل عليه طالما أنا كذلك.. ربما أنا أريد من الله أن يصلحنى دون جهد منى.. لكن هذا لن يحدث أبداً.. فلا طريق لى غير المحاولة الصادقة.. والمداومة عليها.. بهذا القلب الآثم الملئ بالندوب الحارقة

وأنت يا هذا قولى لماذا خدت أجازة؟

2007-06-17T16:20:00.000+03:00

لا مذاكرة بعد اليوم

لعب الكورة أهم أهم

......

هتاف طلبة مدرسة الأوقاف التجريبية الإبتدائية فى 1998

........

!! وعشان هذا أخدت أجازة

ملوكى

2007-06-03T20:22:00.000+03:00

انتهى النهار الصيفى الطويل بمغرب وليل يظلم بطيئاً، وانتهى معه أول يوم عمل بالمحل بالنسبة لهذا الشاب، وهاهو ينتهى من تسليم ورديته لزميله، ليخرج من الشارع الفرعى إلى شارع (الهرم) الرئيسى -والذى يراه لأول مرة فى حياته- حيث أعجبه مشهد الشارع بكل تفاصيله من شجر وأزهار ومنازل وسيارات وإعلانات بيضاء مضيئة فوقف فى مكانه يتأمله وينسى سيرة حياته فى وسط المشهد الهادئ، والنسيم البارد يمر بقميصه الخفيف وذراعيه العاريين ووجهه، حتى جاءته سيارة من خلفه تزمجر، فأستفاق لنفسه وترك موقعه فى منتصف الشارع، وضع يديه فى جيوبه منتشياً، وأخذ فى السير متهادياً نحو المحطة

"مؤسسة.. مؤسسة.. مؤسسة"

بين صراخ المنادين على سياراتهم يبحث عن سيارة ليست مكدسة بالراكبين، يختار المنشودة، ويقبع فى داخل آخر كراسيها، منتظراً حتى تحمل بالراكبين، يضم ركبتيه نحو صدره مستنداً على الكرسى أمامه، ويحدق فى السماء المظلمة المغطاة بالسحب من خلال النافذة، كأن الليل ماهو إلا غشاء حريرى رقيق تحت تلك السحب الوردية يحجب النور عن الأرض، فأغمض عينيه كأنه يتمنى أن يكون هذا آخر ما تراه عيناه والتعب يخرج من بين أصابع قدميه المتعبتين

لم يدرى بنفسه إلا عندما أحس بهزة محرك السيارة من تحت كرسيه، وجد السيارة قد إمتلات بالراكبين، فأعتدل فى جلسته وأخرج بلا وعى الأجرة وسلمها للذى أمامه، وصوت السيدة أم كلثوم ينساب من راديو السيارة بأغنية "رق الحبيب"، يهز رأسه فى خفة متمايلاً مع الألحان داساً عيناه فى النافذة متأملا الطريق، واسترخى فى مقعده وغاص فيه أكثر وأكثر كأنه انفصل به عن بقية السيارة والعالم بأكمله

الذكرى السادسة والثلاثون لفنان الشعب إسماعيل يس

2007-05-24T08:16:00.000+03:00

يا سم يا دم - مونولوج من فيلم حظك هذا اليوم